Kaka Wanyalo Medo Lony e Tij Lendo—Tiego Jopuonjre Muma Mondo Gilos Chenro Maber mar Puonjruok Giwegi

Gimomiyo Mano Dwarore: Mondo omi jopuonjre Muma obed joma otegno e Wach Nyasaye, dwarore ni girwak e pachgi kod chunygi puonj motegno to ok mana puonj ma gin kaka mise e Wach Nyasaye. (Hib. 5:12–6:1) Puonjruok dwaro kinda. Oriwo pimo weche manyien ma wapuonjre kod weche ma ne wasepuonjore chon, kae to wanono kaka ginyalo konyowa e ngima. (Nge. 2:1-6) Ka jopuonjre ong’eyo timo nonro gin giwegi, mano biro konyogi dwoko penjo mag Muma ka gitiyo gi bugewa. Kinda ma giketo e tiyo gi weche ma gipuonjore biro ikogi maber mondo gichung’ motegno sama gikalo e tembe.—Luka 6:47, 48.

Kaka Wanyalo Timo Mano:

Jiw gimomiyo dwarore ni ukwa Jehova e lamo kapok uchako puonjruok ka puonjruok mar Muma.—Joh. 14:26; 1 Kor. 2:10.
E chakruok mar puonjruok maru, jiw japuonjreni mondo otim ikruok motelo kapok ipuonjori kode. Tang’ne bugi, kendo ipuonje kaka en owuon onyalo kiewo dwoko kata weche madongo.
Kony japuonjreni mondo ochiw dwoko kotiyo gi wechege owuon. Tem mondo kik puonjruok maru obed mana mar penjo gi dwoko, tiende ni ipenjo penjo to japuonjre somo dwoko achiel kachiel kaka ondik e buk.
Jiw japuonjreni mondo osom kata mana kama tin e Wach Nyasaye pile ka pile. Nyise chenro mar somo Muma ma yudore e jw.org, ma lero yo ma ng’ato nyalo tiyogo e somo Muma pile. Kinda dwarore mondo ng’ato oluw chenro moseketo mar somo Muma pile. Kuom adier, jakinda e ma keyo.—Zab. 1:2, 3.
Nyis japuonjreni kaka onyalo yudo dwoko mag penjo mag Muma kotiyo gi Watchtower Library kata Watchtower ONLINE LIBRARY. Konye kaka onyalo ng’eyo buge mitiyogo e chokruoge mag kanyakla, sama nyinge bugego ondik e yo machuok.

Tem Timo Mae e Dweni:

Bang’ tieko nono paragraf manie bwo wich moro matin kata bang’ nono sula moro, kwa japuonjreni mar Muma mondo owach e yo machuok gik ma oa puonjore. Kapo ni ionge gi ng’at ma ipuonjo Muma, inyalo somo sigana moro e Muma kae to iwach siganano e yo machuok, kata inyalo timo kamano gi paragraf moro e Ohinga mar Jarito. Mano biro konyi ahinya e paro weche ma isesomo.