Be Joodi Ikore mar Tony?
1 Weche ma ne okor e Muma ma osechopo chiwo ranyisi manyiso ratiro ni giko mar piny marachni okayo machiegni ahinya. Sani wadak e kinde mag chandruok machalre ahinya gi kinde ma ne nitie kapok Ataro ochopo. (Math. 24:37-39) Noa ne otony e kethruok mar piny machonno nikech “nowuotho gi Nyasaye.” (Chak. 6:9) Nyaka bedni Noa ne opuonjo joode yore mag Jehova nikech gin bende ne gitony. Wanyalo timo kaka Noa ne otimo e yo mane mondo waikre mar tony kaka joot e giko mar piny marachni?
2 Jayal Wach Makare: Noa ne onano kuom higini madirom 40 kata 50 kaka “jayal wach makare.” (2 Pet. 2:5) Joma ne odak machiegni kode, bedni ne ichikogi kata ne ok chikgi e timo kamano gi malaike ma ne olokore dhano, nyaka bedni ne gijaro tij lendo ma ne otimono. Tijwa mar lendo kinde mang’eny ichayo kendo ijaro, manyiso ni giko pinyni chiegni. (2 Pet. 3:3, 4) Kata kamano, mopogore gi ji ma ne odak kinde mag Noa, ji mang’eny rwako kinda marwa kendo ‘gichopo’ e lamo mar Jehova. (Isa. 2:2) Wabiro ‘resore, kendo reso jogo ma winjo weche ma wapuonjo’ mana ka wanano. (1 Timo. 4:16) Mano kaka en gima dwarore mondo jonyuol opuonj nyithindgi gimomiyo tij lendo onego otim mapiyo ahinya ka gitimo kamano e wach koda e tim!—2 Timo. 4:2.
3 Notimo “Kamano”: Mondo Noa gi joode otony, ne dwarore mondo giluw machiegni ahinya gik ma Jehova ne nyisogi. (Gen. 6:22) Wan bende dwarore ahinya mondo e kindegi wabed ‘moikore winjo wach’ moa e Muma kod moa kuom jatichno mogen. (Jak. 3:17) Wuoro moro ne otiyo gi paro ma riwruok mar oganda Jehova chiwo. Kuom ranyisi, ne otayo puonjruok mar Muma gi joode juma ka juma kendo ne otero joode e tij lendo giko juma ka giko juma mana kaka ijiwowa mondo watim. Ne otimo matek mondo kuom nyithinde odhi gi nyathi achiel e tij lendo juma ka juma. Kinda mare e timo “kamano” ne omulo chuny nyithinde ahinya, kendo kargi duto ji auchiel ne gidongo ma gibedo jotich Jehova mochung’ motegno.
4 Giko pinyni nobi apoya. (Luka 12:40) Kuom timo kaka Noa ne otimo kendo bedo gi yie mabiro resowa, onge kiawa ni wan kaachiel gi joodwa wabiro ikore mar tony!—Hibr. 11:7.