“Uluw Ndache” Machiegni
1. Ere kaka wanyalo bedo joneno molony?
1 Kata obedo ni Yesu ne ok osomo e skunde jorabi, en e Jatich Nyasaye maduong’ie moloyo mosebetie. Wamor ni nitie weche mondiki kuom tije ma Yesu ne otimo ma oseriti mondo okonywa. Mondo mi wabed molony kaka joneno nyaka ‘waluw ndache’ machiegni.—1 Pet. 2:21.
2. Ang’o mabiro konyowa mondo wanyis ji hera kaka ma Kristo nonyiso?
2 Nyis Ji Hera: Hero ji ema ne ojiwo Yesu. (Mari. 6:30-34) Ji mathoth e alwora mwadakie “neno rem” kendo nigi dwaro maduong’ ahinya mar yudo adiera. (Rumi 8:22) Kwaparo kaka gin kama lich kendo kaka Jehova dewogi kuom hera biro jiwowa mondo wasik kwalendo. (2 Pet. 3:9) E wi mano, ji biro bedo moikore mar winjo ka gifwenyo ni wadewogi kuom adier.
3. Gin thuolo mage ma Yesu ne olendoe ne jomoko?
3 Wuo Gi Ji E Kinde Duto: Yesu nokawo thuolo kinde duto mondo oland wach maber ni jomoko. (Math. 4:23; 9:9; Joha. 4:7-10) E yo machalo kamano, wabende wadwaro ikore mondo wawuo kuom adiera e seche mwatiyo tijewa mapile. Jomoko keto Muma kod bugegi machiegni mondo mi gitim neno kuondegi mag tich, e skul, seche ma gidhi wuoth kod seche ma gidhi nyiewo gik moko, kaachiel gi thuolo mamoko.
4. Ere kaka wanyalo keto Pinyruoth obed gima duong’ ma walando?
4 Wach Maduong’ Obed Pinyruoth: Wach maber mar Pinyruoth e gima duong’ ma Yesu ne olendo kuome. (Luka 4:43) Kata obedo ni kamoro ok wabi wuoyo kuom Pinyruoth kanyo gi kanyo kata wache moriere, waketo e paro ni onego wakony ng’at mwalendoneno mondo one ni Pinyruoth en gima dwarore. Kata seche ma wamule weche maricho madhi nyime e piny, manyiso ni wadak e ndalo giko, gima duong’ en “kelo weche mabeyo.”—Rumi 10:15.
5. Mondo walend e yo molony, Muma nyaka kony e yo mane?
5 Konyri Gi Wach Nyasaye: Yesu nokonyore gi Ndiko e tij lendo kinde duto. Ok nopuonjo gige owuon. (Joha. 7:16, 18) Nopuonjore Wach Nyasaye kendo tiyo kode e ngimane mondo ogeng’go tem mar Satan. (Math. 4:1-4) Mondo mi wapuonj jomoko e yo molony, nyaka wasom Muma pile kendo tiyo gi puonjne wawegi. (Rumi 2:21) E seche ma wadwoko penjo e tijwa mar lendo, onego waler kaka Muma siro puonj mwachiwo kendo kanyalore to wasom moriere kowuok e Muma. Wadwaro ni mondo ng’at mwalendone one ni ok waland ne ji pachwa wawegi to ni wapuonjo pach Nyasaye.
6. Ang’o ma Yesu notimo mondo ochop e chuny jowinjone?
6 Chopi E Chuny Ji Gi Puonjni: “Pok ng’ato owuoyo ngang’ kaka ng’atni.” (Joha. 7:46) Mano e kaka jotich moko nowuoyo kuom Yesu kane jodolo madongo gi jo Farisai openjogi gima omiyo ok ne gimake. Kar chiwo achiwa paro moting’o adiera, Yesu nopuonjo e yo ma ne chopo e chuny joma ne opuonjo. (Luka 24:32) Nokonyore gi ngero manyiso gik matimore pile mondo mi ji owinj tiend gik ma ne opuonjo. (Math. 13:34) Yesu ok nopuonjo jowinjone gik mathoth ma miyo gijok. (Joha. 16:12) Ok noywayo pach ji kuome owuon, kar timo kamano notero pachgi kuom Jehova. Mana kaka Yesu, wanyalo mana bedo jopuonj molony ‘kwarito weche mwapuonjo.’—1 Timo. 4:16.
7. Ang’o momiyo Yesu ne onano e tij lendo?
7 Nan Kata Iromo Gi Joma Ng’ich Ng’ich Kata Makwedo: Kata bed ni Yesu notimo honni madongo, ji mathoth ne ok ochikone itgi. (Luka 10:13) Kata mana joodgi Yesu owuon ne paro ni “neko omake.” (Mari. 3:21) Kata kamano, Yesu to ne osiko konano. Nosiko ka en gi paro maber nikech ne oonge kiawa kata matin ni ne en gi adiera mamiyo ji bedo thuolo. (Joha. 8:32) Kuom kony ma Jehova chiwo, wabende watemo mondo kik waol.—2 Kor. 4:1.
8, 9. Ere kaka wanyalo luwo ndach Yesu korka wach chiwruok nikech wach maber?
8 Tim Chiwruok Madwarore Mondo Iti Tij Lendo E Thuolo Malach: Yesu ne ok oluwo gik ringruok mondo oti tij lendo. (Math. 8:20) Nolendo ma ok ool, kamoro kata mana nyaka seche modeko. (Mari. 6:35, 36) Yesu nong’eyo ni ne en gi kinde matin mar tiyo tijno. Bedo ni “ndalo modong’ nok,” wabende onego wachiwre wawegi kuom thuolowa, tekowa, kod mwanduwa e luwo ndach Yesu.—1 Kor. 7:29-31.
9 Jokristo mokwongo ne gin jotich molony nikech ne gipuonjre kuom Yesu. (Tich 4:13) Wan bende wanyalo chopo tij lendo duto momiwa kwaluwo ranyisi mar Jatich Nyasaye maduong’ie moloyo mosebetie.—2 Timo. 4:5.