Tijwa mar Lendo Dwaro Horuok
1. Ere kaka Jehova osebedo ka hore ne dhano?
1 Horuok en kido maduong’ ma Jehova nyiso kuom gik motimo ne dhano. (Wuok 34:6; Zab. 106:41-45; 2 Pet. 3:9) Achiel kuom yore mosenyisogo kidono nenore e tijwa mar lando Pinyruoth mitimo e piny mangima. Kuom higini madirom 2,000, Jehova osebedo ka oywayo jogo ma chunygi tir mondo obed gi winjruok machiegni kode. (Joh. 6:44) Ere kaka wanyalo hore kaka Jehova e tijwa mar lendo?
2. Ere kaka wanyalo nyiso horuok ka walendo e alworawa?
2 Lendo mar Ot ka Ot: Waluwo ranyisi mar Jehova mar horuok kuom lendo ‘maok wawe’ e alwora ma ji ok dwar winjo wach mwalando. (Tich 5:42) Wanano seche ma ji ok rwak wach, ma gijarowa kata sandowa ka wan e tijwa mar lendo. (Mari. 13:12, 13) Bende wahore seche mwatimo kinda mar olo pi ne kodhi mag adiera mwasepidho e chuny ji kata obedo ni samoro jogo ok yudre e utegi.
3. Ang’o momiyo horuok dwarore e lendo mar dok timo limbe kod tayo puonjruok mag Muma?
3 Jopuonjre Muma: Bang’ pidho kodhi dwarore ni wahore. Wanyalo rite e yore mang’eny, kata kamano ok wanyal chore mondo odong mapiyo. (Jak. 5:7) Kamano bende, dongruok e wach Nyasaye en gima timore mosmos. (Mari. 4:28) Nyalo bedo matek ne joma wapuonjrego weyo puonj moko mag dinde mag miriambo kata timbe maok winjre gi ndiko. Ok onego watem thung’o jopuonjrewa mondo otim dongruok mapiyo. Onego wahore mondo wami roho mar Nyasaye thuolo mar konyo japuonjre timo dongruok koa e chunye.—1 Kor. 3:6, 7.
4. Ere kaka horuok nyalo konyowa lendo e yo maber ne wedewa maok joneno?
4 Wede Maok Joneno: Kata obedo ni wagombo ahinya ni wedewa opuonjre adiera, wahore kuom rito nyaka e kinde mowinjore lendonegie, kendo watimo kamano maok wanyisogi weche mang’eny ahinya. (Ekl. 3:1, 7) Ka podi warito kindeno, wabedo gi timbe mabeyo kendo waikore nyisogi yiewa kwatimo kamano gi muolo kod luoro. (1 Pet. 3:1, 15, 16) Kuom adier, ka wahore e tijwa mar lendo wabiro yudo nyak ahinya kendo moro Wuonwa me polo.