Ti Maber gi Gasede Mosekalo

Gasedewa mosekalo nyalo konyo ji mana ka wamiyogi gasedego. Kuom mano, kik wakan-gi akana kata witogi. Ok wang’eyo ni en gaset mane manyalo moro ng’ato kata mako pache ma mi ochak luongo nying Jehova. (Rumi 10:​13, 14) Paro maluwogi nyalo konyowa tiyo maber gi gasedewa mosekalo.

• Sama walendo e alwora ma ok lendega ahinya, wanyalo soyo gasedego e bwo dhout joma ok wayudo. Onego waketgi kama joma kadho ok nyal nenogie.

• Sama walendo e stend ma ji ritoe mtokni kata gach reru, wanyalo penjo joma ni kuondego kabe digiher ni wamigie gimoro ma ginyalo somo, kae to watang’negi gasede mogwaro mosekalo mondo giyier ma morogi.

• Sama wan gi dijewa moko kuonde lwoko lewni, kuonde ma iritoe joma tuore kata ma hikgi oniang’, osiptende, kata kuonde mamoko ma kamago e alworawa, wanyalo weyo gasede moko mosekalo kama welo betie. Kinde duto, ber ka wakwong wakwayo rusa kuom joma tayo kuondego kapo ni gintie. To ka waneno ka nitie gasedewa moko kanyo, ok onego wawe mamoko kendo.

• Seche ma waikore dok timo limbe, wanyalo temo paro gik manyalo moro ng’ato ka ng’ato ma wachano limo. Kuom ranyisi, be gin gi joot? Dibed ni gihero dhi e wuodhe maboyo? Koso nyalo bedo ni gihero pur kata pidho maua? Wanyalo nono gasede ma wan-go mosekalo mondo wane kabe wanyalo yudo sula moko ma nyalo morogi, kae to waternegi.

• Sama wayudo ng’at ma wasebedo ka walimo to ok wayudga kuom ndalo mang’eny, wanyalo nyise gasede mosebaye kuom kinde ma wasebedo ka ok wanenre kode.