Ang’o Manyalo ‘Miyo Ipakri’?
1. Ang’o mamiyowa mor ahinya e giko dwe ka dwe?
1 E giko dwe ka dwe sama ikwayo jolendo duto mondo ochiw ripodegi, ang’o manyalo miyo iwinj maber kata ‘ipakri’? (Gal. 6:4) Bedni wan jopainia makende malendo kuom seche 130, kata jolendo moyienegi chiwo ripot mar dakika 15 dwe ka dwe, waduto onego wamor ni watiyo ne Jehova gi chunywa duto.—Zab. 100:2.
2. Ang’o momiyo onego wachiwre chuth e tiyo ne Jehova?
2 Nikech Jehova e Jaloch mar polo gi piny, dwarore ni wamiye gik mabeyo chuth. (Mal. 1:6) Hera ma waherego ema miyo wachiworene mondo watim dwache. Omiyo, sama odiechieng’ kata dwe orumo, ka wan gadier ni wachiwo gima wakwongo “yudo,” tiende ni watiyo gi thuolowa, tekowa, kod ng’eyo ma wan-go kar nyalowa, wanyalo bedo mamor kata pakore. (Nge. 3:9) To kapo ni chunywa ng’adonwa bura ni ok watim kar nyalowa, onego wamany yore ma wanyalo timogo dongruok e tijwa.—Rumi 2:15.
3. Ang’o momiyo pimruok gi jomamoko ok en gima ber?
3 ‘Kik Ipimri gi Ng’at Machielo’: Nyalo bedo marach ka wapimo nyalowa gi mag jomamoko kata pimore wawegi gi kinde ma ne watiyo matek moloyo. Ngima jalokre. Nyalo ma wan-go opogore opogore. Pimruok gi jomamoko nyalo kelo piem kata nyalo miyo wanenre ka joma nono. (Gal. 5:26; 6:4) Yesu ne ok pim jopuonjrene gi jowetegi. Kar mano, nopwoyogi kaluwore gi nyalo mar ng’ato ka ng’ato kuomgi.—Mari. 14:6-9.
4. Gin puonj mage mabeyo ma wanyalo yudo e ngero ma Yesu nogoyo e wi talanta?
4 E ngero ma Yesu nogoyo e wi talanta, nomi jatich ka jatich talanta kaluwore gi “kaka tekre owuon obet.” (Math. 25:15) Kane ruodhgi oduogo kendo kwayo ripodegi, jotich ma notiyo matek kaluwore gi nyalogi kod chal mar ngimagi noyudo pwoch kendo ne gidonjo e mor mar ruodhgi. (Math. 25:21, 23) Wan bende ka watimo kinda e tijwa mar lando wach Pinyruoth, wanyalo bedo gadier ni Nyasaye biro yie kodwa kendo wabiro yudo gima wanyalo pakorego!