Kend En Gima Onego Osiki

Kend mag Jokristo ma dhi maber miyo Jehova duong’ kendo kelo mor ne dichwo gi dhako manie kendno. (Mar 10:9) Mondo Jokristo obed gi kend ma siko kendo ma nigi mor, nyaka giti gi puonj mag Muma sama giyiero ng’at ma gidwa kendorego.

Ber ka ng’ato ochako kisera “ka osekalo higni ma rowere thiewoe,” ma gin higni ma gombo mag nindruok ni malo ahinya ma nyalo miyo ng’ato kik tim yiero maber. (1Ko 7:36) Ka pok idonjo e kend, ti gi thuolono e tego winjruokni gi Nyasaye kendo nyago kido mag Jokristo. Timo kamano biro konyi mondo itim gik ma biro miyo kendni odhi maber.

Ka pok iyie kendori gi ng’ato, kaw thuolo moromo kaka dwarore mondo ing’e timbene kod kite e yo maber, tiende ni “bidhruok ma iye mar chuny.” (1Pe 3:4) Kapo ni nitie weche moko ma ifwenyo ma miyo ichako bedo gi kiawa, wuo gi ng’atno. E kend, ng’ato onego oket pache ahinya kuom gik monyalo timo mondo okony nyawadgi ma gikendorego to ok mana kuom gik monyalo yudo. (Fil 2:3, 4) Ka ichako tiyo gi puonj mag Muma ka pok ikendo kata pok okendi, mano biro konyi keto mise maber ne kend ma biro dhi maber.

NEURU VIDIO MA WIYE WACHO NI KAKA INYALO IKORI NE KEND​—KARE MAR 3: GO KWANO, KAE TO UDWOK PENJO MA LUWOGI:

• Osiep ma ne nie kind nyaminwano gi Shane nochakore nade?

• Ang’o ma nyaminwano nofwenyo kaka osiep ma ne nie kindgi ne dhi nyime?

• Ere kaka jonyuolne ne okonye, to en yiero mane ma nyiso rieko ma ne otimo?