Luw Ranyisi mar Kristo e Tij Lendo
1 Yesu ne oketonwa ranyisi monego waluw e tiyo tij lendo. Hera matut ma noherogo Nyasaye koda dhano ne nyisore e kinde mang’eny kendo e yore mang’eny. Ne opuonjo joma muol adiera kendo ne okecho jogo ma ne chandore kendo ma ne isando.—Math. 9:35.
2 Ranyisi mar Yesu kod Puonjne: Yesu ne ok oweyo tiyo tij lendo ni mondo odonj e weche mag siasa kata yore mag riwruoge makelo kony ne oganda. Bende ne ok oweyo yore mamoko ma ne nenore ni nyalo kelo ber ne ji mondo ogol pache kuom tij lendo kata mondo gigo okaw kar tich maduong’no ma ne okele. (Luka 8:1) Tich maduong’ ma ne otimo ne en lando wach maber ni Pinyruodh Nyasaye kende e ma biro tieko chandruok mag dhano chuth. Yesu ne nigi tich maduong’ ahinya ma ne onego otim, to kinde ma ne onego otimgo tijno ne tin. Kane Jo-Kapernaum dwaro ni mondo Yesu odong’ kuno, Yesu ne owacho ne jopuonjrene ni: “Wadhiuru ka moro . . . mondo ayal kuro bende; nikech ma e gi ma nokela.”—Mari. 1:38.
3 Bang’ tiego jopuonjrene, Yesu ne oorogi ka ochikogi gi wechegi: “Kuwuotho, yaluru niya, ‘Pinyruodh polo osesudo machiegni.’ ” (Math. 10:7) Ne opuonjo jolupne ni weche mag Pinyruoth ema onego giket mokwongo e ngimagi. (Math. 6:33) Weche mogik ma ne Yesu owacho ne jopuonjrene kapok odhi e polo ne en nyisogi ratiro gima ne onego gitim. Ne owacho nigi kama: “E momiyo dhiuru utim ogendini duto jopuonjrena.”—Math. 28:19.
4 Gimomiyo Pinyruoth en Gima Duong’: Wach maduong’ ma ne Yesu puonjo ji ne en wach Pinyruodh Nyasaye, kendo ne ojiwo jopuonjrene mondo oluw ranyisi ma ne oketono. Yore dhano mag temo loyo chandruok ok nyal tieko chandruok chuth. (Yere. 10:23) Pinyruodh Nyasaye kende ema nomi nying’ Nyasaye obed maler kendo ema notiek chandruok ne dhano chuth. (Math. 6:9, 10) Puonjo adiera mag Pinyruoth ne jogo ‘maparore, maywak, nikech weche duto modwanyore,’ konyogi dak e ngima ma nigi mor kendo maber e kindegi, kendo gibedo gi geno madier mar ngima mabiro.—Ezek. 9:4.
5 Yesu podi dhi nyime gi riwo lwedo tij lando wach maber mar Pinyruodh Nyasaye, kendo osingonwa ni enobed kodwa. (Math. 28:20) Waluwo e okang’ maromo nade ranyisi ma Yesu ne oketonwa e tij lendo? (1 Pet. 2:21) E ndalogi ma giko chiegni, watimuru gimoro amora ma wanyalo mondo waluw machiegni ahinya ranyisi ma Yesu noketo e tij lendo!