Luw Ranyisi mar Jonabi—Nahum
1. Bug Nahum puonjowa ang’o e wi Jehova?
1 Dala machon mar Nineve pod en gunda nyaka kawuono, mana kaka Jehova ne okoro kokalo kuom janabi Nahum. Mano puonjowa ni Jehova kumo jowasike, kata gibed mana jowasigu matek ma rom nade! (Nah. 1:2, 6) Nono weche ma janabi Nahum nokoro nyalo konyowa ahinya e tijwa mar lendo.
2. Sama wayalo, ang’o ma wanyalo timo mondo waho ji kendo wakonygi bedo gi geno?
2 Ho Ji Kendo Konygi Bedo gi Geno: Ka ong’i bug Nahum awiye awiye, nyalo nenore ka gima oting’o mana kum ma Jehova ne dhi kelo e wi Nineve ma ne en dala maduong’ mar Asuria. (Nah. 1:1; 3:7) Kata kamano, weche ma Nahum nokoro noting’o weche ma nojiwo jotich Jehova ahinya e ndalono. Nahum, ma tiend nyinge en “Jahoch,” nojiwo Jo-Yahudi wetene ni jowasikgi ne idhi tieki! Nahum nonyiso bende ni Jehova e “kar geng’ruok motegno e ndalo mar chandruok.” (Nah. 1:7) Wan bende sama wayalo, walando ne jomamoko wach maber ma hoyogi, kendo wajiwogi mondo gigen kuom Jehova.—Nah. 1:15.
3. Ere kaka wanyalo tiyo gi ranyisi sama wapuonjo mana kaka Nahum notimo?
3 Ti gi Ranyisi: E kinde ma Nahum ne koro wechene, noyudo Jo-Asuria oseketho dala mar Thebes (No-amon) e piny Misri. Jehova notayo Nahum mondo oti gi ranyisi mar gima ne otimore ne dala mar Thebesno e nyiso kaka ne idhi keth Nineve. (Nah. 3:8-10) Wan bende sama wanyiso ji kaka piny marachni biro rumo, wanyalo tiyo gi ranyisi mag weche mokor e Muma ma osetimore, e nyiso ni Jehova chopoga weche duto mokoro. Kane Jo-Babulon kod Jo-Media omonjo dala mar Nineve e higa mar 632 Ka Ndalowa Podi, koth maduong’ ne ochue mi Aora Tigris omwomo mogoyo bath ohinga ma ne olworo dalano piny, kata obedo ni ji ne paro ni ohingano ne otegno ma ne ok yot mwomo. Kae to, ne oketh Nineve mapiyo mana kaka Jehova ne osekoro.—Nah. 1:8; 2:6.
4. Ere kaka wanyalo tiyo gi weche moriere kendo ma winjo yot sama wapuonjo?
4 Ti gi Weche Moriere Kendo ma Winjo Yot: Nahum nondiko weche ma nokoro e yo moriere kendo ma winjore maler. (Nah. 1:14; 3:1) Wan bende onego wati gi weche moriere kendo ma winjo yot sama wapuonjo. (1 Kor. 14:9) Sama ilendo ot ka ot, wach gima oteri e yo moriere. Sama ipuonjo ng’ato Muma, konye mondo obed gi yie kuom Jehova kod Wachne, kendo one kaka weche mopuonjorego mulo ngimane owuon.—Rumi 10:14.
5. Weche ma Nahum nokoro konyowa bedo gadier kuom wach mane?
5 Weche manie bug Nahum e Muma nyiso ratiro ni Nahum ne nigi adier chuth ni weche ma Jehova nokoro ne nyaka timre. Sama warito giko mar piny Satanni, wayudo hoch kuom weche ma Nahum nokoro, ni ‘Jehova enotiek wach chutho’ kendo ‘masira ok anobukre kendo ma nyadiriyo.’—Nah. 1:9.