Puonj Jomoko Hero Jehova
1. Ang’o ma ywayo jomoko ir Jehova?
1 Be inyalo paro kinde ma ne ikwongo winjo wach Jehova? En ang’o ma ne oywayi ire? Ji mathoth ma chunygi ni kare biro wachoni ni ne oywagi machiegni gi Jachwechwa kane gipuonjore kuom kite ma ok nyal pim gi moro amora, to moloyo ng’wono kod herane.—1 Joh. 4:8.
2, 3. Ere kaka wanyalo tiyo gi bug Muma Puonjo e konyo jopuonjre mag Muma mondo otim dongruok e hero Jehova?
2 “Jali E Nyasachwa”: Bug Muma Puonjo nyiso e yo matut hera ma Jehova nigo kendo gimomiyo dwarore bedo gi winjruok kode. Ere kaka wanyalo tiyo gi bugni e puonjo jomoko mondo otim dongruok e hero Nyasaye? Seche ma wawuoyo kuom wach manyien, wanyalo penjogi penjo mamiyo giparo, machalo kaka: “Adierani nyiso ang’o kuom Jehova?” kata “Wachni nyiso e yo mane ni Jehova e Wuoro maberie mogik ma ng’ato ang’ata nyalo dwaro bedogo?” Puonjo e yo machalo kama nyalo konyo japuonjre chako ngima mar bedo gi winjruok mosiko gi Jehova.
3 Ka wakonyo jopuonjre mag Muma fwenyo ni nwang’o ng’eyo mar Nyasaye makende mar adier kendo ma ngima en thuolo makende, gibiro yie ni “jali e Nyasachwa” mana kaka yudore e weche ma ne Isaiah owacho. (Isa. 25:9) Seche ma walero Wach Nyasaye, onego wajiw kaka ibiro gwedh dhano ka ichopo dwaro mag Jehova kokalo kuom sirkande e bwo Kristo Yesu.—Isa. 9:6, 7.
4, 5. Hero Jehova tiende en ang’o?
4 Gik Manyiso Hera Kuom Jehova: Wang’eyo ni hero Jehova gi chuny duto, ich, kod paro duto oriwo weche mathoth maloyo mana kaka ng’ato winjo e chunye kuom Nyasaye. Nyaka warwak kendo luwo kaka oparo. (Zab. 97:10) Hero Nyasaye nenore kuom winjo chikene ma ok wawe kendo dhi nyime gi bedo ‘jo maler e ngima, ka waluoro Nyasaye’ kata bed mana ni waromo gi tem kod akwede.—2 Pet. 3:11; 2 Joh. 6.
5 Timo dwach Nyasaye nikech wahere en gima kelo mor. (Zab. 40:8) Japuonjre mar Muma nyaka ng’e ni chike Nyasaye olosi nikech Odwaro ni jotichne obed gi ber mosiko. (Rapar 10:12, 13) Kuom dak kaluwore gi kaka Jehova taye, ng’ato nyiso ni ogoyo erokamano ahinya kuom tije madongo duto mag Jehova. Kony japuonjre mondo ong’e ni wuotho e yore makare mag Jehova biro geng’o ne ng’ato chandruok gi lit.
6. Gweth mage ma ng’ato nyalo yudo nikech hero Jehova?
6 Gweth ma Joma Ohero Nyasaye Yudo: Jehova dewo ahinya joma bolore ma ohere, kendo oelo nigi “gik matut mag Nyasaye.” (1 Kor. 2:9, 10) Bedo gi ng’eyo machalo kamano kuom dwaro mag Jehova, miyo ndalo mabiro nenore negi maler kendo gibedo gi geno. (Yer. 29:11) Jogo mohero Jehova nwang’o ng’wono mare makende. (Wuok 20:6) Gikawo ka gima duong’ geno mar yudo ngima mochwere nikech hera maduong’ ma Nyasaye nyisogi.—Joh. 3:16.
7. Iwinjo nade kuom puonjo jomoko mondo oher Jehova?
7 Kaka wamedo ng’eyo Wuonwa manie polo, e kaka wamedo bedo gi gik ma wanyalo nyiso jomamoko. (Math. 13:52) Donge puonjo jomoko en thuolo makende ma ok nyal pim gi moro, to moloyo, puonjo nyithindwa mondo oher Jehova? (Rapar 6:5-7) Wan kaachiel gi jopuonjrewa mag Muma, wadhiuru nyime ka wasiko wachiwo pak kaka wamedo neno ‘ber maduong’’ mar Jehova.—Zab. 145:7.