Sikuru ka “Unyiso ni Ugeno Joma Kamago Ahinya”

CHAKRE higa mar 1992, Bura Matayo osebedo ka yiero jodong-kanyakla ma gin Jokristo motegno kendo molony mondo okony komiti maggi mopogore opogore e chopo tijegi.a Jokonygi iyiero e kind Jokristo ma gin “rombe mamoko,” kendo gikonyo Bura Matayo ahinya. (Joh. 10:16) Gijadhi e romo ma joma nie komiti ma gintiere bedogago juma ka juma, kendo gichiwoga paro kuom wach moro miwuoyoe kaluwore gi nonro ma gisetimo. Owete manie Bura Matayo e ma jang’ado paro mogik e wi wach moro, to jokonygi timoga gima komiti owacho kendo gijatimo migawo moro amora momigi. Jokonygi dhiga gi owete manie Bura Matayo e chokruoge moyiedhi kod chokruoge moriwo pinje. Bende inyalo migi migawo mar limo bede ofise mopogore opogore ka gin kaka owete ma ofiswa maduong’ ooro.

Achiel kuom owete mosebedo ka konyo owete manie Bura Matayo chakre ket chenro mar konyogi wacho niya: “Seche ma achopo migepe duto momiya, owete manie Bura Matayo yudo thuolo mar keto pachgi duto e weche Nyasaye.” Owadwa machielo bende osebedo ka konyo owete manie Bura Matayo kuom higni piero ariyo. Owacho kama koparo kaka osekonyogi kuom hignigo: “Mano osebedona thuolo makende ma onge gimoro amora ma anyalo pimogo.”

Bura Matayo omiyo owete ma konyogi migepe mogwaro kendo owete ma nie Bura Matayo ogeno ahinya tich maber kendo matek ma jokonygi timo kinde duto. Weuru waduto ‘wasik ka wanyiso ni wageno joma kamago ahinya.’​—Fil. 2:29.