Yie—Kido ma Miyo Wabedo gi Teko

YIE nyalo miyowa teko mar timo gik mang’eny. Kuom ranyisi, kata obedo ni Satan diher ketho osiep ma ni e kindwa gi Jehova, yie miyo wabedo gi “nyalo mar nego aserni duto ma kakni gi mach moa kuom [Satan].” (Efe. 6:16) Ka wan gi yie, wanyalo nyagore gi chandruok moro amora, kata obed chandruok maduong’ ma romo nade. Yesu nonyiso jolupne niya: “Ka un gi yie ma rom kata gi koth karadali, ubiro wacho ne godni ni, ‘Dar ka idhi kacha,’ to obiro dar.” (Mat. 17:20) Ka yie nyalo miyowa teko kamano, kare ber ka wanono penjogi: Yie en ang’o? Ere kaka chuny ma wan-go nyalo chiko kaka yiewa chalo? Ang’o ma wanyalo timo mondo wabed gi yie motegno? To onego wabed gi yie kuom ng’a?​—Rumi 4:3.

YIE EN ANG’O?

Yie ok en anena bedo gadier e wi gik ma wang’eyo, nikech ‘kata mana jochiende bende oyie ni Nyasaye nitie kendo gikirni gi luoro.’ (Jak. 2:19) To kare yie en ang’o?

Muma lero ni yie oriwo gik moko ariyo. Mokwongo, “yie en bedo gadier chuth kuom gik migeno.” (Hib. 11:1a) Ka in gi yie, mano nyiso ni in gadier chuth ni gimoro amora ma Jehova owacho en adier kendo ni weche duto mosingo biro chopo. Kuom ranyisi, Jehova nonyiso Jo-Israel kama: “Dabed ni unyalo ketho singruok ma naketo kuom odiechieng’ kod otieno, ni kik odiechieng’ kod otieno bedie e kargi; eka singruok dinyal kethore ma naloso kod Daudi jatichna.” (Yer. 33:20, 21) Be dibed ni isegaparo ni nitie kinde moro ma chieng’ nyalo weyo wuok kata podho mi kik wabed gi odiechieng’ gi otieno? Ka gima kamano pok obiroga e pachi, be onego ibed gi kiawa moro amora ka be Jachuech mar gik moko duto nyalo weyo ma ok otimo gik mosingo? Ooyo!​—Isa. 55:10, 11; Mat. 5:18.

Mar ariyo, yie en ‘neno gik migeno kata obedo ni ok negi gi wang’.’ (Hib. 11:1b) E yo mane? Wawach ni nyathi moro matin openji ni, ‘Ing’eyo nade ni muya nitie?’ Kata obedo ni pok ninenoga muya gi wang’i, pod inyalo konyo nyathino fwenyo gik ma nyiso ni muya nitie, kaka yueyo gi um, yo ma yamo fwadhogo gik moko, kod gik ma kamago. Ka nyathino osebedo gadier gi wachno, oyie ni kare gima ok ne gi wang’no nitie adier. E yo ma kamano, yie otenore kuom gik ma nitie adier.​—Rumi 1:20.

ERE KAKA CHUNY MA WAN-GO NYALO CHIKO KAKA YIEWA CHALO?

Nikech yie otenore kuom gik ma nitie adier, mondo wabed gi yie, nyaka wakwong wabed gi “ng’eyo malong’o chuth e wi adiera.” (1 Tim. 2:4) To mano kende ok oromo. Jaote Paulo nondiko kama: “Gi chuny, ng’ato nyiso yie.” (Rumi 10:10) Mano nyiso ni ng’eyo adiera kende ok oromo; ng’ato nyaka kaw adiera kaka gima duong’ e ngimane. Mano e ka onyalo dak ka luwore gi adierago, ma e gima nyiso ni en gi yie. (Jak. 2:20) Ng’at ma ok ohero adiera gi chunye duto nyalo jaro gik ma nenore maler, samoro nikech omakore gi gik ma osebedo kong’eyo kata odwaro timo mana gik ma en e ma ohero. (2 Pet. 3:3, 4; Juda 18) Mano e momiyo e kinde machon, nitie joma noneno honni gi wang’gi to pod ne ok gibedo gi yie. (Kwan 14:11; Joh. 12:37) Roho maler mar Nyasaye konyo mana joma ohero adiera kende mondo gibed gi yie.​—Gal. 5:22; 2 The. 2:10, 11.

GIK MA DAUDI NOTIMO MONDO OBED GI YIE MOTEGNO

Achiel kuom joma ne nigi yie motegno ahinya en Ruoth Daudi. (Hib. 11:32, 33) Kata kamano, jood gi Daudi moko to ne onge gi yie ma kamano. Kuom ranyisi, nitie kinde ma Eliab ma ne en owadgi maduong’ nonyiso ni noonge yie ka ne ojaro Daudi nikech weche ma Daudi ne penjo e wi Goliath. (1 Sa. 17:26-28) Onge ng’at minyuolo ka nigi yie; bende, ok wayud yie koa kuom jonyuolwa. Omiyo, Daudi ne nigi yie motegno nikech ne en gi winjruok maber gi Nyasaye.

E Zaburi 27, Daudi wacho gik ma notimo mondo obed gi yie motegno. (Wes 1) Noparoga matut e wi gik ma ne osekadhee chon kod kaka Jehova norese e lwet jowasike. (Wes 2, 3) Nomor gi chenro ma Jehova noketo mar lamo. (Wes 4) Daudi ne dhiga e chokruok e tabenakel mondo olam Jehova kanyachiel gi jotich Jehova wetene. (Wes 6) Nolemoga gi kinda. (Wes 7, 8) Bende, nodwaroga mondo Nyasaye opuonje yorene. (Wes 11) Nikech nokawo yie kaka gima duong’ ahinya, nowacho kama: “Di ne ok ayie ni abiro neno ber mar Jehova e piny ma jo mangima dakie, di ne chunya oa.”​—Wes 13.

ANG’O MINYALO TIMO MONDO IBED GI YIE MOTEGNO?

Inyalo bedo gi yie kaka ma ne Daudi nigo ka in be ibedo gi paro kaka moler e Zaburi 27. Nikech yie otenore kuom ng’eyo malong’o chuth, kaka imedo puonjori Wach Nyasaye kod bugewa ma lero Muma, e kaka ibiro yudo ka yotni bedo gi yie. (Zab. 1:2, 3) Sama ipuonjori, kaw thuolo moromo mondo ipar matut kuom weche mipuonjori. Sama waparo matut, wachalo joma loso lowo mayom mondo yiewa odongie. Kaka imedo hero Jehova, e kaka ibiro medo gombo timo gik ma nyiso ni in gi yie, kaka dhi e chokruoge mag lamo kod lando ne ji geno ma in-go. (Hib. 10:23-25) Bende, wanyiso ni wan gi yie ka ‘walamo kinde duto ma ok wawe.’ (Luka 18:1-8) Omiyo, ‘lam kinde duto’ ka in gadier ni Jehova dewi. (1 The. 5:17; 1 Pet. 5:7) Yie miyo watimo gik mabeyo, to timbewa mabeyogo miyo yiewa medo bedo motegno.​—Jak. 2:22.

BED GI YIE KUOM YESU

Otieno mogik ka Yesu pok notho, nonyiso jopuonjrene niya: “Nyisuru yie kuom Nyasaye; nyisuru yie kuoma bende.” (Joh. 14:1) Mano nyiso ni onego wabed gi yie, ok kuom Jehova kende, to bende kuom Yesu. Ere kaka inyalo nyiso ni in gi yie kuom Yesu? Ne ane yore adek minyalo timogo kamano.

Mokwongo, ne misango mar Yesu kaka mich ma Nyasaye omiyi in iwuon. Jaote Paulo nowacho niya: ‘Adak nikech yie ma an-go kuom Wuod Nyasaye, ma nohera kendo chiwore owuon ne an.’ (Gal. 2:20) Ka iyie kuom Yesu, mano nyiso ni iyie ni misango ma nochiwo konyi in iwuon, ni misangono e ma miyo inyalo weni richoni, ni inyalo yudo ngima ma nyaka chieng’ nikech misangono, kendo ni misangono e yo maduong’ mogik ma Jehova nyisogo ni oheri. (Rumi 8:32, 38, 39; Efe. 1:7) Ka in gadier chuth ni misango mar Yesu nyalo konyi, mano biro miyo kik ibed gi chuny ma chandore nikech nyawo moko ma in-go.​—2 The. 2:16, 17.

Mar ariyo, med sudo machiegni gi Jehova kokalo kuom lamo. Misango mar Yesu miyo wanyalo lamo Jehova “ka wan gi chir mar wuoyo, mondo okechwa kendo wayud ng’wonone mogundho ma konyowa e kinde mowinjore.” (Hib. 4:15, 16; 10:19-22) Lamo miyowa teko mar kwedo tembe.​—Luka 22:40.

Mar adek, winj Yesu kendo iluw kaka ochiki. Jaote Johana nondiko kama: “Ng’at ma nyiso yie kuom Wuod Nyasaye nigi ngima ma nyaka chieng’; to ng’at ma ok winj Wuowi ok none ngima, to mirimb Nyasaye siko kuome.” (Joh. 3:36) Ne ni Johana wacho ni ng’ama ok oyie kuom Wuod Nyasaye en ng’ama ok winje. Omiyo, inyalo nyiso ni iyie kuom Yesu mana ka iwinje kendo iluwo kaka ochiki. Inyalo winjo Yesu kuom luwo “chik Kristo,” tiende ni, gik moko duto ma nopuonjo kod ma nochiko ni watim. (Gal. 6:2) Yo machielo ma inyalo nyisogo ni iwinjo Yesu en luwo yo motayowago kokalo kuom “jatich mogen kendo mariek.” (Mat. 24:45) Kiwinjo Yesu, ibiro bedo gi teko mar nano sama ikalo e chandruok madongo ma chalo gi ohula.​—Luka 6:47, 48.

‘GERREURU E YIEU MALER CHUTH’

Nitie chieng’ moro ma ng’ato nokwayo Yesu kama: “An gi yie! Konya kama aremie e yie!” (Mar. 9:24) Ng’atno ne nigi yie e okang’ moro, to e ma pod nobolore kokwayo mondo miye yie momedore. Mana kaka ng’atno, wan be nitie kinde ma wanyalo romo gi weche moko ma dwaro yie momedore. Waduto wanyalo chako tego yiewa sani. Mana kaka waseneno, wanyalo miyo yiewa obed motegno ka wapuonjore Wach Nyasaye kendo paro matut kuom gik ma wapuonjore, to mano miyo wamedo hero Jehova. Bende, yiewa nyalo medo bedo motegno ka wachokore kanyachiel gi Jokristo wetewa, walando geno ma wan-go, kendo walamo kinde duto. E wi mago, ka watimo kinda mondo yiewa omed bedo motegno, wabiro yudo mich maduong’ moloyo mich te. Wach Nyasaye nyisowa kama: “Un joma ahero, gerreuru uwegi e yieu maler chuth . . . eka mondo uritru e hera mar Nyasaye.”​—Juda 20, 21.