Sama Jaodi Ochodo

“Nagombo mana tho ka ne chwora onyisa ni ne odhi weya kae to okendo nyako machielo ma pod tin. Wachno ne lit ndi, to ahinya-ahinya ka naparo kaka nasebedo ka atuonora gik mang’eny mana nikech en.”—Maria modak Spain.

“Ka ne chiega oweya, nawinjo mana ka gima atho nus. Gik moko duto ma ne wachano timo kanyachiel ne okethore te. Nitie odiechienge moko ma ne aparoga ni litno oserumo e chunya, to bang’ ndalo moko, litno ne duogoga kendo matek.”—Bill modak Spain.

NG’ATO nyaloga winjo malit ahinya ka jaode odonjo e chode. En adier ni nitie jomoko ma osega ng’wonone joutegi ma giloso weche obedo maber.a Bed ni olos weche ma kend odhi nyime kata ooyo, ng’at ma jaode ochodo bedoga gi chuny ma lit ahinya. Inyalo konygi nade?

NDIKO MA NYALO KONYI NYAGORI

Kata bed ni joma chwogi kata mondegi odonjo e chode winjoga malit, joma otimnegi kamano oseyudo ni Muma osekonyogi bedo gi chuny mokue. Ging’eyo ni Nyasaye neno lit ma gin-go.—Malaki 2:13-16.

‘Kuom weche mang’eny ma aparo e iya, hochni miyo chunya mor.’—Zaburi 94:19.

Bill mosewuo kuome wacho kama: “Sama asomo ndikono, chal mana ka gima Jehova kueyona lit ma an-go e yo mang’won mana kaka wuoro ma jahera nyalo timo ne nyathine.”

“Imakori gi ng’at momakore kodi.”—Zaburi 18:25, NW.

Carmen ma chwore nosebedo ka chodo kuom dweche mogwaro wacho kama: “Jaoda ne ok omakore koda. Kata kamano, Jehova to ne ok nyal weya, kendo ne ok onyal timo gima hinya.”

“Kik ubed gi parruok e wi gimoro amora, to kuom gik moko duto, kulamo kendo kusayo . . . nyisuru Nyasaye kwayou; eka kuwe mar Nyasaye ma loyo ng’eyo duto biro rito chunyu.”—Jo-Filipi 4:6, 7.

Sasha wacho kama: “Ajasomoga ndikoni ding’eny. Kaka ne amedo lemo nyadinwoya, e kaka Nyasaye ne medo miya kue e ngimana.”

Ji duto ma owuo kuomgi kaegi ne winjoga malit ma gigomb mana tho seche moko. Kata kamano, ne gitenore kuom Jehova Nyasaye kendo somo Muma nomiyo giyudo teko. Bill wacho kama: “Yie motegno ma ne an-go nomiya chir mar dhi nyime bedo mangima sama ne nenore ka gima weche duto ne okethore e ngimana. Kata obedo ni ne awuotho ‘e hoho mar tipo mar tho,’ Nyasaye ne ni koda.”—Zaburi 23:4.

a Mondo iyud weche ma nyalo konyi ng’eyo ka po ni inyalo ng’wono ne jaodi kata ooyo, som sula ma yudore e Amkeni! ma April 22, 1999 e wiye ma wacho ni: “Kukosa Uaminifu—Matokeo Yenye Kuhuzunisha,” “Je, Kupatana Kwawezekana?,” kod “Kuchagua Talaka.”

Gik ma Osekonyo Jomoko Nyagore

Som ndiko moko ma nyalo hoyi, kendo ipar matut kuomgi.

Bill wacho kama: “Asomoga bug Ayub kae to asomo Zaburi. Akiewoga weche motudore gi gik ma timorena. Nafwenyo ni joma nowacho weche ma yudore e buge ariyogo noyudo lit kod parruok ma chal mana gi mara.”

Winj thum moro ma yom ma nyalo hoyi.

Carmen wacho kama: “Ka ne nindo otamore tera gotieno nawinjoga thum. Timo kamano ne ohoya ahinya.” Daniel wacho niya: “Napuonjora goyo gita kendo timo mano ne miyo abedo gi chuny mokue.”

Nyis ng’at machielo kaka iwinjo e chunyi.

Daniel wacho niya: “Ne ok ang’iyoga nyiso jomamoko gik ma chanda. Kata kamano, ne an gi osiepe moko ma beyo ma ne awuoyogago pile ka pile. Ne anyisogi gik moko duto ma ne chando chunya. Seche moko ne andikonegi wechego, to seche moko nanyisogi achiel kachiel. Mano nokonyo kama duong’.” Sasha wacho kama: “Joodwa ne okonya ahinya. Minwa ne ni koda kinde duto. Sa asaya ma ne adwa wuoyo kode, nochiko ite maber. Wuonwa bende nomiyo abedo gadier ni nitie joma ohera kendo dewa. Kendo nokonya mondo lit ma ne an-go orum mosmos.”

Lem kinde duto.

Carmen wacho niya: “Nasiko alemo. Nawinjo ni Nyasaye ni machiegni koda, owinja, kendo okonya. E kinde matek kaka mago ne amedo bedo machiegni gi Nyasaye.”