“Mano e Mich Maberie Mogik ma Asegayudo”

Mano e kaka nyako moro ma jahigni 13 nowacho ka ne ng’ato omiye guok moro matin ma jaber. Dhako moro ma ja ohala nowacho ni kompiuta ma wuon-gi nomiye ka ne pod en e skul ne en mich maber ma nokonye e ngimane. Dichwo moro nowacho ni kad ma chiege nolosone bang’ bedo e kend kuom higa achiel e mich maberie mogik ma noseyudo.

Higa ka higa, ji mang’eny tiyo gi thuologi mondo gimany mich maberie moloyo ma ginyalo miyo osiepegi kata wedegi sama gimoro ma kende timore e ngimagi. Joma chiwo mich diher winjo ka joma gimiyo mich wacho weche ma onyis e paragraf mokwongo. To nade in? Be diher miyo ng’ato mich mogeno ahinya kata be diher yudo mich ma kamano in iwuon?

Mor ma ng’ato yudo nikech chiwo kata yudo mich en gima ber ahinya. Mano en nikech ng’at ma ochiwo mich bedo mamor mana kaka ng’at ma omi michno. Mano e momiyo Muma wacho niya: “Chiwo kelo mor mogundho moloyo kawo.” (Tich 20:35) Mor ma ng’at ma ochiwo mich bedogo medore ka ng’at ma omi michno onyiso ni ogeno michno gadier.

Kuom mano, ang’o ma inyalo timo mondo mich ma imiyo ng’ato okelne mor to in bende ibed mamor? To ka yudo mich miparo ni berie moloyo ok nyalre, inyalo timo nang’o mondo ibed gadier ni mich michiwono en mich ma inyalo gen?