‘Chiw Chunyi’ Mondo Ikony Jopuonjreni
1. Ang’o madwarore e konyo japuonjre Muma?
1 Konyo japuonjre Muma ma chop kama ochiwore mondo oti ne Nyasaye oriwo gik mang’eny, to ok mana timo puonjruok mar Muma kode pile. Jaote Paulo ne oporo winjruokne gi joma nopuonjo kod japidi madembo nyathine owuon. Wan bende wamor chiwo “chunywa” mondo wakony jopuonjrewa otim dongruok e winjruokgi gi Nyasaye.—1 Thes. 2:7-9.
2. Ang’o momiyo onego wanyis ni wadewo jopuonjrewa gadier, to ere kaka inyalo tim mano?
2 Nyis ni Idewogi Gadier: Kaka japuonjre Muma medo tiyo gi gik ma opuonjore, chunye biro jiwe mondo owe bedo gi osiepe maok odak kaluwore gi puonj mag Muma. (1 Pet. 4:4) Joode nyalo kwede. (Math. 10:34-36) Wanyalo konye e loyo kuyo monyalo yudo ka wanyiso ni wadewe gadier. Owadwa moro ma jamisonari chiwo paroni: “Kik iwuog mapiyo bang’ ka usetieko puonjruok. Ka owinjore, bed matin kendo uwuo kuom kinde.” Ikri kinde duto mar chiwo kony ma japuonjreni nyalo dwaro. Kuom ranyisi, be inyalo goyone simo kata lime seche motuwo? Be inyalo bet gi japuonjreni e chokruoge kendo konye e rito nyithinde e chokruok, ka mano dwarore?
3. Ere kaka wanyalo konyo japuonjrewa mondo oyud jip mowuok kuom kanyakla?
3 Kaka Kanyakla Nyalo Konyo: Kapo ni ilendo machiegni gi kama japuonjreni odakie, inyalo rawo mondo imose kendo iyange ne joma ulendogo. Ka nyalore, kinde ka kinde gwel jolendo mopogore opogore, moriwo nyaka jodong-kanyakla mondo odhi kodi timo puonjruok gi japuonjreni. Mapiyo bang’ chako puonjruok Muma gi ng’ato, jiwe mondo obi e chokruoge mag kanyakla e Od Romo. Mano biro miyo obed gi tudruok maber gi joma nie kanyakla mabiro bedo joode e yie.—Mari. 10:29, 30; Hib. 10:24, 25.
4. Ere kaka inyalo gwedh kinda mwatimo?
4 Janyuol matimo kinda e konyo nyithinde obed gi winjruok maber gi Nyasaye yudo mor mogundho seche ma nyithindogo chung’ motegno e tiyo ne Jehova kendo wuotho e adiera. (3 Joh. 4) Wanyalo yudo mor ma kamano ka wachiwo chunywa mondo wakony jopuonjrewa mag Muma.