Inyalo Dak Nyaka Chieng’ e Piny Ka

MANO DOKO GENO MA JABER! Jachuechwa osingonwa ngima mochwere e piny ka. Kata kamano, ji mang’eny wuoro ka be mano nyalore adier. Giwacho ni, ‘Gikone dhano nyaka tho athoya. Mano e kaka nochuewa​—kawuono ingima, kiny ilal nono.’ Jomoko to neno ni ji nyalo dak nyaka chieng’ to ok e piny ka. Joma kamago wacho ni ngima mochwere yudore mana ka ng’ato osetho modhi e polo. In to iparo nade?

Ka pok ing’ado paro moro amora, ne ane dwoko ma Muma chiwo e wi penjo adekgi: Yo ma nochuego dhano nyiso ni nonego odag kuom kinde ma romo nade? Ka ne Nyasaye ochueyo pinywani kod dhano, ang’o ma nodwaro? Tho noa kure?

NOCHUE DHANO E YO MAKENDE AHINYA

Kuom gik moko duto ma ngima ma Nyasaye nochueyo e pinyni, dhano e ma nochue e yo makende mogik. E yo mane? Muma wacho ni dhano kende e ma Nyasaye nochueyo e “kite owuon.” (Chakruok 1:26, 27) Mano tiende nang’o? Tiende en ni ne ochue dhano gi nyalo mar bedo gi kido mag Nyasaye kaka hera kod timbe makare.

E wi mano, dhano ne omi nyalo mar tiyo gi pache kod mar yiero bedo gi timbe mabeyo kendo bedo gi winjruok gi Nyasaye. Mano e momiyo dhano morga gi yo ma ochuego pinyni kod le mamoko, kendo ginyalo goyo thum, wer, kendo loso gik mopogore opogore. To gima duong’ moloyo en ni dhano kende e ma nyalo lamo Jachuech. Mago duto nyiso kaka dhano opogore mabor gi chuech mamoko ma ni e piny.

Koro par ane: Be Nyasaye ne nyalo chueyo dhano e yo makende kamano mochak omedne nyalo mar bero kite ka nodwaro ni dhano odag mana kuom ndalo machuok? Adiera en ni Nyasaye nomiyo dhano kido kod nyalo makendego mondo dhano odag nyaka chieng’ e piny ka.

DWACH NYASAYE CHAKRE CHON

Jomoko wacho ni Nyasaye ne ok dwar ni dhano odag e piny nyaka chieng’. Giwacho ni pinyni en kama wabworoe abwora kipiedhowa mondo Nyasaye one ni jomage mowinjore odhi odag kode nyaka chieng’ e polo. Ka po ni en kamano adier, donge mano nyiso ni kare chandruoge duto mokwako pinyni Nyasaye e ma kelo mondo opiedhwago? To Nyasaye ok nyal timo gima kamano; mano ok kite! Muma wacho kama e wi Nyasaye: “Yorene duto ni kare. En Nyasaye ma jaadiera, kendo maonge ketho, ma timbene kare, kendo ma jaratiro.”​—Rapar mar Chik 32:4, Luo, 1976.

Muma nyisowa maler gimomiyo Nyasaye ne ochueyo piny kowacho kama: “Polo en pond Jehova; to piny osemiyo nyithind ji.” (Zaburi 115:16) Ee, Nyasaye nochueyo pinywani mondo obed kama jaber ma dhano nyalo dakie nyaka chieng’, kendo nopong’e gi gimoro amora ma dwarore mondo dhano odag maber.​—Chakruok 2:8, 9.

“Polo en pond Jehova; to piny osemiyo nyithind ji.”​—Zaburi 115:16

Muma nyiso bende gimomiyo Nyasaye ne ochueyo dhano. Ne onyiso jonyuolwa mokwongo niya: “Nyuoluru, kendo medreuru, upong’ piny, kendo ubedi gi loch . . . kuom gik mangima duto mawuotho e piny.” (Chakruok 1:28) Mano doko tich maber ma Nyasaye nomiyogi mar rito Paradiso kendo yare mondo okwak piny ma ngima! Kuom adier, Adam gi Hawa gi gundgi te nonego odag nyaka chieng’ e piny, to ok e polo.

THO NOA KURE?

To kare tho noa kure? Muma nyisowa ni achiel kuom yawuot Nyasaye ma ne en-go e polo, ma bang’e ne oluong ni Satan kendo Jachien, notemo chocho dwach Nyasaye e puodho mar Eden. Notimo mano nade?

Satan nowuondo Adam gi Hawa mondo oriwre kode e ng’anyo ne Nyasaye. Ka ne Satan onyisogi ni Nyasaye ne tuonogi ratiro mar yiero kendgi gik mabeyo kod maricho, ne gi yie gi Satan mi giloko ne Nyasaye tokgi. Weche nobedo nade? Gikone ne githo mana kaka Nyasaye nosenyisogi. Mano e kaka ne giketho thuolo ma jaber ma ne gin-go mar dak nyaka chieng’ e Paradiso.​—Chakruok 2:17; 3:1-6; 5:5.

Ng’anyo ma Adam gi Hawa ne ong’anyogono osekelo ne dhano te chandruok nyaka kawuono. Wach Nyasaye nyisowa niya: “Richo nodonjo e piny kokalo kuom ng’ato achiel [Adam], kendo tho nobiro kokalo kuom richo, [mi] tho nolandore kuom ji duto.” (Jo-Rumi 5:12) Watho nikech ne wayudo richo kod tho kuom jonyuolwa mokwongo, to ok nikech chenro mar Nyasaye.

INYALO DAK NYAKA CHIENG’ E PINY KA

Ng’anyo ma ne otimore e puodho mar Eden ne ok oketho chenro ma Nyasaye ne nigo ka ne ochueyo dhano kod piny. Nikech Nyasaye en jahera kendo en gi tim makare, ne oloso yo mar golo dhano e tuech mar richo kod tho. Jaote Paulo nolero wachno kama: “Misach richo en tho, to mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.” (Jo-Rumi 6:23) Hera ma Nyasaye oherogo dhano e momiyo “nochiwo [Yesu Kristo] Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.” (Johana 3:16) Ka ne Yesu obiro e piny ma othonwa, ne oyawo yo ma dhano nyalo yudogo gik ma Adam ne olalo.a

Kiny-kiny kae, pinyni biro bedo paradiso mana kaka Nyasaye nosingo. In be inyalo dak e piny ma jaberno ka itimo kaka Yesu nowacho niya: “[Donj] e rangach madiny, nikech rangach kod ndara ma tero ji e kethruok duong’ kendo lach, kendo ji mang’eny e ma donjoe; to rangach matin kendo ndara madiny tero ji e ngima, to ji manok e ma nwang’e.” (Mathayo 7:13, 14) Ee, ng’ato ka ng’ato nyaka yier ka be obiro dak e paradiso kata ooyo. In iyiero ang’o?