Kik Wiyi Wil gi Jogo Mosedok Chien Moweyo Tij Lendo

1. Ang’o momiyo onego wakaw okang’ mar jiwo jogo mosedok chien moweyo tij lendo?

¹ Be ing’eyo ng’ato moro amora mosedok chien moweyo tij lendo? Nyalo bedo ni oseweyo riwore gi kanyakla kendo osebedo mabor. E seche ma in e lendo mar ot ka ot, nyalo bedo ni iseromo gi ng’at ma kamano. Nyaka wang’e ni ng’atno podi en owadwa ma Jakristo. Wadwaro nyise ni wahere kendo konye duogo e kanyakla kendo ir ‘jakwath gi jarit chunywa.’—1 Pet. 2:25.

2. Ere kaka wanyalo jiwo jalendo ma odok chien?

² Nyis Ni Idewo: Goyone simo kata lime nyalo nyiso ng’at modok chienno ni wiwa pok owil kode. Ang’o ma wanyalo wachone? Wanyalo jiwe kata mana kuom nyise ni wasebedo ka wapare. Wuo e yo mamor kendo ma jiwo chuny. (Fili. 4:8) Wanyalo nyise wach moro maber ma nyocha wawinjo e chokruok machiegni. Bende wanyalo gwele mondo obi e chokruok mar kanyakla kata mar alwora kendo wanyalo chiwore mondo wamakne kom kata miye kony mar chopo.

3. Ere kaka ne ojiw nyaminwa moro mi ochako tij lendo kendo?

³ Nyaminwa moro ma ne obedo ng’at mosedok chien kuom higini 20 ne oyudi kane itimo tij lendo. Kata obedo ni ne ok oyie mondo opuonjruok kode Muma, nyaminwa ma ne oyude ne omedo dok lime kendo weyone gasede mobiro manyien. Bang’ chokruok mar distrikt, nyaminwa ma jalendono ne owuoyo kode kuom thuond weche ma ne opuonjore e chokruogno, kendo bang’e ne ojiwe mi ochako tij lendo.

4. Ere kaka wanyalo rwako ng’ato ma ne odok chien to koro obiro e chokruok?

⁴ Ka Ng’ato ma Nodok Chien Oduogo: Ka owadwa ma Jakristo modok chien ochako biro e chokruok, onego warwake nade? Par ane, ang’o ma Yesu ne otimo ne jopuonjrene kane gijwang’e kuom kinde matin? Ne oluongogi gi mor ni ‘owetena’ kendo ne onyiso ni ogenogi. Bende ne omiyogi migawo maduong’. (Math. 28:10, 18, 19) Bang’e matin ne gidich gi tij lando wach maber ma “ok giweyo.”—Tich 5:42.

5. Nyis gik manyalo miyo wawuo gi jodong-kanyakla kuom ng’at mosedok chien.

⁵ Kapok wachiwore mar puonjruok Muma gi ng’ato ma ne odok chien kata kapok wagwelo owadwa ma Jakristo mosebedo ng’at modok chien kuom kinde malach mondo olend kodwa, onego wawuo gi jodongo mondi. Ka sama walendo wayudo jalendo modok chien, onego wanyis jodong-kanyakla mondo omi gichiw kony madwarore.

6. En mor mane ma wanyalo yudo kuom konyo jogo ma osedok chien?

⁶ Mana kaka Muma nyiso maler, jogo kende matimo kinda nyaka giko ema nokwo. (Math. 24:13) Kuom mano par jogo manyalo bedo ni ochwanyore kata odok chien. Ka kuom chuny mar horruok wanyiso hera mar Jehova e yor dewo gadier jogo modok chien, wanyalo yudo mor mar nenogi ka giriwore kodwa kendo e tiyo ne Nyasaye.—Luka 15:4-10.