Chokruoge Madongo ma Higa ka Higa Miyowa Thuolo mag Nyiso Hera

Ang’o momiyo chokruoge madongo ma watimoga higa higa morowaga sidang’? Mana kaka e kinde Jo-Israel, chokruoge madongo ma watimo e kindegi miyowa thuolo mar lamo Jehova kanyachiel gi Jokristo wetewa miche gi miche, to samoro alufe gi alufe. Wabedoga ma mor gi chiemb chuny ma wayudoga e chokruogego. Bende, wamorga gi thuolo mar bedo kanyachiel gi osiepewa kod joodwa. Nikech wagenoga chokruogego ahinya, mano miyo wadhiga e chokruogego kuom ndalo adek duto.

Sama wayudo thuolo mar chokore kanyachiel, onego wapar yore ma wanyalo nyisogo ni wahero jomamoko to ok paro mana ber ma wanyalo yudo kuomgi. (Gal 6:10; Hib 10:24, 25) Seche ma wayawo ne owadwa kata nyaminwa moro dhoot, kata seche ma ok wamako kombe duto, wanyiso ni wang’iyo gik ma kelo ber ne jomamoko. (Fil 2:3, 4) Chokruogego bende miyowaga thuolo mag loso osiepe manyien. Donge wanyalo timo kinda mondo wang’ere gi joma ok wang’eyo maber ka pok program ochakore, seche mag chiemo, kod ka program oserumo? (2Ko 6:13) Osiepe ma wayudo e kinde kaka mago nyalo bedo osiepewa nyaka chieng’! E wi mago duto, sama jomamoko ma ok gin Joneno oneno kaka waherore, mano nyalo ywayogi ma gichak lamo Jehova kanyachiel kodwa.​—Joh 13:35.

NEURU VIDIO MA WIYE WACHO NI, CHOKRUOK MORIWO PINJE MA WIYE WACHO NI “HERA OK REM NGANG’”! KAE TO UDWOK PENJO MA LUWOGI:

• 

  Ere kaka owete gi nyimine nonyiso ni gihero welo ma nobiro e chokruoge moriwo pinje ma notim e higa 2019?

• 

  Ang’o momiyo hera kod winjruok manie kind jotich Jehova en gima kende?

• 

  Ere kaka owete manie Bura Matayo nolero gima hera en e yore mopogore opogore?

• 

  Ere kaka hera nomedo riwo owete manie piny Germany, to ere kaka gima kamano notimore e piny South Korea bende?

• Onego wang’ad mar timo ang’o?