Ang’o Miketo Mokwongo?
1 Inyalo dwoko penjono nade? En adier ni waduto wagombo keto weche mag Pinyruoth ema mondo obed mokwongo. (Math. 6:33) Kata kamano, wanyalo penjre niya, ‘Be gik ma atimo e ngimana nyiso kamano?’ Muma jiwowa ni: “Ng’ireuru uwegi.” (2 Kor. 13:5) Wanyalo nonre nade mondo wane kabe waketo wach Pinyruoth mokwongo?
2 Thuolo ma Wan-go: Wanyalo chako gi nono kaka watiyo gi thuolo ma wan-go. (Efes. 5:15, 16) Gin seche maromo nade ma watiyogo juma ka juma ka wabudho gi osiepe, ng’iyo televison, tiyo gi intanet kata luwo gik mor ma chunywa ohero ahinya? Ka wanyalo ndiko piny seche ma watiyo godo e timo gik ma kamago, kendo pimo sechego gi seche ma watiyogo e luwo yore mag lamo, wanyalo wuoro ahinya pogruok manitie. Be wayiero tiyo kuom seche mang’eny kar tich, mana mondo wayud pesa mang’eny mag ng’iewo gik raha ma ok wadewo tij Nyasaye? Gin kinde maromo nade ma wabare ma ok wadhi e chokruok kata dhi e tij lendo mana mondo wadhi e yore mag luwo mor?
3 Ng’e Gik Monego Iket Mokwongo: Ng’enywa, ok wan gi thuolo ma romowa timo gik moko duto kaka wahero. Kuom mano, mondo wabed joma keto Pinyruoth obed mokwongo, dwarore wanon gik monego waket motelo, eka watim gik “makare” kata mowinjore moloyo. (Fili. 1:10) Magi oriwo puonjruok Wach Nyasaye, tiyo tij lendo, rito joodi kaachiel gi dhi e chokruok mag Jokristo. (Zab. 1:1, 2; Rumi 10:13, 14; 1 Timo. 5:8; Hibr. 10:24, 25) Yore mamoko kaka mag rieyo del kata timo tuke e okang’ moromo, nyalo konyo. (Mari. 6:31; 1 Timo. 4:8) To nikech ok gin gik mochuno ahinya, ok onego gikaw kar wach Pinyruoth.
4 Rawera moro ma Jakristo nochano keto weche mag Pinyruoth obed mokwongo kane ochako tiyo ne Nyasaye kuom thuolone duto, kar luwo somo mamalo, ni mondo obi oyud tich. Ne opuonjore dhok machielo, ma odar odhi lendo kama jotich Nyasaye ne dwarore ahinya. Nowacho ni: “An gi mor mang’eny ahinya kaendi. Tij lendo miya mor ndi! Agombo ni kanyalore, to rowere duto otim tich machalo kama mondo gin bende giwinj kaka awinjoni. Onge gima ber moloyo tiyo ne Jehova gi gik moko duto ma wan-go.” Ee, keto Pinyruoth mondo obed mokwongo kelonwa gweth, to gima duong’ moloyo en ni, mano moro Jehova, Wuonwa manie polo.—Hibr. 6:10.