Houru Jogo ma Chunygi Ool
1 Kuom kinde duto ma dhano osebedo e piny onge kinde ma hoch dwarore maloyo kindewagi. Ka waluwo Ruodhwa, Kristo Yesu ma jatendwa, wan bende watiyo tij ‘kweyo jogo maneno masira e chunygi.’—Isa. 61:1.
2 Yo Maber mar Hoyo Ji: Tijwa mar lendo nyaka riw gi chenro maber, kod lendo e yo majiwo ji, mondo mi wahogi. Ka ok walos ahinya kuom weche manyiso timbe maricho mag piny kod puonj mag miriambo, adiera mag Ndiko kod geno ma singo mar Nyasaye mahoyo chuny chiwo, biro bedo gima duong’ sama waloso gi ng’ato. To mano ok nyis ni ok wanyal wuoyo kuom Har–Magedon. Ote marwa en mar lando ‘higa ma Jehova oyie, ni ma e chieng’ ma Nyasachwa chulee kuor,’ kendo mondo ‘wawach ni ng’a marachno mondo wakwere oa e yore marach.’ Kata kamano, siem ma wachiwo kuom Har–Magedon kod kethruok mobiro kelo, ok onego um puonj maduong’ mar wach maber mar Pinyruodh Nyasaye.—Isa. 61:2; Ezek. 3:18; Math. 24:14.
3 Lendo Ot ka Ot: Yudo joma chunygi ool nikech midekre, tho mar ng’at ma gihero, timbe ma ok kare, kod chandruok mag yuto gin gik ma waromogo pile. Wan kaka joma luwo Kristo, wan be wakecho kata ‘ng’wononegi’ kendo waneno lit ne joma wanwang’o e tijwa mar lendo. (Luka 7:13; Rumi 12:15) Kata obedo ni wasomo negi ndiko achiel kata ariyo maluwore gi chandruokgi, nyaka wabed joma ‘winjo mapiyo,’ mondo mi jal ma walendoneno thuolo mar chiwo paro ma en go. (Jak. 1:19) Bang’ winjo, to wabedo gi thuolo maber mar hoyo ji.
4 E seche mowinjore ma waloso kodgi, wanyalo wacho negi kama “Daher somoni weche majiwo chuny manwang’ore e Muma.” Onego wati gi paro maber mondo kik wakwed paro duto ma ng’at ma walendoneno chiwo ma ok ni kare. Wach maduong’ onego bed jiwogi kendo miyogi hoch ka watiyo gi Ndiko e tego chunygi. Kuom mano, wanyalo tiyo gi Kutoa Sababu kwa Kutumia Maandiko ite mag 106-110 e bwo wiye mawacho ni “Kitia Moyo.” Kata inyalo miyo wuon ot trakt mar Faraja kwa Walioshuka Moyo ae iwuo kode kuom weche majiwo chuny manie iye.
5 Many Thuolo mag Hoyo Jomoko: Bende ing’eyo ng’ato e alworau, jal ma utiyogo, joma usomogo, kata achiel kuom joodu ma chunye dwaro hoch? Donge ber ka itemo matek mondo ilim joma kamago e utegi mondo ichiwnigi hoch ma ae Ndiko? Ng’eyo gima omiyo gidwaro hoch, nyalo miyo iikri ne dwaro ma joma kamago nigo. Mondo mi gichiw hoch, jomoko osendiko barua kata goyonigi simo. Hera madier kuom dhano wadwa biro miyo wakechgi kendo chiwonigi hoch mawuok e Ndiko.—Luka 10:25-37.
6 Ee, omiwa ote mar hoyo joma yuak, jiwo joma chunygi okuyo, kod miyogi geno maber mar kinde mabiro. Ma e hoch ma joma nie piny dwaro. Wuoyo gi ilo kuom gigo mabeyo ma Nyasaye osesingo, biro chiwo hoch kod geno ne joma chunygi ni kare. Weuru ndalo duto wapar ni onego wakwe jogo maneno masira e chunygi.