Parruok ma Bedoe Nikech Masiche

Alona ma ae owuo kuome e sula motelo wacho niya: “Adundona guechoga matek samoro amora ma alam oywak, kendo aringoga mondo apond kama olos mondo ji opondie sama mbom omuoch. Kata sama apondo kanyo, podi awinjoga ka aluor aluora. Abetga maluor moloyo ka mbom omuoch to onge kama anyalo pondoe. Chieng’ moro ka ne awuotho e ndara, ne achako ywak, kendo ne ok anyal yweyo maber. Chunya nochandore kuom seche mang’eny. Kae to alam nochako ywak kendo.”

Lweny en achiel kuom masiche mang’eny ma keloga ne ji parruok. Kuom ranyisi, ng’ato nyalo bedo gi parruok ahinya sama lakteche ofwenyo ni en kata watne moro nigi tuo moro ma ok nyal chango. Jomamoko to parore kuom ngimagi ma kinde ma biro. Gipenjorega kama: ‘Be ma e ngima ma nyithindwa kata nyikwawa biro dakie, ngima mopong’ gi lwenje, mahundu, kethruok mar alwora kod tuoche?’ Ere kaka wanyalo kedo gi parruok ma kamago?

‘Ng’ama japarre neno gimoro marach, mi opondo’ nikech ong’eyo ni gik maricho timorega. (Ngeche 27:12) Kendo sama watemo rito ngimawa, dwarore bende ni warit pachwa kod chunywa. Neno sinembe mag timbe gero kata neno weche milando mopong’ gi pichni mag mahundu nyalo medonwa luoro, kaachiel gi nyithindwa. Ka ng’ato oweyo neno gik ma kamago mano ok nyis ni ok oyie ni gigo timorega. Nyasaye ne ochueyo pachwa mondo opar mana kuom gik mabeyo. Omiyo, onego watem wapong’ pachwa gi “gik moko duto madier, . . . makare, . . . maler, . . . ma jiwo hera.” Ka watimo kamano, “to Nyasach kuwe” nomi wabed gi chuny mokuwe.—Jo-Filipi 4:8, 9.

KAKA LAMO NYALO KONYOWA

Yie motegno konyowa nyagruok gi parruok. Muma jiwowa ni mondo ‘wabed moikore wuoyo gi Nyasaye e lamo.’ (1 Petro 4:7) Wanyalo kwayo Nyasaye mondo okonywa, kendo mondo omiwa rieko gi chir mar kedo gi pek moro moyudowa, ka wan gadier ni “owinjowa kuom wach moro amora ma wakwaye.”—1 Johana 5:15.

Muma wacho ni Satan e “jaloch mar pinyni” to ok Nyasaye, kendo ni “piny duto ni e bwo teko mar Ng’at Marach.” (Johana 12:31; 1 Johana 5:19) Mano e momiyo Yesu ne opuonjowa ni walem kama: “Ireswa kuom Ng’at Marach.” (Mathayo 6:13) Alona wacho kama: “Samoro amora ma alam ochako ywak, akwayoga Jehova mondo okonya abed gi chuny mokuwe. Chwora bende lemoga kanyachiel koda e seche ma kamago. Lamo konyaga ahinya.” E momiyo Muma wacho niya: “Jehova chiegni ni ji duto ma luongo nyinge, ni ji duto ma luongo nyinge gadiera.”—Zaburi 145:18.

GENO MA WAN-GO MAR KINDE MA BIRO

E twak ma Yesu nogolo e got, nopuonjo jolupne mondo olem kama: “Pinyruodhi mondo obi.” (Mathayo 6:10) Pinyruodh Nyasaye biro tieko chuth gik moko duto ma kelo ne dhano parruok. Nyasaye biro tiyo gi Yesu ma en “Ruodh Kuwe,” mondo ‘omi lwenje orum nyaka giko piny.’ (Isaiah 9:6; Zaburi 46:9) Nyasaye biro ‘ng’ado bura kind dhoudi mang’eny. Oganda ok anoting’ ligangla kuom oganda moro, kendo ok ginipuonjre lweny kendo. Kendo onge ng’a ma nobwoggi.’ (Mika 4:3, 4) Joot modak gi kuwe kendo mamor ‘noger udi, ginidagie; ginipidh puothe mag muzabibu, ginicham olembgi.’ (Isaiah 65:21) “Kendo japiny ok nowachi, ‘Atuwo.’”—Isaiah 33:24.

E kindegi, kata ng’ato ritre machal nade, pod ok onyal geng’o weche ma yudo ji duto apoya. (Eklesiastes 9:11) Nyaka sani, pod lwenje, timbe gero, kod tuoche nego joma beyo. Be nitie geno moro amora ma jogo nyalo bedogo?

Nitie ji mang’eny mosetho ma Nyasaye biro chiero. Nyasaye pod parogi nyaka chop kinde ma ‘ji duto manie liete, nowuog oko.’ (Johana 5:28, 29) Muma singonwa kama e wi geno mar chier: “Wan gi genoni ma chalnwa kaka nanga mar meli mosiro ngimawa; en geno madier, kendo motegno.” (Jo-Hibrania 6:19) Kendo Nyasaye ‘osechiwo ne ji duto gima nyiso ni mano biro timore, kuom chiero Yesu a kuom joma otho.’—Tich Joote 17:31.

E kindegi, kata mana jogo ma temo matek moro Nyasaye nyalo bedo gi parruok. Paul, Janet, gi Alona kedo maber gi parruok kuom tiyo gi rieko makare, sudo machiegni gi Nyasaye kokalo kuom lamo, kendo kuom bedo gadier ni weche ma Muma osingo biro timore gadier. To mano kaka Nyasaye osekonyogi! In bende, ‘Nyasaye ma chiwo geno mondo opong’i gi mor kod kuwe mogundho nikech geno ma iseketo kuome.’—Jo-Rumi 15:13.