‘Kech’ Jomoko Gadier
1. En ang’o ma ji dwaro ahinya e kindegi?
1 Ma e kinde madwarore ni okech ji moloyo kinde moro amora mosekalo. Gik maricho mamedo timore e piny miyo ji bedo maonge mor, gikuyo kendo bedo maonge geno. Dwarore ni ji tara gi tara oyud kony, kendo wan kaka Jokristo wan gi thuolo maber ahinya mar nyiso ni wadewo joma nie alworawa gadier. (Math. 22:39; Gal. 6:10) Ere gima biro nyiso ni wadewogi?
2. Yo maber mwanyalo nyisogo ni wakecho jomoko en mane?
2 Tich Manyiso Kech: Nyasaye kende ema nyalo miyowa hoch madier kendo masiko. (2 Kor. 1:3, 4) Jehova jiwowa mondo waluw ranyisine kuom bedo joma ‘kechore,’ kendo osemiyowa migawo mar tero wach maber mar Pinyruoth ne joma nie alworawa. (1 Pet. 3:8) Ka waketo chunywa duto e tijni wabiro bedo gi thuolo mar hoyo “jogo maneno masira e chunygi,” nikech joma chandore nyalo geno mana kuom Pinyruodh Nyasaye kende. (Isa. 61:1) Nikech okecho joge, Jehova biro tieko richo e kinde mokayo machiegni kendo kelo piny manyien makare.—2 Pet. 3:13.
3. Ere kaka wanyalo bedo gi paro kaka mar Yesu kuom jomoko?
3 Bed gi Paro Kaka mar Yesu Kuom Jomoko: Kata mana e kinde ma Yesu ne lendo ne ji mang’eny kanyachiel, noketo pache kuom ng’ato ka ng’ato. Nong’eyo joma nigi riyo mar yudo wach Nyasaye. Ne gichalo mana rombe maonge jakwath manyalo ritogi. Yesu noneno ne jogo lit ahinya kendo nopuonjogi kohore. (Mari. 6:34) Ka waneno jomoko kaka Yesu nonenogi, wabende wabiro kecho ng’ato ka ng’ato kuomgi. Mae biro nenore e dwol ma wawuoyogo kodgi kod kaka gineno lela wang’wa. Tij lendo biro bedonwa gima duong’ ahinya, kendo weche mwatiyogo biro mulo dwaro mag ji mopogore opogore.—1 Kor. 9:19-23.
4. Ang’o momiyo onego warwakre gi kido mar kecho ji?
4 Oganda maduong’ mar joma oa e pinje duto rwako wach Pinyruoth nikech yo mang’won ma wakechogigo. Ka wamedo rwako kido mar kecho jomoko, wabiro miyo Jehova Nyasachwa duong’ kendo miyo chunye mor.—Kol. 3:12.