Be Nyasaye Ong’eyi?

GIMA CHUECH MAG NYASAYE PUONJOWA

Par ane ranyisi mar rude ariyo ma chalre. Kinde mang’eny, ging’iyoga ahinya. Nancy Segal ma en achiel kuom jotelo mag Twin Studies Center kendo ma en rude wacho ni rude moko “ong’eyo jowetegi maber e okang’ ma ng’ato nyalo ng’eyo gima nyawadgi dwaro kata ka ok onyise.” Miyo moro ma en achiel kuom rude ariyo ma chalre nowacho kama: “Ng’ato ka ng’ato kuomwa ong’eyo nyawadgi maber chuth.”

En ang’o ma miyo rude ma chalre ng’ere e yo ma kamano? Nonro mosetim nyiso ni kata obedo ni alwora ma nyithindo ma rude odakie kod jonyuol ma gin-go nyalo miyo gibed gi winjruok maber e kindgi, gima duong’ momiyo gibedoga osiepe ahinya en ni gin gi genes machal.

PAR ANE: Donge Nyasaye ma nochueyo dend dhano e yo ma kamano ong’eyo maber kaka ng’ato ka ng’ato kuomwa chalo? Ruoth Daudi nowero kama: “Niuma e i mama. Denda ne ok opandoreni, ka nochweya ka mopondo. . . . Wang’i noneno chakrwok mar denda, fuonde duto mag denda nondik e kitapi.” (Zaburi 139:13, 15, 16) Nyasaye kende e mong’eyowa maber. Ong’eyo kaka dendwa chalo kod gik ma wasekaloe ma miyo wabedo gi kido mopogore opogore. Mano miyo wabedo gadier ni ong’eyowa e rang’iny ma malo.

GIMA MUMA PUONJOWA

Daudi kinde moro nolamo kama: “A Jehova, iserango chunya, kendo iseng’eya. Kabet piny ing’eyo, kata kaa malo, wach maparo donjoni gi ku mabor. Nimar wach moro onge e dhoga, to in, A Jehova, ing’eyogo chuth.” (Zaburi 139:1, 2, 4) E wi mano, Jehova ong’eyo nyaka gik ma waparo kendo “ong’eyo paro duto maiye mar chuny.” (1 Weche mag Ndalo 28:9; 1 Samuel 16:6, 7) Ndikogo puonjowa ang’o e wi Nyasaye?

Kata obedo ni seche moko wanyalo lemo alema gi chunywa, Jachuechwa to winjo gik ma wawacho. Ong’eyo gik ma watimo kod gimomiyo watimogi. Bende, ong’eyo gik ma beyo ma dwaher timo kata ka po ni ok wanyal timogi maber nikech wan dhano morem. Kuom adier, nikech Nyasaye e ma nopidho hera e i chunywa, orangowa ka en gi siso mar ng’eyo maber gik ma herano chwalowa mondo wapar kendo wagomb.—1 Johana 4:7-10.

Ndiko miyo wabedo gadier ni Nyasaye ong’eyowa

• “Wenge Jehova ni kuom joma kare, kendo ite winjo sayogi.”—1 PETRO 3:12.

• Nyasaye singo niya: “Anapuonji kendo nyisi yo ma nidhiye: Nang’adni rieko ka wang’a oneni.”—ZABURI 32:8.

NYASAYE KECHOWA AHINYA

Paro kinde duto ni Nyasaye ong’eyo gik ma wakaloe nyalo miyo wanan sama wan gi chandruok. Ne ane gima notimore ne Anna ma wuok Nigeria. Owacho kama: “Napenjoraga ka be nitie tiende bedo mangima adier ka chandruok olwora malich kama. Ne an chi liel. Nyara ne orwak e wod gi tuo mar hydrocephalus ma en tuo ma miyo obwongo bedo gi pi mang’eny. E kinde nogono, ne oyuda gi kansa mar thuno. Ne nyaka yang’a. Bende, ne nyaka rewa nyading’eny gi masinde ma tekogi ng’eny. Ne litna ahinya bedo e osiptal to nyara bende tuore.”

Ang’o ma nokonyo Anna mondo onan? Owacho kama: “Aparoga matut e wi ndiko kaka Jo-Filipi 4:6, 7 ma wacho ni ‘kuwe mar Nyasaye ma loyo ng’eyo duto biro rito chunyu kod pachu.’ Sa asaya ma aparoga ndikoni, awinjo ka an machiegni ahinya gi Jehova nikech ang’eyo ni ong’eya maber moloyo kaka ang’eyora awuon. E wi mano, Jokristo wetena bende jiwaga sama an kodgi.”

Odhi nyime wacho niya: “Kata obedo ni pok achango, anyagora maber gi tuona, to nyara bende sani bet dhi maber. Nikech wang’eyo ni Jehova ni kodwa, ok waparrega mokalo tong’ sama weche tek. Jakobo 5:11 jiwowa niya: ‘Wakwano joma osenano ni gin joma mor. Usewinjo wach Ayub kaka ne onano kendo useneno gima Jehova notimone bang’ mano, ni Jehova ogundho gi hera matut kendo okecho ji.’” Jehova nong’eyo maber chandruok ma ne Ayub nigo, to wan bende wan gadier ni ong’eyo chandruok duto ma ng’ato ka ng’ato kuomwa nigo.