Tiyo Kanyachiel gi Nyasaye Kelonwa Mor Mogundho
“Ka watiyo kanyachiel gi Nyasaye, wakwayou bende ni kik urwak ng’wono mogundho mar Nyasaye kae to wiu wil gi gimomiyo ne ochiwe.”—2 KOR. 6:1.
1. Kata obedo ni Jehova en Nyasaye man malo chutho, osebedo korwako jomamoko mondo otim ang’o?
JEHOVA en Nyasaye man malo chutho, en Jachuech gik moko duto, kendo en gi rieko kod teko duto. Ayub noduogo ofwenyo wachno achien. Bang’ Jehova penjo Ayub penjo moko e wi chuech, Ayub nodwoko kama: “Ang’eyo ni inyalo timo gik moko duto, kendo gi midwaro timo ok nyal geng’ore.” (Ayub 42:2) Jehova nyalo timo gimoro amora mochano timo ma ok ng’ato okonye. Kata kamano, nikech hera mare osebedo ka orwako jomamoko a chakruok mondo oti kanyachiel kode e chopo dwarone.
2. En tich mane maduong’ ma Jehova nomiyo Yesu thuolo mar timo kanyachiel kode?
2 Nyasaye nokwongo chueyo Wuode ma miderma. Jehova nomiyo Wuodeno thuolo mar tiyo kanyachiel kode e chueyo gik mamoko duto, moriwo chuech mag roho kod mamoko mineno. (Joh. 1:1-3, 18) Jaote Paulo nowuoyo e wi Yesu ka nondiko niya: “Kokalo kuome, ne ochue gik mamoko duto manie polo gi manie piny, gik mineno gi ma ok ne, gibed kombe ruodhi, kata migepe mag telo, kata pinjeruodhi, kata teko mag loch. Gik mamoko duto osechue kokalo kuome, kendo ne en.” (Kol. 1:15-17) Omiyo, Jehova nodhialo Wuode kuom yie mondo oti kode e chueyo gik moko kendo kuom nyiso jomoko migawo maduong’ ma Wuodeno nigo.
3. En tich mane ma Jehova nomiyo Adam, to nikech ang’o?
3 Jehova bende norwako dhano mondo oti kanyachiel kode. Kuom ranyisi, noyie ne Adam mondo ochak le nying. (Chak. 2:19, 20) Onge kiawa ni Adam ne mor ahinya rango lego konono timbegi mondo oyier nying mowinjore kodgi. Jehova ne nyalo chako lego te nying nikech en e ma nochueyogi. To nikech hera mare, nowe ne Adam tijno. Nyasaye bende nomiyo Adam migawo mar yaro tong’ mar puoth Eden mondo piny duto obed Paradiso. (Chak. 1:27, 28) Gima lit en ni Adam noyiero weyo tiyo kanyachiel gi Nyasaye, to mano nomiyo okelo lit e ngimane owuon kod kothe duto.—Chak. 3:17-19, 23.
4. Ere kaka jomoko notiyo gi Nyasaye e chopo dwache?
4 Bang’e, Nyasaye nogwelo jomamoko mondo oti kanyachiel kode e chopo dwache. Noa nohondho yie ma norese kaachiel gi joode e kinde ma ataro mar pi nokwako piny ngima. Musa nogolo oganda Jo-Israel e piny Misri. Joshua notero ogandano e Piny ma Nosingi. Suleman nogero hekalu Jerusalem. Maria nobedo min Yesu. Joma nochung’ motegnogi kod jomamoko mathoth notiyo kanyachiel gi Jehova e chopo dwache.
5. En tich mane ma wanyalo timo, to be nochuno ni Jehova omiwa tijni? (Ne picha manie chak sulani.)
5 Kindegi, Jehova gwelowa mondo wariw lwedo Pinyruodh Mesia gi chunywa duto. Nitie yore mang’eny ma wanyalo tiyonego Nyasaye, mak mana ni nitie Jokristo moko ma ok nyal yudo thuolo mar tiyo ne Nyasaye e yore moko. Kata kamano, waduto wanyalo timo tij lando wach maber mar Pinyruoth. Adiera en ni ne ok ochuno ni Jehova omiwa tijno. Nonyalo yiero wuoyo gi dhano achiel kachiel ka en e polo. Yesu nowacho ni Jehova ne nyalo kata miyo kite okog matek ka lando ne ji Ruoth mosebedo Mesia. (Luka 19:37-40) To pod Jehova omiyowa thuolo mar bedo “jotich ma tiyo kanyachiel” kode. (1 Kor. 3:9) Jaote Paulo nondiko niya: “Ka watiyo kanyachiel gi Nyasaye, wakwayou bende ni kik urwak ng’wono mogundho mar Nyasaye kae to wiu wil gi gimomiyo ne ochiwe.” (2 Kor. 6:1) Tiyo kanyachiel gi Nyasaye en dhial ma ok wawinjore yudo, to mano miyo wabedo gi mor mogundho. We wane ane moko kuom gik momiyo wabedo mamor.
TIYO KANYACHIEL GI NYASAYE MOROWA
6. Wuod Nyasaye makayo nolero nade kaka nowinjo e chunye tiyo gi Wuon mare?
6 Chakre chon, jotich Jehova osebedo mamor tiyo gi Nyasaye. Wuod Nyasaye makayo ma ipimo gi rieko, iwuoyo kuome ka owacho niya: ‘Jehova nochueya ka ne ochako tichne. Ne an bute gi kanyono ka jatich molony; mi nomor koda pile, ne ail e nyime ndalo duto.’ (Nge. 8:22, 30) Yesu ne mor tiyo gi Wuon mare, kendo noil e tich ma notimo. E wi mano, ng’eyo ni Jehova nohere bende ne more malich. To nade wan?
Be nitie tich machielo ma miyowa mor mogudho moloyo puonjo ng’ato adiera? (Ne paragraf mar 7)
7. Ang’o momiyo tij lendo morowa?
7 Yesu nowacho ni wabedo mamor sama wachiwo gik moko kendo sama wakawo gik momiwa. (Tich 20:35) Ne wamor ahinya sama ne opuonjwa adiera kendo wan bende wabedoga mamor puonjo jomoko adierago. Sama wapuonjo jomoko adiera manie Muma, waneno kaka joma nigi riyo mar ng’eyo Nyasaye bedo mamor sama gichako ng’eyo kendo hero Nyasachwa kaachiel gi adiera manie Wachne. En gima morowa bende sama giweyo paro ma ne gin-go chon kod kit ngimagi machon. Wang’eyo ni tij lando wach maber en gima duong’ ahinya. Tijno chiwo ne joma oseloso winjruokgi gi Nyasaye thuolo mar yudo ngima mochwere. (2 Kor. 5:20) Be nitie tich machielo ma jaber kendo ma miyowa mor mogundho mopogore gi tij konyo ji mondo obi odag nyaka chieng’? Onge!
8. En ang’o ma jomoko osewacho e wi tiyo kanyachiel gi Jehova?
8 Kata obedo ni wabedo mamor sama ng’ato orwako wach ma walando, en gima morowa bende ng’eyo ni wamoro Jehova kendo ng’eyo ni omor gi kinda ma watimo mondo watine. (Som 1 Jo-Korintho 15:58.) Marco ma odak e piny Italy wacho kama: “Mora matek ng’eyo ni amiyo Jehova gima berie mogik to ok ng’at ma wiye biro wil gi tija.” Franco ma be tiyo ne Nyasaye e piny Italy wacho niya: “Jehova tiyo gi Wachne kod chiemb chuny mochiwonwa e yore mopogore opogore mondo oparnwa pile ka pile ni oherowa kendo ni gimoro amora ma watimone kata bed ni wanyalo paro ni otin, okawo mapek. Ma e momiyo tiyo kanyachiel gi Nyasaye kelona mor kendo miyo abedo gi geno e ngimana.”
TIYO GI NYASAYE MIYO WASUDO MACHIEGNI KODE KOD JOMAMOKO
9. En kit winjruok ma chalo nade ma ne ni e kind Jehova gi Yesu, to nikech ang’o?
9 Sama watiyo gi jomoko ma wahero, wamedo sudo machiegni kodgi kendo wang’eyo kido ma gin-go. Mano bende konyowa ng’eyo gik ma gidwa timo kod kaka gichano timo gigo. Yesu notiyo gi Jehova samoro kuom higni bilionde, kendo mano nomiyo hera kod winjruok me kindgi obedo motegno. Yesu nowuoyo e wi winjruok maber ma ne nie kindgino kowacho kama: “An kod Wuora wan achiel.” (Joh. 10:30) Ne gimor tiyo kanyachiel, ka gin gi winjruok maber e kindgi.
10. Ang’o momiyo tij lendo miyo wasudo machiegni gi Nyasaye kod jomoko?
10 Yesu nokwayo Jehova e lamo mondo orit jopuonjrene. Ang’o momiyo nokwayo kamano? Nolemo niya: “Mondo gibed achiel mana kaka wan kodi wan achiel.” (Joh. 17:11) Sama waluwo chike Nyasaye kendo timo tij lendo, mano konyowa ng’eyo kido mabeyo ma en-go. Wapuonjore gimomiyo en gima nyiso rieko geno kuome kendo luwo kaka otayowa. Sama wasudo machiegni gi Nyasaye, en bende osudo machiegni kodwa. (Som Jakobo 4:8.) Bende, wamedo sudo machiegni gi Jokristo wetewa nikech waromo gi pek ma gin bende giromogo, kendo mor ma wayudo e ma gin bende giyudo. E wi mano, wamedo sudo machiegni kodgi nikech gin gi chenro ma chal gi mekwa. Watiyo kanyachiel, wabedo mamor kanyachiel, kendo wanano kanyachiel. Nyaminwa moro miluongo ni Octavia ma odak Britain wacho niya: “Tiyo gi Jehova miyo asudo machiegni gi jomoko nikech osiep kod winjruok ma an-go kodgi ok en mar wuondruok, to wabedo kamano nikech wan gi chenro kod paro ma chal.” Donge in be isegawinjo kamano e chunyi? Donge neno kaka jomoko timo kinda mondo gimor Jehova miyo isudo machiegni kodgi?
11. Ang’o momiyo wabiro medo sudo machiegni gi Jehova kod owetewa e piny manyien?
11 E kindegi, wahero Nyasaye gi Jokristo wetewa ahinya, to e piny manyien kendo makare wabiro medo herogi moloyo. Parie tich ma jaber ma pod oritowa nyime ka! Wabiro rwako joma thoth ma biro chier kendo puonjogi yore Jehova. Biro dwarore ni walos piny obed paradiso. Tijegi ok gin tije matindo. Kata kamano, wabiro bedo mamor tiyo kanyachiel kendo bedo joma kare mos mos e bwo loch mar Pinyruodh Mesia. Dhano biro medo bedo gi winjruok maber gi jowetegi kod e kindgi gi Nyasaye ma biro ‘yieng’o gik mangima duto, kaka gidwaro.’—Zab. 145:16.
TIYO GI NYASAYE KONYOWA RITO WINJRUOKWA KODE
12. Ere kaka tij lendo konyowa rito winjruok ma wan-go gi Nyasaye?
12 Onego warit winjruok manie kindwa gi Nyasaye. Nikech wadak e piny ma ichiko gi Satan Jachien kendo wan dhano morem, yot ahinya mondo wachak bedo gi paro kod timbe ma ok owinjore mag pinyni. Chuny mar pinyni chalo gi aora ma ridore matek ma dwa terowa kama ok wadwar. Mondo kik pi terwa mwalo, nyaka wago abal matek ka wachomo malo. E yo ma chalo kamano, kinda dwarore mondo kik ywewa gi chuny manie piny motel ne gi Satanni. Sama walendo ne jomoko, onego waket pachwa kuom gik ma konyowa motudore gi weche Nyasaye to ok paro ma nyalo ketho yie ma wan-go. (Fil. 4:8) Tij lendo miyo wabedo gi yie motegno, nikech oparonwa gik ma Nyasaye osingonwa kod chikene ma nyiso ni oherowa. Bende, okonyowa bedo gi kido ma ipimo gi gige lweny mag roho ma nyalo konyowa kedo gi piny marach mar Satanni.—Som Jo-Efeso 6:14-17.
13. Janeno moro e piny Australia neno nade tij lendo?
13 Ka wadich e tij lendo kod tije mamoko motudore gi tij Nyasaye, ok wabi bedo gi thuolo mar parore e wi chandruoge ma wan-go, to mano ritowa. Joel ma odak e piny Australia wacho niya: “Tij lendo konya ng’eyo gik ma timore e kindegi. Okonya ng’eyo chandruoge ma ji yudo kod ber maseyudo nikech luwo puonj mag Muma e ngimana. Tij lendo osekonya siko ka abolora, miya thuolo mar geno Jehova kendo geno owete gi nyiminena.”
14. Ere kaka nano e tij lendo nyiso ni roho mar Nyasaye ni kodwa?
14 Tij lendo bende konyowa ng’eyo gadier ni roho mar Nyasaye ni kodwa. Par ane wachni: Wawach ni omiyi tij pogo ne joma nie gweng’u makate. Ok chuli kendo pesa mitiyogo be ok duokni. Kae to ifwenyo mapiyo ni nitie jomoko ma ok dwa makate mipogogo kendo nitie jomoko mosin kodi nikech tich mitimono. Ibiro dhi nyime gi tijno kuom kinde ma romo nade? Nikech ok imor gi kaka ji kawi, ok ibi bedo gi chir mar timo tijno kuom kinde malach. Kamano bende, thothwa osebedo ka nano e tij lendo kuom higni mang’eny ma ok chulwa, ka koni to joma walendonegi jarowa kendo ok nyis ni gimor gi tijwa. Donge mano miyo wabedo gadier ni roho mar Nyasaye tayowa e tijni?
TIYO GI NYASAYE NYISO NI WAHERE KENDO WAHERO JOWETEWA
15. Tij lendo otudore nade gi dwaro mar Nyasaye ne dhano?
15 Tem ane paro kaka tij lendo otudore achiel kachiel gi dwach Jehova ne dhano. Nodwaro ni dhano odag e piny ma ok githo, to kata obedo ni Adam notimo richo, Jehova ne ok oloko dwache. (Isa. 55:11) Kar mano, notimo chenro mondo ores dhano kigologi e tuech mar richo kod tho. Nikech Yesu be ne konyo e chopo dwarono, mano e momiyo nobiro e piny mondo ochiw ngimane ne dhano ma winjo Nyasaye. To mondo dhano owinj Nyasaye, ne nyaka gikwong ging’e gima odwaro ni gitim. Kuom mano, Yesu bende nopuonjo ji gik ma Nyasaye dwaro ni gitim kendo nochiko jopuonjrene otim kamano bende. Sama wakonyo ji obed gi winjruok maber gi Nyasaye, mano nyiso ni watiyo kanyachiel kode e chopo chenrone ma biro miyo ogol ji e richo kod tho.
16. Tijwa mar lendo otudore nade gi chike madongo ma Nyasaye ochiwo?
16 Konyo jomoko mondo owuoth e yo ma dhi e ngima mochwere nyiso ni wahero dhano wetewa kod Jehova ‘ma dwache en ni mondo ji mopogore opogore duto ores kendo obed gi ng’eyo malong’o chuth e wi adiera.’ (1 Tim. 2:4) Ka ne ng’ato openjo Yesu ni en chik mane maduong’ e kind chike duto ma ne omi Jo-Israel, nodwoko kama: “‘Nyaka iher Jehova Nyasachi gi chunyi duto, kendo gi ngimani duto, kendo gi pachi duto.’ Mani e chik maduong’ie moloyo kendo mokwongo. Mar ariyo ma chal kode e ma: ‘Nyaka iher wadu kaka iherori iwuon.’” (Mat. 22:37-39) Sama walendo, wanyiso ni waluwo chikegi.—Som Tich Joote 10:42.
17. Ineno nade thuolo ma jaber ma in-go mar lando wach maber?
17 Kiwacho awacha adier, oguedhwa ndi! Jehova omiyowa tich ma morowa, ma miyo wasudo machiegni kode kod dhano wetewa, kendo ma konyowa rito winjruokwa kode. Bende, tijno miyowa thuolo mar nyiso ni wahero Nyasaye kod dhano wetewa. Ngima jotich Nyasaye opogore opogore e piny ngima, to kata bed ni itin kata iti, imewo kata idhier, itegno kata in gi nyawo moro, ji tara gi tara manyo yore mag nyiso jomamoko adiera ma gisepuonjore. Samoro inyalo yie gi weche ma nyaminwa Chantel modak e piny France nowacho. Nowacho kama: “Nyasaye ma nigi teko duto e piny gi polo, Jachuech mar gik moko duto, Nyasaye mamor, nyisa kama: ‘Dhiyo! Wuo! Wuo e loya, wuo kowuok e chunyi. Asemiyoi tekona, Wachna ma en Muma, kony mowuok kuom malaikega, joweteni modak e piny, tiegruok mong’ith, kaachiel gi weche monego iwach e kinde mowinjore.’ To mano doko dhial modhialwago timo tich ma Jehova omiyowa kendo tiyo kanyachiel kode!”