Luw Ranyisi mar Jonabi—Mika
1. En penjo mane ma nyalo bedo ni Mika ne penjore, to ang’o momiyo weche ma nolando ne ok odhi nono?
1 ‘Giko mar piny marachni nobi karang’o?’ Nyaka bed ni janabi Mika bende nopenjore penjono ka ne olando kum mag Jehova ne pinjeruodhi mag Israel kod Juda. Kata kamano, weche ma ne olandogo ne ok odhi nono. E higa mar 740 Ka Ndalowa Podi (K.N.P.), ka Mika pod ne ngima, wach Jehova ma nokoro e wi Samaria nochopo kare. (Mika 1:6, 7) Bang’e, Jerusalem bende nokethi e higa mar 607 K.N.P. (Mika 3:12) Ere kaka wanyalo luwo ranyisi mar janabi Mika kaka wamedo rito odiechieng’ ma Jehova biro kumoe piny marachni?
2. Ere kaka wanyalo nyiso ni wan joma hore sama wadhi nyime rito odiechieng Jehova, to ang’o momiyo onego watim kamano?
2 Hori: Mika nondiko kama: “To an to, anachom wang’a kuom Jehova; anarit Nyasach konyruokna.” (Mika 7:7) Mika ne ok thol athola kworo korito ni giko ochopi. Kaka janabi mar Jehova, nosiko kodich ahinya. Sama wadhi nyime rito odiechieng Jehova, wan bende ‘onego wabed jo maler e ngimawa, ka waluoro Nyasaye.’ (2 Pet. 3:11, 12) Horuok mar Jehova miyo ji thuolo mar timo lokruok. (2 Pet. 3:9) Mano e momiyo wan bende watemo matek mondo waluw ranyisi mar jonabi kuom bedo joma hore.—Jak. 5:10.
3. Ang’o momiyo onego wakwa Jehova roho maler?
3 Gen Kuom Teko ma Jehova Chiwo: Kata obedo ni Mika ne nigi migawo maok yot, nogeno kuom Jehova e chopo migawono. (Mika 3:8) Nitie gimomiyo Muma jiwowa ni wagen kuom teko ma Jehova chiwo. Jehova miyo joma ool teko mogundho mondo gichop migapgi e yo maber chuth. (Zab. 84:5, 7; Isa. 40:28-31) Be in iwuon iseneno kaka Jehova miyi teko e chopo migawo ma in-go? Be ikwayoga Jehova roho maler pile ka pile mondo omedi teko?—Luka 11:13.
4. Janabi Mika noketonwa ranyisi mane maber?
4 Mika noketo dwach Nyasaye ema obed gima duong’ moloyo e ngimane. Nochung’ motegno kata obedo ni nodak e kind joma nohero anjawo. Kamano e kaka wan bende waromo gi gik matemo yiewa pile ka pile. Wang’aduru ni wan bende “wanawuothi kwaluoro nying Jehova Nyasachwa ndalo duto nyaka chieng’.”—Mika 4:5.