“Ler Maru Mondo Orieny”
1. Wan gi thuolo mar gwelo ji e ang’o?
1 Chakre wuok chieng’ nyaka yuso piny, ler mwaneno kelo pak ne Jehova Nyasaye. Kata kamano, Yesu nogwelo jopuonjrene mondo obed gi kit ler machielo, tiende ni, “ler mar ngima.” (Joh. 8:12) Bedo gi kit lerni en mich maduong’ ahinya kendo oriwo ting’ monego okaw mapek. Yesu nochiwo puonj kama: “Ler maru mondo orieny e nyim ji,” eka mondo okony jomoko. (Math. 5:16) E piny motimo mudho korka ng’eyo wach Nyasaye, nyaka wagwel ji e lerni kendo ma e kinde matimo mano dwarore moloyo! Ere kaka wanyalo miyo ler marwa orieny kaka Kristo notimo?
2. Ere kaka Yesu nonyiso ber mar wuoyo gi jomoko e wi ler mar adiera?
2 Kuom Lendo: Yesu notiyo gi sechene, tekone kod gik mamoko mondo omi ji oyud ler mar adiera e utegi, e lela, e wi gode kod kuonde ma ji ne nyalo yudore. Nong’eyo ni ler mar adiera ne nyalo kelo ne ji ber mosiko. (Joh. 12:46) Mondo omi olend ne ji mang’eny, Yesu notiego jopuonjrene mondo obed “ler mar piny.” (Math. 5:14) Ler margi rieny kuom timo gik mabeyo ne dhano wetegi kendo kuom nyisogi adiera mar wach Nyasaye.
3. Ere kaka wanyalo nyiso ni wakawo mapek ler mar adiera?
3 Jo Nyasaye kawo mapek ting’ mar ‘wuotho ka nyithind ler,’ kendo gilendo kamoro amora ma ji yudore. (Efe. 5:8) Kuom somo Muma kata bugewa moko mag Jokristo kama ji nyalo nenowa seche ma wanie skul kata e tich, nyalo miyowa thuolo mar wuoyo gi ji e wi Ndiko. Kuom tiyo gi yorno, nyaminwa moro nochako puonjruok mar Muma kendo chiwo buge 12 ne joklasgi!
4. Ere kaka ‘ler marwa marieny’ oriwo bedo gi timbe mabeyo?
4 Kuom Timbe Mabeyo: Ler marwa bende rieny kuom timbewa mapile. (Efe. 5:9) Timbewa mag Jokristo ma ji neno chiwo thuolo mar wuoyo gi jomoko e wi adiera mag Muma kuonde ma watiyoe, e skul kod kuonde mamoko ma ji nenowae. (1 Pet. 2:12) Kuom ranyisi, wuowi moro ma jahigini abich ma timbene beyo nomoro japuonjne mi oluongo jonyuolne. Japuonjno nowachonegi kama, “Pok aneno nyathi ma timbene beyo kaka nyathiuni!” En adier ni tijwa mar lendo kaachiel gi timbewa mabeyo ywayo ji e “ler mar ngima” kendo kelo pak ne Nyasachwa.