Barup Ofis

Jolendo ma Wahero:

Wadwokonu erokamano kuom hera ma ne unyiso ka ukonyo owete gi nyimine mang’eny kuonde ma notwo marach koda kuonde ma ohula nopong’o ma okelo kech, e distrikt moko e alworawa.​​—⁠Joha. 13:35.

Owadwa moro ma ne okony ndalo kejno ne owacho niya: “Konyno ne obiro e kinde ma ne wadware ahinya. Wadwoko ne Jehova erokamano kaachiel gi riwruok mar oganda mare kuom kony ma wayudoni. Waneno hera madier manyiso kido mar Jokristo madier.” Wadwokonu erokamano kuom chiwo ma utimo ne tich madhi nyime e piny mangima.

Kuom ranyisi, e piny Amerka nochiw kony ne owete gi nyimine gana gi gana ma ne oyudo chandruok kane yamo mager oketho Wi Nam Mexico e higa mar 2005. Owete gi nyimine mokalo 8,000 ne otiyo e bwo Komiti 60 Mochung’ ne Tije mag Gedo, ka gichiwo thuolo, nyalo koda mwandugi. Giseloso kuonde ma nokethore kendo gero Ute mag Romo 86 kod udi 4,178 midakie. Owete nowuok tung’ piny Amerka duto mondo gichiw kony. Wadwoko nigi erokamano mogundho kuom hera ma ne ginyiso​​—⁠1 Thes. 5:​18.

Ka owuoyo kuom chiwruok ma notimoreno, nyaminwa moro modak Michigan nowacho niya: “Neno ji ka mor kendo buonjo nikech tich ma watimo mar keto negi tat udi manyien, ne omora ahinya. Aonge weche manyalo pimo godo mor ma an-go kuom bedo e riwurok majaber mar owete machalo kama.” Kuom adier, ma en ranyisi maber manyiso kaka onego watim ne jogo ma yudo masiche kaka mago.

Wakwayou mondo udhi nyime gi lamo ne owetewa mwaherogi duto, manyalo bedo ni yudo chandruok nikech masiche duto matimore e ndalo mag giko, kendo walam ne jogo ma bende chiwo kony.​​—⁠2 Kor. 1:​11.

Wan oweteu,

Ofise mag Burundi, Kenya, Sudan, Tanzania, kod Uganda