“Rwakuru Lota Kuomu”
1 E piny mopong’ gi weche mothung’o ji kod makelo parruok, wanwang’o yueyo mana ka warwako gwel ma Yesu gwelowago mondo mi wayud yueyo kadwayie rwako lote kuomwa. (Math. 11:29, 30) Wach mar rwako lodi mar timo japuonjre ok en mana gima tek kende to okelo kuwe bende e chuny. Oriwo lando wach maber mar Pinyruoth kendo konyo jomoko mondo oyud kuwe e chunygi kaachiel kodwa e bwo lot Yesu mayom.—Math. 24:14; 28:19, 20.
2 Kuwe Mayudore Kuom Tiyo Tij Lendo: Yesu ne ok okwayo jopuonjrene mondo oting’ ting’gi ka gimede mar Yesu bende. Nokwayogi mondo giwil ting’gi mapek kod mare mayot. Parruok kod bedo ma onge geno mag pinyni koro ok hingwa; bende ok wati matek mana ni mwandu ma ok nyal gen. (Luka 21:34; 1 Timo. 6:17) Kata obedo ni wadich kendo pile nyaka wati mondo mi wayud gik mochuno ahinya mag ngima, gima duong’ ahinya e ngimawa en lamo Nyasaye. (Math. 6:33) Kinde duto wabiro yudo ni tij lendo kelo kuwe, to ok opek, ka wasiko gi paro maber kuom gima duong’ie moloyo.—Fili. 1:10.
3 Kaka dhano, wahero wuoyo kuom gima moro chunywa. (Luka 6:45) Gima moro chuny Jokristo duto en Jehova kod gweth ma osesingo mag Pinyruoth. Omiyo, mano kaka en gima kelo kuwe kwawuoyo kuom “weche mabeyo” makelo gik mabeyo kendo weyo tenge parruok ma pile seche mwalendo! (Rumi 10:15) En adier ni kaka wamedo timo gimoro e kaka wamedo bedo molony kendo medo yudo mor. Kuom mano, kawo kinde mathoth e tij lendo kwanyalo, biro kelonwa yueyo momedore. Mano kaka en gima jiwowa ka jogo mwalendonigi rwako wach! (Tich 15:3) Kata ka wanwang’o joma ok dwa winjo kata makwedo gik mwawacho, tij lendo biro kelonwa kuwe mar bedo e winjruok gi Nyasaye ka waketo e paro ni kinda mwatimo miyo Jehova mor kendo ni gwethne biro kelo weche mabeyo.—Tich 5:41; 1 Kor. 3:9.
4 Kuom yie gwel ma Yesu gwelowago, wanwang’o mor e tiyo kaachiel kode kaka Joneno mag Jehova. (Isa. 43:10; Fwe. 1:5) Onge gima nyalo kelonwa yueyo maloyo mano!