Sandug Penjo

◼ Gin chandruok mage mantie kuom tiyo gi Intanet e tudruok gi ng’at ma ok ing’eyo?

Oselos kuonde mang’eny mag yudo kata chokoe weche e Intanet (web sites) mondo ji orom kendo otudore ka gitiyo gi Intanet. Kuonde mag tudruokgi miyo ji thuolo mar ndiko kendo oro weche manyiso gima gin, manyalo ting’o pichegi koda weche mamoko mawuoyo kuomgi. Joma somo wechego nyalo tudore kodgi. Rowere ohero kuonde ma kamago e Intanet, kendo rowere moko ei kanyakla osetiyo kodgi e tudruok gi jomamoko mawacho ni gin Joneno mag Jehova.

Yot mondo ng’ato ma waromogo e Intanet opand gima en, opand kaka winjruokne gi Jehova chalo, kata gima odwaro. (Zab. 26:4) Ng’at mawacho ni en achiel kuom Joneno mag Jehova, kuom adier onyalo mana bedo ng’at ma ok en Janeno, ng’at ma osegol e kanyakla, kata mana ng’at moweyo adiera kendo puonjo miriambo. (Gala. 2:4) En gima wachore ni, jogo materore gi nyithindo tiyo gi Intanet e yudo nyithindogo.

Kata kapo ni wan gadier ni jogo ma watudorego dhi maber ei kanyakla, wuoyo e kama chalo kamano nyalo lokore mabed wuoyo ma ok ler. Mano timore nikech ji ok oluoro ahinya joma pok giromogo wang’ gi wang’. Bende ginyalo neno ni tudruok e intanet en gima nie kindgi ji ariyo, kendo neno ni gimoro amora ma giwacho ok bi chopo ne jomoko, kaka jonyuol kata jodong-kanyakla. Gima lit en ni rowere mang’eny mawuok e udi mag Jokristo osemoko e obadhoni, kendo gisetiyo kod weche ma ok ler. (Efes. 5:3, 4; Kolo. 3:8) Jomoko oseketo piche makelo paro mag terruok, gimiyore nyinge ma ok ler, kata gitudo nonro margi mar Intanet kod wende mag vidio manyiso timbe terruok ayanga.

Nikech weche ma osewachgi, jonyuol onego onon gima nyithindgi timo e kompyuta. (Nge. 29:15) En gima nyalo kelo chandruok ka warwako ng’at ma ok wang’eyo e odwa kata weye kende kaachiel gi nyithindwa. Kamano bende, en gima nyalo kelo chandruok ne wan kata ne nyithindwa timo osiep e intanet gi joma ok wang’eyo, kata ka dipo ni giwacho ni gin Joneno mag Jehova.—Nge. 22:3.