Sandug Penjo
◼ Nyithindo onego opuonjre e okang’ maromo nade mondo mi gibed Jokristo motegno?
Jonyuol ma Jokristo timo mathoth ahinya e neno ni gipidho nyithindgi ka ‘girieyogi kendo puonjogi kuom Ruoth.’ (Efe. 6:4) Kuom ranyisi, jonyuol moko oseyudo ni nyithindgi nwang’o ber ka ginono kodgi ndiko modiechieng’ okinyi kokinyi. E sa Lamo mar Joot kata e kinde mamoko, joot nyalo neno vidio moro kanyachiel kendo wuoyoe, ginyalo wuoyo kuom sula moro e bug Vijana Huuliza, ginyalo timo drama moro matin mar sigana moro e Muma, kata ginyalo bedo gi kinde mag tiegruok. Kata kamano, mondo nyithindo ‘oked matek mondo gibed motegno,’ gin bende nyaka puonjgi adiera matut mag Muma.—Hib. 6:1, NW.
Kaw ane kuom ranyisi kaka wajopuonjo joma walendonegi e alworawa. E limbe mokwongo kata bang’ limogi kuom kinde, wajatimo kinda mondo wachak puonjruok Muma kodgi ka watiyo gi bug Ang’o ma Muma Puonjo Kuom Adier? Bang’ tieko bugno, wadhiga e bug “Ritreuru e Hera mar Nyasaye.” Ang’o momiyo wapuonjore kodgi buge ariyogo duto? Bug Muma Puonjo konyo jopuonjre mag Muma yudo rieko michakogo ng’eyo Ndiko. Kae to bug “Hera mar Nyasaye” konyogi ng’eyo kaka ginyalo tiyo gi puonj mag Muma e ngimagi giwegi. Puonjruok buge ariyogo duto konyo joma nyien-go mondo ‘gigerre’ e Kristo kendo ‘gibed motegno e yie.’ (Kol. 2:6, 7) To nade nyithindwa, donge puonjruok buge ariyogo biro konyogi gibende? Gin bende onego opuonjgi wach rawar, Pinyruoth, koda chal mar jomotho. Onego ging’e gimomiyo Nyasaye oweyo mondo chandruok obedie kendo onego ging’e kaka ginyalo fwenyo ni wadak e ndalo mag giko mar piny marachni. Nyaka gibed gadier chuth ni Joneno mag Jehova ema puonjo adiera. E wi mano, nyithindwa onego owinj tiend puonj mag Muma kendo ng’eyo kaka ginyalo tiego nyalogi mar ‘pogo gik mabeyo kod gik maricho.’ (Hib. 5:14) En adier ni mondo jonyuol ong’e gima owinjore gipuonj nyithindgi, onego ginon hik nyithindgi kod nyalo ma gin-go mar mako puonj. Kata kamano, ng’eny nyithindwa nigi nyalo mar chako puonjore adiera motegno mag Muma kata kapod gitindo.—Luka 2:42, 46, 47.
Websaitwa mar jw.org biro ting’o sula moko mag tiegruok motudore gi bug Muma Puonjo manyalo konyo jonyuol e puonjo nyithindgi. Joot nyalo yudo sulago ka gidonjo e Websaitwa e dho Kiswahili e wich mar MAFUNDISHO YA BIBLIA > MATINEJA. Kinde mabiro, ibiro los sula mamoko motudore gi bug “Hera mar Nyasaye.” Jonyuol nyalo tiyo bende gi buge ariyogo achiel kachiel. Jonyuol nyalo nono kabe ginyalo tiyo gi sula mag tiegruok mayudore e Websaitwa e Lamo mar Joot, sama gipuonjo nyathigi moro ka en kende, kata e seche ma gikonyo nyithindgi ng’eyo kaka ginyalo timo puonjruok ma margi giwegi.