‘Tim Duto Nikech Wach Maber’
1. Jalendo mar Pinyruoth oikore mar timo ang’o ne jomoko, to ang’o momiyo oikore mar timo kamano?
1 Jaote Paulo ne okawo tich mar lando wach maber ne jomoko kaka ting’ maduong’ ma ne nyaka ochop. (1 Kor. 9:16, 19, 23) Kamano bende, chuny ma wan-go mar dewo ji ka wadwaro ni giyud ber manyaka chieng’, miyo watimo kinda mar landonegi wach maber.
2. Sama walendo, gin lokruok mage ma waikore timo, kendo ang’o momiyo waikore timo kamano?
2 Lend e Seche Koda e Kuonde ma Ji Nyalo Yudore: Jalupo molony ok lup mana kuonde mamore kata e seche mamore, to olupo kama rech nyalo yudoree koda e seche ma rech mang’eny yudoree. Wan bende kaka “joywa ji,” nyalo dwarore ni watim lokruok moko mondo omi wayud ji e alworawa eka wabed gi thuolo maber chuth mar choko jogo ma iporo gi “rech ngeche duto.” (Math. 4:19; 13:47) Be wanyalo tiyo gi seche mag odhiambo e limo ji e utegi kata tiyo gi seche mag okinyi mondo walend e yore? Chenro mar Paulo ne en ‘hulo wach maber’ chuth, kendo ne otiyo gi thuolo mowinjore e lando wach maber.—Tich 17:17; 20:20, 24.
3, 4. Gin lokruok mage mwanyalo timo ka wan e tijwa mar lendo, kendo wanyalo yudo nyak mage?
3 Tigi Yore Mopogore Opogore mag Lendo Kaluwore gi Chal mar Ji: Kinde ka kinde jolupo loko yore ma gitiyogo e mako rech mondo omi gimak kit rech moro ma gidwaro. Ere kaka wanyalo lando wach maber e yo manyalo miyo ji manie alworawa orwak wach? Nyaka wati gi rieko e chako wuoyo kuom wach moro manie pach ji manie alworawa kendo chiko itwa maber sama gichiwo paro kuom wachno. (Jak. 1:19) Wanyalo penjogi paro ma gin-go kuom wach moro mondo omi giwuo kodwa. (Nge. 20:5) Timo kamano biro miyo watim lokruok e yo mwalendogo, kendo lando wach maber e yo mamulo ngima ng’ato ka ng’ato. Paulo nobedo “ngeche duto ni ji duto.” (1 Kor. 9:22) Timo lokruok e yo mwalendogo en gima dwarore mondo omi wach mwalando ochop ei chuny ng’ato.
4 Mano kaka en mor maduong’ lando ne ji “weche mokou mabeyo”! (Isa. 52:7) Weuru mondo ‘watim magi duto nikech wach maber’ mondo omi walend ne ji mang’eny kaka nyalore.—1 Kor. 9:23.