Jehova Kumo Ng’at Mohero Mondo Orieye

Kumo ng’ato oriwo puonje kod chike e yo monego oluw, to bende oriwo kwero ng’ato kod rieye. Jehova rieyowa mondo walame e yo moyiego. (Rum 12:1; Hib 12:10, 11) Kata obedo ni ng’ato nyalo winjo malit sama okume, ng’atno bedo ng’at ma kare kendo oyudo gueth ka oyie gi kumno. (Nge 10:7) En ang’o ma ng’at ma rieyo nyawadgi onego opar? To ng’at ma irieyo bende onego opar wach mane?

Ng’at ma rieyo nyawadgi. Jodongo, jonyuol, kod jomamoko temoga ahinya mondo girie joma gitayo e yo mang’won kendo ginyisogi hera mana kaka Jehova timo. (Jer 46:28) Kata ka ochuno ni osiem ng’ato matek, pod onego otim kamano e yo mowinjore kendo e yor hera.​—Tit 1:13.

Ng’at ma irieyo. Kata bed mana ni okumwa e yo mane, ok onego watamre kumno, kar mano onego wakaw okang’ mapiyo mar tiyo kode. (Nge 3:11, 12) Nikech wan dhano morem, waduto onego oriewa, to mano nyalo biro e yore mopogore opogore. Jehova nyalo rieyowa kotiyo gi wach moro ma wasomo e Muma, kata wach ma wawinjo e chokruogewa. Kata, samoro nyalo chuno ni komiti mar ng’ado bura ochiw kum ne jomoko. Yie sama oriewa en gima konyowa, nimar oketowa e yor ngima.​—Nge 10:17.

NEURU VIDIO MA WIYE WACHO NI NG’AT MA JEHOVA OHERO E MOKUMO MONDO ORIEYE, KAE TO UDWOK PENJO MA LUWOGI:

• 

  Ngima Canon ne chal nade ka ne otin, to ere kaka ngimane ne olokore?

• 

  Ere kaka Jehova ne okume e yor hera?

• 

  Gin puonj mage ma wayudo e ranyisi mar Canon?