Inyalo Bedo Japuonj!
1. En thuolo mane makende ma jalendo ka jalendo nigo?
1 Achiel kuom gweth mabeyo ahinya mayudore e tij lendo en puonjo ng’ato adiera. Neno ka ng’atno rwako wach Pinyruoth, kendo konye sudo machiegni gi Jaloch mar piny mangima, en gima onego wakaw kaka gweth maduong’. (Jak. 4:8) Puonjo ng’at madwaro ahinya ng’eyo adiera kendo neno ka ochako timo lokruok e kit ngimane, e yo monenogo gik moko, koda e timbene, onego obed tich ma jalendo ka jalendo mar Pinyruoth gombo timo.—Math. 28:19, 20.
2. Ang’o manyalo miyo jomoko luoro mar timo puonjruok mar Muma gi ji, kendo en ang’o mabiro konyogi loyo luorono?
2 Gen Kuom Jehova: E kinde mosekalo, jotich Jehova ne neno ni gionge nyalo mar chopo ote ma Jehova nomiyogi. Musa, Jeremia, Amos, koda joma moko mane gin ji ajia, ne ogeno kuom Jehova Nyasaye, kendo mano ne omiyo giloyo luoro moro amora ma ne gin-go kendo ne gichopo tich ma ne dwarore ahinyani. (Wuok 4:10-12; Yer. 1:6, 7; Amos 7:14, 15) Jaote Paulo bende ne ‘otimo chir.’ Ne otimo kamano e yo mane? Olero ni ne otimo kamano “kuom Nyasachwa.” (1 Thes. 2:2) Ee, waduto wanyalo keto geno kuom Jehova mondo okonywa, kendo omiwa teko koda rieko madwarore mondo wapuonj ji Muma e yo makonyogi rwako adiera.—Isa. 41:10; 1 Kor. 1:26, 27; 1 Pet. 4:11.
3, 4. En tiegruok mane mabiro konyowa puonjo Wach Nyasaye?
3 Rwako Tiegruok Mwayudo: Japuonjwa Maduong’ ma en Jehova Nyasaye, tiegowa kokalo kuom chenro mapile mar puonjruok Muma mondo wabed molony kaka jopuonj. (Isa. 54:13; 2 Tim. 3:16, 17) Rwak tiegruok mwayudoni ka itiyo gi thuolo duto mayudore mag puonjruok mondo omi imed ng’eyo Ndiko, kendo imed timo dongruok e puonjo ji adiera mag Muma. Kata obedo ni Chokruok mar Skul mar Tij Nyasaye koda mar Tijwa konyowa moloyo e timo kamano, chokruoge duto tiegowa e puonjo ji ka watiyo gi Wach Nyasaye.
4 Tem ahinya mondo ipuonjri yore mayot minyalo tiyogo e puonjo adiera matut. Buk mar Shule ya Huduma, ite mar 227, lero kama: “Nyaka in iwuon ikuong iwinj maler tiend wach ma ipuonjo eka inyalo konyo jomoko winjo tiend wachno.” Chiwo paro sama wan e chokruok, konyowa keto pachwa e weche mwanyalo tiyogo e ndalo mabiro. Omiyo, tim ikruok maber ne chokruok, kendo mano biro miyo lonyni e puonjo omedre.
5. En tiegruok mane machielo ma yudore e kanyakla manyalo konyowa timo dongruok kaka jopuonj?
5 Onge kiawa ni kane gichako bedo jolendo, Jokristo mang’eny ne opuonjore kuom jal ma ne gilendogo kanyachiel sama ne gin e tij timo ji jopuonjre. (Luka 10:1) Ka nyalore, inyalo dhi e tij puonjo ji Muma ka in kanyachiel gi jolendo molony, moriwo jo painia, jodong-kanyakla, kod jorit malworo. Puonjri kuom kaka gilero adiera mag Ndiko ka gitiyo gi ranyisi mayot koda yore mopogore opogore mag puonjo mayudore e buge mwatiyogo. Nyisgi mondo gimiyi paro manyalo konyi bedo japuonj molony. (Nge. 1:5; 27:17) Nyis ni imor gi tiegruok ma kamano nikech kuom adier Nyasaye ema chiwe.—2 Kor. 3:5.
6. En ang’o madwarore ahinya mondo omi ibed japuonj mar Wach Nyasaye?
6 Gen kuom Jehova, kendo iyud kony kokalo kuom tiegruok mochiwo. Lam mondo itim dongruok. (Zab. 25:4, 5) In bende inyalo yudo mor mar konyo ng’at machielo mondo obed kaka in, tiende ni japuonj mar Wach Nyasaye!