Hela Ariyo ma Nengogi Tin

Achiel kuom yore madongo ma wasirogo weche mag Pinyruoth en chiwo pesa mondo okony e tich mar piny ngima. To nade ka yutowa tin?

Chieng’ moro Yesu noneno chi liel moro modhier e hekalu ka chiwo hela ariyo ma nengogi tin ahinya. Hera ma ne oherogo Jehova nomiyo ochiwo ‘gik ma ne en-go duto ma dokonyorego e ngimane’ kata obedo ni ne en jachan. (Mari. 12:41-44) Gimomiyo Yesu nowuoyo kuom chiwo mar dhakono en nikech Nyasaye noneno chiwoneno ka gima duong’ ahinya. Kamano bende, Jokristo mokwongo ne neno wach golo chiwo kaka migawo makende ahinya. Jokristo modhier kaachiel gi mago momewo ne chiwo kar nyalogi. Jaote Paulo nowuoyo kuom ranyisi ma Jo-Makedonia noketo nikech kata obedo ni ne gin ‘jochan’ ahinya, ne ‘gihombo mondo ginywak tich’ kuom chiwo gi ng’wono.—2 Kor. 8:1-4.

Omiyo ka wanyalo chiwo kata mana ‘hela ariyo ma nengogi tin,’ onego wapar ni chiwo matindo tindo mang’eny nyalo bedo mathoth koriwgi kanyakla. Chiwo ma wagolo kowuok e chunywa biro moro Wuonwa me polo ma jachiwo, nikech “Nyasaye ohero jachiwo mamor.”—2 Kor. 9:7.