Luw Ranyisi mar Jonabi—Habakuk
1. Ang’o momiyo wanyalo wacho ni ngimawa chal gi mar janabi Habakuk?
1 Timbe ma ok kare monya ahinya e pinyni, nyalo miyo wawinj malit e chunywa mi wapenj Jehova penjo ma Habakuk nopenje ni: “Nang’o inyisa gi mamono, kendo imiya ng’iyo thagruok?” (Hab. 1:3; 2 Tim. 3:1, 13) Ka waparo matut kuom ote ma ne Habakuk ochiwo, kendo neno kaka nomakore gi Nyasaye, mano nyalo konyowa nano sama warito odiechieng Jehova mar ng’ado bura.—2 Pet. 3:7.
2. Ere kaka wanyalo nyisoni wadak kuom yie?
2 Bedo Mangima Kuom Yie: Habakuk ne ok oweyo mondo gik maricho ma ne timore omone tiyo ne Nyasaye gi kinda. (Hab. 2:1) Jehova nonyiso janabineno ni Wachne ne dhi chopo kare e kinde mowinjore, kendo ni ‘ng’at ma kare ne dhi bedo mangima kuom yie.’ (Hab. 2:2-4) Wechego konyo nade Jokristo modak e ndalo mag gikogi? Gima duong’ monego wang’e en ni giko nobi, to ok ni nochop karang’o. Yie motegno e ma biro konyowa siko ka waneno kendo keto tij lendo obed mokwongo e ngimawa.—Hib. 10:38, 39.
3. Ang’o momiyo onego wasik kwamor e tij Jehova?
3 Yud Mor Kuom Jehova: Ibiro tem yie marwa e kinde ma Gog manie piny Magog biro monjo jotich Jehova. (Eze. 38:2, 10-12) Kata mana joma biro chung’ motegno biro kalo e ngima matek. Nyalo bedo ni chiemo biro bedo ma nok. Wanyalo lalo gigewa mag ringruok, kata weche mag yuto biro bedo matek. Wabiro timo ang’o sama chandruogego ochoponwa? Habakuk nong’eyo ni nodhi yudo chandruoge, kuom mano nong’ado e chunye ni nodhi siko komor e tij Jehova. (Hab. 3:16-19) Mor mwayudo ‘kuom tiyo ne Jehova’ e ma biro konyowa timo sinani sama waromo gi tembe man nyimwago.—Neh. 8:10; Hib. 12:2.
4. Ang’o momiyo wanyalo bedo mamor e kindegi, kod e kinde ma biro?
4 Joma Jehova biro reso e kinde mong’adoe bura ne pinyni biro dhi nyime yudo puonj mondo gidag e ngima ma moro Nyasaye. (Hab. 2:14) Joma ibiro chier bende ibiro puonj yore mag Jehova. Kuom mano, weuru wati gi thuolo moro amora mwayudo mondo wapuonj ji ong’e tije miwuoro mag Jehova!—Zab. 34:1; 71:17.