Bed gi Dwaro mar Puonjruok gi Ng’ato Muma
1 “Ting’uru wang’u ung’i puothe; nikech cham koro oromo keyo.” (Joha. 4:35) Weche ma Yesu Kristo ne owachogo, ka kuom adier nyiso gima jotich ma Jokristo neno e kindegi.
2 Joma nigi chuny makare ma gombo mondo opuonjgi yore mag Jehova, pod yudore. Mano nenore kuom kwan mar jopuonjre manyien ma ibatis higa ka higa. Ka kuom adier in gi gombo mar puonjruok gi ng’ato Muma, ang’o minyalo timo?
3 Ket Chenro: Mokwongo, ket chenro mar chako kendo puonjruok gi ng’ato Muma pile. Seche ma itimo tij lendo ket dwaro mari e pachi. Nikech migawo ma omiwa kaka Jokristo oriwo puonjo, kaachiel gi lendo, dwarore ni waduto wamed manyo thuolo mar puonjruok gi ji Muma.—Math. 24:14; 28:19, 20.
4 Weche Moko Minyalo Ket e Paro: Lamo gi chunywa duto dwarore ahinya kuom joland Pinyruoth. Seche moko wayudo joma osekwayo e lamo mondo giyud kony mar ng’eyo Wach Nyasaye. Mano gweth manade bedo ni Jehova tiyo kodwa e manyo kod puonjo joma kamago!—Hag. 2:7; Tich 10:1, 2.
5 Nyaminwa moro ne okwayo e lamo mondo oyud ng’ato ma opuonjo Muma kae to bang’e ne onyiso trakt miluongo ni Bende Diher Ng’eyo Muma Ahinya? kama otiye. Kane dhako moro okawo achiel kuom traktgo, mosome duto, mi ochako pong’o fom manie traktno, nyaminwano ne owuoyo kode mochako puonjruok mar Muma.
6 Jolendo weteni molony e chako kod puonjruok gi ji Muma nyalo konyi e chopo dwaroni mar puonjruok gi ng’ato Muma. Kwa Nyasaye e lamo kuom kinda mitimo mar manyo jopuonjre mag Muma, kendo ti kod kony moro amora ma yudore manyalo miyo ichop dwaronino. Nyalo bedo ni bang’ kinde matin ibiro bedo gi mor mar puonjruok gi ng’ato Muma.