Be Inyalo Paro?

Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo ma luwogi:

Mondo jonyuol modhi e pinje mamoko okony nyithindgi obed gi winjruok maber gi Nyasaye, ang’o momiyo onego ginon dhok ma gipuonjogo nyithindgi adiera?

Nyithindi biro puonjore dhok ma ji wacho e alwora ma udakie sama gin e skul kata sama gin gi jomamoko. Sama nyithindi ong’eyo dhok mokalo achiel, mano biro konyogi. Jonyuol nyaka non malong’o gik ma nyalo konyo nyithindgi mondo obed motegno e adiera, bed ni gibiro dhi e chokruoge mitimo gi dhok ma ne onyuolgigo kata mitimo gi dhok ma itiyogo e alwora ma gidakie. Jonyuol ma Jokristo temo mondo nyithindgi obed gi winjruok maber gi Jehova moloyo keto dwachgi motelo.​—w17.05, ite mar 9-11.

Ka ne Yesu openjo Petro niya: “Be ihera moloyo magi?” nowuoyo kuom ang’o? (Joh. 21:15)

Nenore ni Yesu ne wuoyo e wi rech ma Petro gi jowetene ne osemako kaachiel gi tij lupo. Ka Yesu nosetho, Petro ne odok e tije mar lupo. Jokristo onego ononre mondo gine ka dipo ni gihero tijegi mag andika moloyo weche Nyasaye.​—w17.05, ite mar 22-23.

Ang’o momiyo Ibrahim nonyiso chiege mondo owach ni en nyamin-gi? (Cha. 12:10-13)

En adier ni Sara ne en nyamin Ibrahim ma bathe. Ka dipo ni Sara ne nyalo wacho ni Ibrahim en chwore, dine oneg Ibrahim to mano ne dhi miyo kodhi ma nosing ni dhi biro kokalo kuome olal nono.​—wp17.3, ite mar 14-15.

En yo mane ma Elias Hutter nokelo mondo okony joma ne dwaro puonjore Dho-Hibrania?

Ne odwaro ni joma puonjore dho Hibrania ofweny wach ma yudore e dho Hibrania kendo poge gi nyukta momedi e bath wachno. Mondo nokonygi, ne ondiko wach maduong’ ma yudore e dho Hibrania e yo mong’ong’ore, kae to wach momed e bathe ne ondiko e yo ma ok ong’ong’ore. Muma mar New World Translation of the Holy Scriptures—With References bende tiyo gi yo ma kamano e weche moler piny.​—wp17.4, ite mar 11-12.

Gin weche ma Jakristo onego opar sama odwaro bedo gi bunde moritorego ka joma richo omonje?

Moko kuomgi gin: Nyasaye neno ngima kaka gima ler. Yesu ne ok onyiso jolupne ni gibed gi ligangla ma giritorego. (Luka 22:36, 38) Onego wathedh ligenginiwa obed kweye. Ngima en gima duong’ moloyo mwandu mag ringruok. Wadewo ahinya kaka jomamoko winjo e chunygi, kendo wadwa keto ranyisi maber. (2 Kor. 4:2)​—w17.07, ite mar 31-32.

Ang’o momiyo weche ma Mathayo kod Luka nondiko e wi ngima Yesu ka pod otin opogore?

Mathayo nondiko wechene kaluwore gi gik ma notimore ne Josef. Kuom ranyisi, nondiko gima Josef notimo ka nofwenyo ni Maria nigi ich kod lek ma Josef nobedogo ka malaika nyise ni oring odhi Misri, kod e lek ma ne onyisee ni odog Israel. Luka to nondiko wechene kaluwore gi gik ma notimore ne Maria; kuom ranyisi, nondiko kaka Maria nodhi limo watne ma Elizabeth kod gima notimo ka ne Yesu odong’ e hekalu.​—w17.08, ite mar 32.

Gin gik mage ma dhano osetimo ma pok oketho Muma?

Tiend weche ma otigo e Muma osebedo ka lokore kaka kinde medo kalo. Lokruok ma timorega e loch mag dhano bende miyo dhok ma ji mang’eny ong’iyogo lokore. Ji osekwedo kinda mitimo e loko muma e dhok mamoko.​—w17.09, ite mar 19-21.

Be ng’ato ka ng’ato nigi malaika ma rite?

Ooyo. Yesu nowacho ni malaike mag jopuonjrene ng’iyo wang’ Nyasaye. (Mat. 18:10) Gima Yesu ne wacho kanyo en ni malaike nono ahinya gik ma timore e ngima jopuonjrene, to ok ni ng’ato ka ng’ato nigi malaikane ma rite.​—wp17.5, ite mar 5.

Hera manie rang’iny ma malo mogik en mane?

A·gaʹpe ma en hera mitayo gi puonj makare mag Jehova e hera manie rang’iny ma malo mogik. En hera ma inyiso gi timbe ma kelo ber ne jomamoko.​—w17.10, ite mar 7.