Kony Jomoko Mondo Obed Osiepe Nyasaye
1 E ndalogi, ji moa e ogendini duto ipuonjo yore mag Jehova. (Isa. 2:2, 3) Kata kamano, mondo jogi onyag olemo “gi kinda,” nyaka gikwong giher Jehova. (Luka 8:15; Mari. 12:30) Ka gionge gi herano, ok ginyal bedo gi teko mar loyo tembe kata bedo gi chir mar timo gima kare. Yo achiel mar konyo jomoko obed gi winjruok maber gi Jehova en konyogi mondo gimed hero kido mag Jehova. Jiwgi mondo gipar matut kuom weche mondiki e buk mar Mkaribie Yehova.
2 Ranyisi Miketo: Timbeni nyalo mulo e yo maduong’ ahinya chuny joma puonjre Muma. Ka gineno ni ihero kendo igeno osiep manie kindi gi Jehova, kendo neno kaka ngimani chalo, mano nyalo jiwogi mondo gin bende gibed gi winjruok machal kamano. (Luka 6:40) Kuom adier, ranyisi ma waketo nyalo jiwo jomoko moloyo weche ma wawacho.
3 Yo achiel maduong’ ma jonyuol puonjogo nyithindgi mondo oher Jehova en kuom ranyisi ma giketo. (Rapar 6:4-9) Dichwo moro gi jaode ma ne dwaro ni nyithindgi obed ei adiera, ne omanyo kony kuom jonyuol ma ne onwang’o osetimo kamano mondo okonygi gi paro. Dichwo ne owacho kama: “Wach achiel ma ne awinjo kuom jonyuol duto ma ne awuoyogo ne en keto ranyisi maber kaka janyuol.” Kamano, kuom yore duto ma gidakgo e ngimagi, jonyuol keto ne nyithindgi ranyisi manenore manyiso gima tiend bedo “osiep Jehova,” en.—Jak. 2:23.
4 Lamo Mawuok ei Chuny: Bende, inyalo konyo jomoko mondo obed osiepe Jehova ka ipuonjogi kaka ginyalo lemo koa e chunygi. Inyalo nyisogi lamo ma ne Yesu opuonjo, kata lamo mamoko mang’eny ma yudore ei Ndiko. (Math. 6:9, 10) Inyalo puonjo nyithindi kaachiel gi jogo ma ipuonjo Muma kaka ginyalo lemo kokalo kuom winjo kaka in iwuon ilemo. Ka giwinjo weche mawuok ei chunyi, gibiro neno hera ma in-go kuom Jehova. Jiwgi mondo ‘giketre kuom lamo’ kinde ma giromo gi tembe. (Rumi 12:12) Ka gineno kaka Jehova konyogi e kinde mag chandruok, gibiro chako geno kuome kendo here kaka osiepgi mar adier.—Zab. 34:8; Fili. 4:6, 7.