Kony Ji Mondo Owinj Nyasaye
1. Gin brosua mage ma nogol e Chokruog-Distrikt mar “Pinyruodh Nyasaye Mondo Obi!” to ang’o momiyo giber tiyogo?
1 E Chokruog-Distrikt ma ne wiye wacho ni “Pinyruodh Nyasaye Mondo Obi!” ne wayudo brosua ariyo ma gin Winj Nyasaye Mondo Idag Nyakachieng’ kod Winj Nyasaye molos e yo mawinjo yot. Nikech giting’o weche manok, inyalo lokgi e dhok mamoko e yo mapiyo kendo mayot. E kinde ma ne ogol brosua mar Winj Nyasaye Mondo Idag Nyakachieng’, noyudo osepwodhi mondo oloke e dhok 431.
2. Ng’a gini ma brosuagi biro konyo?
2 Ng’a gini ma brosuagi biro konyo ahinya? Ne ane gik maluwogi ma jotimre e piny mangima:
• Jalendo ma wuoyo gi wuon ot e limbe mokwongo kata e limbe mar ariyo, fwenyo ni wuon ot okiya somo kata ong’eyo somo mana matin.
• Jalendo moro wuoyo gi joma wacho dhok ma pok wagoyoe bugewa kata ma wasegoyoe buge moko matin, kata en e alwora ma ng’eny ji ok ong’eyoe somo.
• Jalendo moro tiyo gi dhok mitiyoe gi ranyisi sama olendo ne momni e alworagi.
• Janyuol moro gombo ahinya puonjo nyathine matin adiera, to nyathino pod okiya somo.
3. Brosua mar Winj Nyasaye ochan e yo mane?
3 Kaka Ochan Weche Manie Igi: Brosua mar Winj Nyasaye nigi weche manok ahinya, ma gin mana sentens machuok kod Ndiko moket e bwo ite ka ite manyiso weche madongo. Mano en nikech ang’o? Par ane ka ng’ato nyalo miyi brosua moro mondik gi dhok maok inyal somo, ma samoro nigi nyukta ma ikiya korgi. Be brosuano biro mori kata dine bed ni oting’o pichni mabeyo? Samoro ok ibi mor. Kamano bende, joma okiya somo chunygi nyalo jok gi buge mondikie weche mang’eny. Mano emomiyo oket pichni mabeyo e ite ka ite mar brosuani kod ranyisi masiemo kaka pichnigo oluwore mondo oti kodgi mayot e wuoyo.
4. Brosua mar Winj Nyasaye Mondo Idag Nyakachieng’ ochan e yo mane?
4 Brosua mar Winj Nyasaye Mondo Idag Nyakachieng’ nigi pichni machal gi manie Winj Nyasaye. Olose mondo oti kode e tayo puonjruok gi joma ok ong’eyo somo maber kata ma puonjore somo. Jal matayo puonjruok bende nyalo tiyo gi brosuani kata sama en gi japuonjre matiyo gi Winj Nyasaye. Kama sula ka sula chakoree, nitie penjo midwoko e sulano. Nitie weche kod ndiko moketi e picha ka picha. E giko ite mang’eny nitie sanduk mobuki moting’o weche momedore kod Ndiko minyalo wuoye gi japuonjre kaluwore gi nyalone.
5. Gin kinde mage ma wanyalo chiwoe brosuagi, to ere kaka wanyalo timo mano?
5 Kaka Onego Ti Kodgi: Inyalo chiwo moro amora kuom brosua ariyogi sama ilendo e ot ka ot kineno ni mano owinjore, kata mana e dwe maok chiwgie. (Ne sanduk mawacho ni “Kaka Inyalo Chiw Brosuagi.”) Bende inyalo chiwe sama idok timo limbe kinyiso jal ma ilimono ni diher miye gimoro, kae to imiye brosuano.
6. Ere kaka wabiro tiyo gi brosuagi e tayo puonjruok mag Muma?
6 Nikech onge penjo moketi e Winj Nyasaye, sama watayo kode puonjruok, ok wabi tiyo gi yor penjo gi dwoko kaka wajatimo gi bug Muma Puonjo. E ogendini mang’eny, ji ohero winjo sigendini. Omiyo ti gi pichni manie brosuago e lero sigendini manie Muma. Ler gima picha ka picha nyiso. Puonj ka in gi ilo. Kwa japuonjre mondo ochiw pache. Somuru ndiko moket e giko itego kendo ikonye neno kaka ndikogo otudore gi gima upuonjoru. Penje penjo manyalo miyo ochiw pache kendo konyi ng’eyo kabe owinjo tiend gima upuonjoru. Kapo ni japuonjreno tiyo gi Winj Nyasaye Mondo Idag Nyakachieng’, somuru weche manie itego kod ndiko moketi sama uwuoyo kuom picha ka picha.
7. Ere kaka wanyalo konyo japuonjre Muma mondo otim dongruok?
7 Kony Japuonjre Otim Dongruok: Wageno ni puonjruok ma utimo biro miyo japuonjre obed gi gombo mar ng’eyo somo mondo mi opuonjre kuom Jehova kata sama en kende. (Math. 5:3; Joh. 17:3) Omiyo kapo ni utiyo gi Winj Nyasaye e puonjruoku, bang’ kinde inyalo chiwori puonje somo, kae to unyalo chako tiyo gi Winj Nyasaye Mondo Idag Nyakachieng’. Kata obedo ni utiyo gi brosua mane, bang’ tiekogi, japuonjre pod ok bi bedo moikore ne batiso. Onego koro uchak puonjoru bug Muma Puonjo kata buk machielo mabiro konye ng’eyo Muma e okang’ matut moloyo.
8. Ang’o momiyo imor ahinya tiyo gi brosua manyien-gi e lendo?
8 Jogo duto madwaro yudo ngima mochwere nyaka winj Jaloch mar polo gi piny. (Isa. 55:3) To Jehova dwaro ni “ji duto,” moriwo nyaka joma ok ong’eyo somo, opuonjre kaka ginyalo winje. (1 Tim. 2:3, 4) Mano kaka wamor nyowuoyo gi brosuagi ma wanyalo tiyogo e puonjo ji mondo owinj Nyasaye!
[Picha manie ite mar 3]
Kaka Inyalo Chiw Brosuagi
Tang’ ne wuon ot ite mag 2-3 kae to iwach kama: “Be diher dak e piny machalo kama? [Rit dwoko.] Ndiko singonwa [kata, buk malerni singonwa] ni machiegni ahinya, Nyasaye biro miyo piny obed maber, mokuwe, kendo maonge dhier kata tuoche. Ne ane gima nyaka watim mondo wadag e pinyno. [Som Isaiah 55:3 moket e ite mar 3.] Ndikoni nyisowa ni ‘wabi’ ir Nyasaye kendo ‘wawinje.’ To ere kaka wanyalo winjo Nyasaye?” El ite mar 4-5 mondo uwuo kuom dwoko manie itego. Kapo ni odich, inyalo weyone brosuano kendo itim chenro mar dok lime mondo unon dwoko mar penjono.