Be Alendo e Okang’ Moromo?
1. Parruok mage manyalo chando kata Jakristo motegno e yie?
1 Be isepenjori penjono? Nyalo bet ni okang’ milendoe osedok chien nikech tuwo, bedo moti, kata ting’ momedore mar rito joot, gigi nyalo nyoso chunyi. Nyaminwa moro ma nigi nyithindo adek nondiko ni seche moko owinjo malit ahinya nikech otiyo gi seche kod teko mang’eny e chopo dwaro mag joode moloyo thuolo motiyogo e tij lendo. Ang’o mabiro konyowa neno gik moko e yo mowinjore?
2. Ang’o ma Jehova geno ni wanyalo timo?
2 Gima Jehova Dwaro ni Mondo Watim: Onge kiawa ni waduto wagombo ahinya lendo e okang’ momedore. Kata kamano, pogruok hinyo bet e kind gima wagombo timo kod ma wanyalo timo gadier. Bedo ni wagombo lendo e okang’ momedore nyiso ni wakawo tijni mapek. Kik wiwa wil ni Jehova ong’eyo gik mwanyalo chopo kendo ok ogen ni wabiro timo gik mohingo nyalowa. (Zab. 103:13, 14) Ang’o modwaro ni mondo watim? Odwaro ni watine gi chunywa duto.—Kol. 3:23.
3. Ere kaka wanyalo nono kinda mwatimo e tij lendo?
3 Ang’o mabiro konyowa ng’eyo gik mwanyalo chopo kuom adier? Wanyalo kwayo Jehova mondo okonywa ng’eyo chal marwa e yo malong’o. (Zab. 26:2) Ka wan gi osiepwa ma Jakristo mwageno, mong’ewa maber kendo maok luor nyisowa kuonde monego watimie dongruok bende nyalo konyowa. (Nge. 27:9) Par bende ni nikech ngima lokore kinde ka kinde, ber mondo wanonre pile.—Efe. 5:10.
4. Ere kaka onego wane gik miparonwa kuom tij lendo kowuok e Muma?
4 Kaka Onego Wane Gik Miparonwa: E ng’wech, nitie joma jiwo joma ringo mondo kik giol. Gitimo mano nikech gidwaro ni joma ringogo oyomb, to ok nyoso chunygi. Kamano bende, jip mawuok e Muma kaachiel gi gik miparonwa e chokruogewa kod bugewa konyowa ‘yalo wach Nyasaye’ kendo dhi nyime ka walendo, gigi ok nyis ni kinda mwatimo ok oromo. (2 Tim. 4:2) Wan gadier ni ka wadhi nyime timo duto mwanyalo e tij Nyasaye, wi Jehova ok bi wil gi ‘tijwa gi hera mwanyiso.’—Hib. 6:10.