Jonyuol, Be Ukonyo Nyithindu Otim Dongruok Mondo Obatisgi?

1. Jonyuol ma Jokristo nyaka bed gadier gi wach mane kapok otis nyithindgi?

NYAMINWA moro miluongo ni Blossom Brandt wacho gik ma notimore ka nonyiso jonyuolne ni doher mondo obatise. Owacho niya: “Kuom dweche mogwaro nasebedo kanyiso baba gi mama ni nadwaro mondo obatisa kendo ne giwuoyoga koda e wi wachno. Ne gidwaro bedo gadier ni nang’eyo maber ting’ ma nadhi bedogo nikech yierono. Ne obatisa Desemba 31, 1934.” E kindegi, jonyuol ma Jokristo bende dwaro konyo nyithindgi mondo otim yiero ma kamano. Chwalo batiso nyime ma onge gimomiyo nyalo miyo winjruok manie kind ng’ato gi Nyasaye kik bed maber. (Jak. 4:17) Kata kamano, kapok obatis nyithindo, jonyuolgi nyaka kwong bed gadier ni nyithindogo oseikore kawo ting’ mar bedo Jokristo.

2. (a) Ang’o ma jorit-alwora moko osefwenyo? (b) Wadwaro nono ang’o e sulani?

² Jorit-alwora moko osefwenyo ni nitie rowere moko ma hikgi hawo 20 ma jonyuolgi gin Joneno to pok obatisgi. Thoth rowerego dhiga e chokruoge mag kanyakla kendo gidhi e tij lendo. Gineno ni gin Joneno mag Jehova. Kata kamano, pok ginyiso ni gidwaro chiwore ne Jehova mondo obatisgi. Ang’o momiyo ok gidwa timo kamano? Nitie moko ma jonyuolgi e ma osenyiso mondo orit matin. E sulani, wadwaro nono weche moko ang’wen ma osemiyo jonyuol moko ok kony nyithindgi otim dongruok mondo obatisgi.

BE NYATHINA OSETEGNO MOROMO?

3. Ang’o ma ne chando chuny jonyuol Blossom?

³ Jonyuol Blossom ne ni mana kare paro ka be nyargi nosetegno moromo ng’eyo gimomiyo batiso en gima duong’ kod ting’ ma ng’ato bedogo kosebatise. Jonyuol nyalo ng’eyo nade ka nyathigi osetegno ma koro onyalo chiwore ne Jehova?

4. Chik ma Yesu nochiwo e Mathayo 28:19, 20 nyalo konyo jonyuol nade sama gipuonjo nyithindgi?

⁴ Som Mathayo 28:19, 20. Mana kaka ne waneno e sula mokalo, Muma ok wach higni ma nyaka ng’ato bedgo e ka batise. Kata kamano, gima nyalo konyo jonyuol en paro gik ma dwarore mondo ng’ato obed japuonjre Yesu. Wach ma yudore e dho-Grik molok ni ‘loko ji obed jopuonjre’ e Mathayo 28:19 tiende en puonjo ng’ato ka gima duong’ ma wadwaro en ni obed japuonjre. Japuonjre en ng’at ma puonjore gik ma Yesu nopuonjo mowinj tiendgi maber kendo oikore luwogi. Omiyo, jonyuol onego opuonj nyithindgi chakre tin-gi ka dwarogi maduong’ en konyogi mondo gibed jopuonjre Kristo mobatisi. En adier ni nyithindo matindo ahinya ok nyal batisi. Kata kamano, Muma nyiso ni nyithindo ma bet dito nyalo winjo tiend adiera manie Muma ma giluw adierago.

5, 6. (a) Yo ma Muma wuoyogo e wi Timotheo miyo wabedo gi paro mane e wi batisone? (b) Jonyuol mong’eyo nyithindgi e yo maber nyalo konyogi nade mondo gitim dongruok?

⁵ Timotheo ne en japuonjre ma nomakore gi adiera ka ne pod otin. Jaote Paulo nowacho ni Timotheo nochako puonjore adiera manie Ndiko chakre tinne. Kata obedo ni wuon Timotheo ne ok Ja-Yahudi, min-gi kod dagi ma ne gin Jo-Yahudi ne okonye mondo oher adiera manie Ndiko ka luwore gi kaka Jo-Yahudi nong’eyo tiendgi e kindego. Mano nomiyo obedo gi yie motegno. (2 Tim. 1:5; 3:14, 15) Ka ne Timotheo en rawera ma jahigni 20 kama, nosebedo Jakristo motegno ma ne inyalo mi migepe makende e kanyakla.​—Tich 16:1-3.

⁶ En adier ni nyithindo opogore kendo pachgi bende tegno e kinde mopogore opogore. Nitie moko ma pachgi tegno ka pod gitindo kendo gikwayoga mondo obatisgi. Moko to kawo higni mathoth ka pachgi pok otegno, omiyo inyalo mana tisgi bang’e. Omiyo jonyuol onego ong’e nyithindgi e yo maber mondo kik gichun-gi gi batiso. Onego gikony nyathi ka nyathi ka luwore gi nyalone mondo otim dongruok. Jonyuol nyalo bedo ma mor sama nyathigi oyie luwo weche ma yudore e Ngeche 27:11. (Som.) Kata kamano, wigi ok onego owil ni dwachgi maduong’ en konyo nyithindgi mondo obed jopuonjre Yesu motisi. Kuom mano, jonyuol onego openjre kama: ‘Be nyathina oseng’eyo puonj mag Muma e okang’ ma nyalo miyo ochiwre ne Nyasaye ma tise?’

BE NYATHINA OSENG’EYO PUONJ MAG MUMA E OKANG’ MOROMO?

7. Be ochuno ni nyaka ng’ato ng’e puonj duto mag Muma e ka batise? Ler ane.

⁷ Nikech jonyuol e ma nigi ting’ mar puonjo nyithindgi, en gima owinjore mondo gine ni nyithindgi oyudo puonj ma nyalo konyogi mondo gichiwre ne Nyasaye. Kata kamano, ok ochuno ni ng’ato nyaka ng’e gik moko duto e ka ochiwre ne Nyasaye mondo obatise. Jokristo duto onego odhi nyime ng’eyo puonj mag Muma e yo malong’o kata ka osebatisgi. (Som Jo-Kolosai 1:9, 10.) Kuom mano, ng’ato onego ong’e puonj mag Muma e okang’ ma romo nade e ka batise?

8, 9. Gima notimore ne jarit jela moro ka ne Paulo ni Filipi puonjowa ang’o?

⁸ Gima notimore ne joot moro e kinde Jokristo mokwongo nyalo konyo jonyuol. (Tich 16:25-33) Paulo nolimo taon mar Filipi e wuodhe mar ariyo ka en jamisonari chiegni e higa mar 50. En kaachiel gi Sila ne omakgi ka gin kuno ma otwegi e jela nikech weche mag miriambo. Ka ne otieno ochopo, piny noyiengni ma dhout jela te oyawore. Ka ne jarit jela oneno mano, noparo ni joma otuwe oseringo te mi oparo mar dere. Kata kamano, Paulo noluonge matek ka pok otimo kamano. Paulo gi Sila noyudo thuolo mar yalo ne jalno gi joode duto. Adiera ma beyo ma ne giwinjo e wi Yesu nomiyo gikawo okang’ mane? Ne obatisgi ma ok odeko. Ranyisini puonjowa ang’o?

⁹ Nyaka bed ni jarit jelano ne en jalweny ma noseritaya. Ne ok ong’eyo puonj mag Ndiko. Omiyo mondo ne batise mobed Jakristo, ne nyaka puonje mong’e puonj mag mise, ne nyaka ong’e tiend bedo jatich Nyasaye, kendo ne nyaka oyie luwo puonj mag Yesu gi chunye duto. Mapiyo nono bang’ ng’eyo adiera mag Ndiko ma oyie kodgi, nokwayo mondo obatise. Wan gadier ni nodhi nyime puonjore weche mathoth bang’ batiso. Ka luwore gi ranyisini, inyalo timo nang’o ka nyathini oseng’eyo puonj mag ndiko moriwo tiend chiwruok kod batiso kendo otiyo kodgi e ngimane? Inyalo jiwe mondo odhi owuo gi jodong-kanyakla mondo gine ane ka be oromo batiso.a Mana kaka Jokristo mamoko ma osebatisi, en bende obiro dhi nyime puonjore dwach Jehova e ngimane te, samoro kata nyaka chieng’.​—Rumi 11:33, 34.

BE APUONJO NYATHINA MONDO OYUD GIMA BIRO KONYE GADIER?

10, 11. (a) Jonyuol moko osebedo gi paro mane? (b) En ang’o ma janyuol onego oket mokwongo?

¹⁰ Nitie jonyuol moko ma neno ni nyithindgi okwong oyud somo ma malo mondi ma giyud tich maber e ka batisgi. Janyuol nyalo timo kamano koparo ni mano e ma dhi konyo nyathine. Be paro ma kamano biro miyo nyathine oyud gima biro konye gadier? To maduong’ie moloyo, be parono luwore gi Ndiko? Muma to wacho ni en yiero mane maber?​—Som Eklesiastes 12:1.

¹¹ Gima wiwa ok onego owilgo en ni riwruoge duto mag pinyni kwedo dwach Jehova. (Jak. 4:7, 8; 1 Joh. 2:15-17; 5:19) Bedo gi winjruok maber gi Jehova e ma biro konyo nyathini mondo okwed Satan, piny marachni, kod paro mobam mar jopiny. Ka janyuol jiwo ahinya weche mag somo kod manyo gige pinyni, mano nyalo chocho nyathine ma oketh ngima nyathino mar kinde ma biro. Be jonyuol mohero nyathigi nyalo weyo mondo pinyni e ma ochik ngima nyathigino? Wanyalo mana bedo ma mor gadier ka waketo tiyo ne Jehova obedo mokwongo e ngimawa.​—Som Zaburi 1:2, 3.

NADE KA NYATHINA OTIMO RICHO?

12. Ang’o momiyo jonyuol moko jiwo nyithindgi mondo kik batisgi mondi?

¹² Nyaminwa moro ma ne siko tamo nyare mondo kik batise wacho niya: “Wiya kuot kaparo ni gima ne miyo atame en ni naluor ni inyalo gole e kanyakla.” Mana kaka nyaminwano, jonyuol moko bende oseng’ado ni kik batis nyithindgi mondi nyaka gikal higni ma ng’ato weyo paro mofuwo mag nyithindo. (Cha. 8:21; Nge. 22:15) Ginyalo wuondore ka giwacho ni, ‘Ok nyal gol nyathina e kanyakla kapok obatise.’ Ang’o momiyo mano en paro mobam?​—Jak. 1:22.

13. Be ng’ato bedo ma onge gi ting’ e nyim Jehova nikech pok obatise? Ler ane.

¹³ En adier ni jonyuol ok diher ni otis nyathigi ka pok obedo ng’at ma pache otegno kendo mong’eyo gimomiyo onego ochiwre ne Nyasaye. Kata kamano, en wuondruok maduong’ paro ni ka ok obatis nyathini to ni koro oonge gi ting’ moro amora e nyim Jehova. Nikech ang’o? Batiso ok e ma mi ng’ato bed gi ting’ e nyim Jehova. Kar mano, nyathi bedo gi ting’ e nyim Jehova koseng’eyo pogo gima ber gi gima rach. (Som Jakobo 4:17.) Kuom mano, jonyuol mariek ok kwer nyithindgi mondo kik batisgi, to giketonegi ranyisi maber mowinjore giluw. Gikonyo nyithindgi chakre tin-gi mondo giher chike makare mag Jehova. (Luka 6:40) Hero Jehova e ma biro konyo nyathini mondo kik tim richo, nikech kinde duto obiro timo gik ma Jehova dwaro.​—Isa. 35:8.

KAKA JOMAMOKO NYALO KONYO

14. Jodong-kanyakla nyalo konyo nade jonyuol ma temo matek mondo okony nyithindgi otim dongruok ma batisgi?

¹⁴ Jodong-kanyakla bende nyalo konyo jonyuol kuom wuoyo maber e wi chenro mag tiyo ne Nyasaye. Nyaminwa moro ma osebedo painia kuom higni 70 paro kaka mbaka ma ne ogoyo gi Owadwa Charles T. Russell ka ne en jahigni auchiel nomulo chunye. Owacho niya: “Nowuoyo koda e wi chenro ma ne an-go mar tiyo ne Nyasaye kuom dakika 15 kende.” Adier, weche mabeyo nyalo jiwo ng’ato. (Nge. 25:11) Jodong-kanyakla nyalo miyo jonyuol gi nyithindgi tije mopogore opogore e Od Romo ka luwore gi nyalo kod hik nyithindogo.

15. Gin yore mage ma jomamoko e kanyakla nyalo jiwogo rowere?

¹⁵ Owete gi nyimine mamoko e kanyakla bende nyalo konyo nyithindo kuom dewogi. Mano nyiso ni nyaka wayaw wang’wa mondo wane dongruok moro amora ma gitimo. Be dibed ni rawera ogolo paro moro maber e chokruok, kata otimo migawo moro maber e chokruok mar kor juma? Be rawera moro osechung’ motegno e tem moro kata osetiyo gi thuolone maber molendo ka en e skul? Kik iwe ma ok ipwoye. Donge inyalo chano mondo iwuo gi rawera moro e yo ma nyiso ni idewe kapok ochak chokruok kata bang’ chokruok? Ka watimo kamano, wabiro konyo rowere mondo one ni gin bende ogen-gi e kanyakla.​—Zab. 35:18.

KONY NYATHINI MONDO OCHOP E BATISO

16, 17. (a) Ere kaka batiso otudore gi ngima mar ng’ato ma kinde ma biro? (b) En mor mane ma jonyuol biro bedogo ka gikonyo nyithindgi? (Ne picha manie chak sulani.)

¹⁶ Pidho nyathi ka ‘irieye kendo kipuonje kaka Jehova dwaro’ en migawo maduong’ ahinya ma janyuol nigo. (Efe. 6:4; Zab. 127:3) Nyithind Jo-Israel ne ikwano kaka nyithindo ma osechiwore nikech ne inyuologi e oganda ma nosechiwore ne Jehova. Kata kamano, kindewagi to onge gima kamano. E wi mano, bedo ni janyuol ohero Nyasaye kendo ohero adiera ok nyis ni nyathine bende biro timo kamano. Kochakore gi odiechieng’ ma jonyuol onyuolee nyathigi, onego gikonye obed japuonjre kendo ochiwre ne Jehova ma batise. Onge gima duong’ maloyo mano. En adier ni chiwruok, batiso, kod makruok gi Nyasaye e ma biro miyo oketne ng’ato alama mar tony e kinde masira maduong’.​—Mat. 24:13.

¹⁷ Ka ne Blossom Brandt oyiero mondo obatise, jonyuolne ne dwaro bedo gadier ni ne oikore kawo okang’ maduong’ kamano e ngimane. Bang’ bedo gadier ni nyathigino noikore maber, ne giyie mondo obatise. E otieno ma ne oriyo ni kiny ibatisee, wuon-gi notimo gimoro maber ahinya. Blossom wacho niya: “Nonyisowa ni wago chongwa piny, kae to olemo. Nonyiso Jehova ni nomor gi yiero ma nyare matin notimo mar chiworene.” Higni mokalo 60 bang’e, Blossom nowacho niya: “Wiya ok nyal wil gi gima baba notimo e otienono!” Un jonyuol, wageno ni ubiro bedo ma mor neno ka nyithindu chiwore ne Jehova ma batisgi.