Kido Maduong’ie Moloyo ma Dwarore Kuom Japuonj Maber
1.Kido mane maduong’ie moloyo madwarore kuom japuonj maber?
1 En ang’o mamiyo ng’ato bedo japuonj maber mar Muma? Be en somo mar pinyni? Lony ma en-go? Nyalo monyuolego? Kuom adier, en e kido machopo Chik, mafwenyo jolup Yesu, kendo maduong’ie moloyo kuom kido ang’wen madongo mag Jehova. (Joh. 13:35; Gal. 5:14; 1 Joh. 4:8) Kidono en hera. Jopuonj mabeyo bedo johera.
2. Ang’o momiyo dwarore ahinya ni waher ji?
2 Her Ji: Yesu ma en Japuonj Maduong’ nohero ji kendo mano ne miyo gichiko itgi ne wach ma ne olando. (Luka 5:12, 13; Joh. 13:1; 15:13) Ka wadewo ji, wabiro tiyo gi thuolo moro amora e lendo. Sand kata lendo e alwora ma ji ok rwakie wach ok bi monowa dhi nyime. Wabiro dewo gadier jogo ma walendonegi kendo loko yorewa mag lendo kaluwore gi dwaro maggi. Wabiro ikore tiyo gi thuolo moromo kuom japuonjre ka japuonjre mar Muma kendo tiyo gi thuolo moromo e iko chon kama wadhi puonjore gi moro ka moro kuomgi.
3. Hero adiera mag Muma biro konyowa nade e tij lendo?
3 Her Adiera mag Muma: Yesu bende nohero adiera mag Muma kendo ne onenogi mana ka mwandu. (Math. 13:52) Ka wahero adiera, wabiro wuoyo gi ilo, kendo mano nyalo moro jowinjowa. Hera ma kamano biro miyo waket pachwa kuom ber mar wach ma walando kar keto pachwa mana kuom nyawo ma wan-go, kendo mano biro miyo kik wabed maluor ka walendo.
4. Ere kaka wanyalo bedo gi kido mar hera?
4 Bed gi Kido mar Hera: Wanyalo nyago nade kido mar hero ji? Kuom paro matut e wi hera ma Jehova kod Wuode osenyisowa kendo kuom neno kaka ji e alworawa nigi chan mar winjo wach Nyasaye. (Mari. 6:34; 1 Joh. 4:10, 11) Wabiro medo hero adiera mag Muma kuom timo puonjruok marwa wawegi maok wabare kendo paro matut kuom gima wapuonjore. Hera en achiel kuom nyak mar roho. (Gal. 5:22) Omiyo wanyalo kwayo Jehova roho maler, kendo mondo okonywa wamed dongo e hera. (Luka 11:13; 1 Joh. 5:14) Kata obedo ni wasomo ma wagik kanye, wasebudho e adiera maromo nade, kata onyuolwa gi nyalo mage, pod wanyalo bedo jopuonj mag Muma molony ka wan gi hera.