Wasebedo ka Walando Wach Pinyruoth Kuom Higni 100!
1. Ne ojiw oganda Jehova mondo otim ang’o chiegni higni 100 mokalo?
1 Chiegni higni 100 mokalo, Owadwa Rutherford ne ojiwo oganda Jehova mondo oland wach Pinyruoth kuonde duto kowachonegi niya: “Neuru, Ruoth koro locho! Un e jootene. Omiyo landuru, landuru, landuru Ruoth kod pinyruodhe.” To mano e gima wasebedo ka watimo! Mana kaka Jokristo mokwongo, wan be waselando wach maber mar Pinyruoth ne “chuech duto e bwo polo.” (Kol. 1:23) Gin yore mage ma wasetiyogo mondo waland wach Pinyruoth e higni 100 mosekalo? Ka koro wachomo higni 100 nyaka ne Pinyruoth chak locho, wanyalo timo ang’o mondo wadhi nyime lando wach Pinyruodhno?
2. Ere kaka bugewa oselando Pinyruodh Nyasaye?
2 Gik ma Wasetimo e Kinde Mosekalo: Kuom higni pieche, bugewa osebedo ka wuoyo ahinya e wi Pinyruodh Nyasaye. Chakre higa mar 1939 gasedwa ma watiyogo moloyo e tij lendo osebed kiluongo ni Ohinga mar Jarito Malando Pinyruodh Jehova. Kinde ka kinde, gasedni wuoyo e wi Pinyruoth kod gik mobiro timo. Gaset mar Amkeni! bende jiwo ni Pinyruodh Nyasaye kende ema biro tieko chandruoge mag dhano. Donge en gima ber ndi ni e piny mangima sani, gasede ariyogi ema iloko e dhok mang’enyie moloyo kendo ipogo ne ji mang’enyie moloyo!—Fwe. 14:6.
3. Moko kuom yore ma wasetiyogo mondo waland wach Pinyruoth gin mage?
3 Oganda Jehova osetiyo gi yore mopogore opogore mondo giland wach Pinyruoth. E higni machon, ne walendo ka watiyo gi mtokni moketie spikni, redio, kod kinanda momakie twege mag Muma. Yorego ne okonyowa lando wach maber ne ji mang’eny e kinde ma jolendo pod ne nok. (Zab. 19:4) E kindewagi, waseketo bugewa e Websaitwa mar jw.org, to mano osekonyowa lando wach Pinyruoth ne ji tara gi tara, moriwo nyaka joma odak e pinje ma tijwa ogoye marfuk.
4. Gin yore mage makende mag lendo ma wasetiyogo?
4 Oganda Jehova bende osetiyo gi yore makende mondo giland wach Pinyruoth. Kuom ranyisi, e wi lendo mar ot ka ot, chakre higni mag 1990 ne wachako lendo kuonde ma ji mang’eny ohero yueyoe, kuonde michungoe mtokni, kod kuonde ohala. Machiegnini, ne watimo chenro mar lendo e yo makende kuonde ma ji ng’enyie e taonde e piny mangima. E wi mano, kanyakla mang’eny lendo kuonde ma ji ng’enyie e alworagi ka gitiyo gi mesni kata gik midhiro (trolley) mochanie bugewa kendo moket kuonde ma ji mang’eny kaloe. Kata kamano, yo maduong’ie moloyo ma watiyogo e lando wach Pinyruoth pod en lendo mar ot ka ot.—Tich 20:20.
5. Gin thuolo mage ma jolendo mang’eny biro bedogo e higa manyien mar tijwa?
5 Gik ma Wageno Timo e Kinde Mabiro: E higa manyien mar tijwa mabiro chakore Septemba, jolendo mang’eny biro bedo jopainia mapile. Be diher bedo achiel kuomgi? To ka mano ok nyalreni, be inyalo bedo painia makonyo kinde ka kinde? Bed ni inyalo bedo painia kata ooyo, bed gadier ni Jehova biro guedhi nikech kinda miketo mondo itim duto minyalo e lando Pinyruoth.—Mal. 3:10.
6. Ang’o momiyo dwe mar Oktoba 2014 biro bedo dwe makende?
6 Chop dwe mar Oktoba 2014, Pinyruoth biro bedo koselocho kuom higni 100. To gima ber en ni Ohinga mar Jarito mar ji duto ma dweno biro jiwo wach Pinyruodh Nyasaye. Tim kinda mondo ine ni ichiwo gasedni ne ji mang’eny kaka nyalore. Kaka wadhi nyime rito gik ma biro timore e kinde mabiro, wadhiuru nyime yalo wach maber mar Pinyruodh Nyasaye ne ji duto moyie winjo.—Tich 8:12.