Lendo En Yo Mwanyisogo Herawa Kuom Nyasaye
1. Hera ma Yesu ne nigo kuom Nyasaye nomiyo otimo ang’o?
1 Hera ema ne omiyo Yesu otiyo tije mar lendo. Gimoro amora ma Yesu notimo e tije mar lendo ne onyiso maler ni ne ohero Jehova. Yesu nowacho kama: “Mondo piny ong’e ni ahero Wuoro, kendo ni atimo kaka Wuoro nochika.” (Joh. 14:31) Wan kaka jogo maluwo ndach Yesu, wan gi thuolo mar nyiso Nyasaye hera matut kuom tijwa mar lendo.—Math. 22:37; Efe. 5:1, 2.
2. Ere kaka hero Jehova konyowa e tijwa mar lendo?
2 “Nyingi Mondo Obed Maler”: Ka watimo kinda mar tiyo gi thuolo moro amora mondo wawuo gi jomoko kuom Jehova kaachiel gi chenro mar Pinyruodhe, wanyiso herawa kuom Nyasaye kendo wariwo lwedo wach miyo nyinge mondo obed maler. (Zab. 83:18; Ezek. 36:23; Math. 6:9) Mana kaka Yesu notimo e tije mar lendo, tijwa mar lendo bende en yo mwanyisogo gombowa matut mar neno ka nying Jehova bedo maler kendo dwarone timore.—Math. 26:39.
3. Hero Jehova konyowa nade loyo gik manyalo monowa tiyo tij lendo?
3 Hera Miyo Waloyo Gik Manyalo Geng’onwa: Hero Jehova miyo waloyo gimoro amora manyalo monowa lendo. (1 Kor. 13:4, 7) Nitie gik mang’eny ma Yesu noromogo ma ne nyalo mone tiyo tije mar lendo. Kata kamano, kane oromo gi gik ma kamago, herane matut kod gombone mar timo dwach Jehova nomiyo oloyo gigo. (Mari. 3:21; 1 Pet. 2:18-23) Wan bende waromo gi chandruoge mang’eny, to herawa kuom Nyasaye ema nyalo miyo walogi. Ka waluwo machiegni ranyisi mar Kristo, wanyalo bedo gi chir kendo onge gima nyalo geng’onwa tiyo tijwa mar lendo. Kata obedo ni romo gi akwede mawuok kuom joodwa, tuwo, bedo moti, kata romo gi joma ok dwar winjo wach mwalando nyalo kelonwa chandruok moko, gik ma kamago ok monwa nyiso hera ma wan-go kuom Jehova kuom tiyo tijwa mar lendo kar nyalowa duto.
4. Hera mwaherogo Jehova miyowa thuolo mar timo ang’o?
4 Hera nigi teko, kendo wan gi gweth mar bedo gi nyalo mar nyiso kaka wahero Nyasaye gi chunywa duto e tijwa mar lendo. (1 Kor. 13:13) Kaka wamedo sudo machiegni gi kinde ma nying Jehova ibiro ket mondo obed maler ndalo duto, weuru ‘herawa omedre mathoth ahinya.’—Fili. 1:9; Math. 22:36-38.