Kony Jo Modhier Mondo Obed gi Geno
1 Yesu nonyiso ni ogombo ahinya konyo jo modhier. Nitie kinde ma ne ochiwo kony mar gi ringruok, kochango joma tuwo e yor hono, to kata kamano, gima duong’ ma ne otimo ne en lando “Wach Maber” ne jo modhier. (Math. 11:5) Tij lendo ma Jokristo timo e kindegi dhi nyime konyo jo modhier koda joma moko bende.—Math. 24:14; 28:19, 20.
2 Geno Madier: Jotend dinde maluongore ni Jokristo ohero nyiso jo modhier ni gibiro bedo gi mwandu ka gigolo chiwo mang’eny ne kanisa. Kata kamano, Muma to puonjo ni Pinyruodh Nyasaye kende ema biro tieko chan, kendo loyo chandruoge duto mag dhano. (Zab. 9:18; 145:16; Isa. 65:21-23) Ka wakonyo jo modhier mondo ong’e gima Muma puonjo kuom adier, wamiyo gibedo gi geno ka wakonyogi tieko riyo ma gin-go mar ng’eyo kendo lamo Nyasaye.—Math. 5:3.
3 Jo-Farisai ma ndalo Yesu ne jaro jo modhier, kendo ne giluongogi gi nying achaye ni ‘am-ha·’aʹrets, kata ni “jo piny.” Kata kamano, Yesu to ne neno “rembgi,” kata ngimagi kaka gima nigi “nengo matek.” (Zab. 72:13, 14) Wanyalo luwo ranyisi ma Yesu noketo ‘kwakecho jochan’ ma kamago kuom nyisogi ng’wono kendo dewogi e chandruogegi. (Nge. 14:31) Ok wabi dwaro wuoyo marach ngang’ kuom jogo modak kuonde ma dhier ng’enyie, kata nyiso chuny mool kochopo sa lendonegi. Thoth jogo marwako wach Pinyruoth gin joma ok odak e ngima man malo ahinya.
4 Kony Jo Modhier Sani: Tijwa mar puonjo jo modhier manie alwuorawa mondo ong’e chike koda puonj mag Muma en gima konyogi e duoko dhier chien gie sani. Kuom ranyisi, Muma kwedo mer, tiyo gi pesa e tuke mag loyo mich, samuoyo, madho ndawa, koda timbe mamoko ma rwako ji e dhier. (Nge. 6:10, 11; 23:21; 2 Kor. 7:1; Efes. 5:5) Ndiko jiwo ji mondo obed jo ratiro, matiyo tich gi ‘chunygi duto,’ kendo magi gin kido madwarore ahinya kuom jogo mindiko tich. (Kolo. 3:22, 23; Hibr. 13:18) Kuom adier, kaluwore gi nonro ma ne otim, thoth weg tich nowacho ni kido ma gidwaro neno ahinya kuom jogo ma manyo tich, gin kaka bedo jadier, kendo bedo ja ratiro.
5 Jehova dewo ahinya chandruoge ma jo modhier yudo. E kinde machiegni, Yesu Kristo “nogol jachan e chandrwok koywak.” (Zab. 72:12) Nyaka chop kindeno, wan gi thuolo makende mar hoyo jomoko, moriwo nyaka jo modhier, ka wating’o ote makelo geno ma Muma chiwo.