Wahero Jehova Wuonwa Ahinya

1-2. Ang’o momiyo Jehova noyawonwa yo mar bedo joode, to notimo kamano e yo mane?

JEHOVA oserwakowa mondo wabed joode kendo walame. To mano kaka odhialowa! Wasechiworene kendo waketo yie kuom misango mar Wuode. Wamor ahinya tiyone kanyachiel. Wadak e ngima maber sani, kendo wan gi geno mar dak nyaka chieng’ e polo kata e Paradiso e piny ka.

² Hera ma Jehova oherowago nomiyo oyawonwa yo mar bedo e kind joode. Ne oikore dhi asara maduong’ mondo otimwa kamano. (Joh. 3:16) ‘Nong’iewwa gi nengo’ maduong’. (1 Kor. 6:20) Kokalo kuom misango mar Yesu Wuode, nomiyowa thuolo mar bedo gi winjruok maber kode. Parie apara ni wanyalo luongo Jal maduong’ moloyo ji te e piny gi polo ni “Wuonwa”! To mana kaka ne waneno e sula mokalo, Jehova e Wuoro maberie mogik.

3. Gin penjo mage ma wanyalo penjore? (Ne bende sanduk ma wiye wacho ni “Be Jehova Ong’eya?”)

³ Mana kaka jandik-zaburi moro, wan be wanyalo penjore kama: “Ang’o ma dachul Jehova kuom gik mabeyo duto mosetimona?” (Zab. 116:12) Dwoko en ni onge. Kata kamano, herane chwalowa mondo wahere. Jaote Johana nondiko kama: “Wanyiso hera nikech en e ma nokwongo herowa.” (1 Joh. 4:19) Gin yore mage ma wanyalo nyisogo ni wahero Jehova?

SIK MACHIEGNI GI JEHOVA

4. Ka luwore gi Jakobo 4:8, ang’o momiyo onego watem matek mondo wasud machiegni gi Jehova?

⁴ Jehova dwaro ni wasud machiegni kode kendo wawuo kode. (Som Jakobo 4:8.) Ojiwowa ni ‘walem ma ok wawe’ kendo oikore winjowa kinde duto. (Rumi 12:12) Onge chieng’ ma Jehova biro bedo modich kata mool ahinya ma ok onyal winjowa. Wan wawinjo Jehova sama wasomo Muma kod buge momiyowa ma lero Muma. Bende, wawinje sama wachiko itwa malong’o e chokruogewa. Mana kaka nyithindo bedoga osiepe jonyuolgi sama giwuoyo nyading’eny, e kaka wan be wabedo osiepe Jehova ka wawuoyo kode nyading’eny.

5. Ere kaka wanyalo bero lamo magwa?

⁵ Tem ane paro ni lamo magi chaloga nade. Jehova dwaro ni waolne gik moko duto ma ni e chunywa. (Zab. 62:8) Ber ka wanonore ka watiyo gi penjoni: ‘Be lamo maga gin ma awiye-awiye minwoyo anwoya, koso anyisoga Jehova weche moa e chunya ma iye?’ Onge kiawa ni ihero Jehova kendo diher ni winjruok ma ni e kindi kode obed motegno. Mondo isik ka in gi winjruok maber gi Jehova, nyaka iwuo kode e lamo nyading’eny. Nyise nyaka wecheni maling’ ling’. Nyise gik ma mori kod ma chwanyi. Bed gadier chuth ni inyalo kwaye sa asaya mondo okonyi.

6. Mondo wasik ka wan machiegni gi Wuonwa ma ni e polo, ang’o ma nyaka watim?

⁶ Mondo wasik ka wan machiegni gi Wuonwa ma ni e polo, nyaka wabed gi chuny mar goyone erokamano. Wayie gi weche ma jandik-zaburi moro nowacho niya: “A Jehova Nyasacha, isetimonwa gik madongo miwuoro, kendo gik miparo timonwa bende thoth. Onge ng’at minyalo pim kodi. Katemo hulo gik misetimo kendo wuoyo kuomgi, to ok anyal hulogi duto nikech ging’eny miwuoro.” (Zab. 40:5) Ok wawinj awinja e chunywa ni wamor gi gik ma Jehova osetimonwa kae to waweyo gi kanyo; kar mano, wechewa kod timbewa bende onego onyis mano. Timo kamano miyo wabedo mopogore gi ji mang’eny ma ndalowagi. Ji mang’eny e pinyni ok nyis ni gimor gi gik ma Nyasaye timonegiga. Kuom adier, achiel kuom gik ma nyiso ni wadak e “ndalo mag giko” en ni ji ok go erokamano. (2 Tim. 3:1, 2) Kik wabed kamano kata matin!

7. Ang’o ma Jehova dwaro, to nikech ang’o?

⁷ Jonyuol ok diher ni nyithindgi osik ka gwandore, kar mano, digiher mondo nyithindgi oherre. E yo ma chalo kamano, Jehova dwaro ni nyithinde duto oherre kendo gibed osiepe. Kuom adier, hera ma waherorego e ma miyo ji ng’eyo ni wan Jokristo madier. (Joh. 13:35) Wayie gi weche ma jandik-zaburi nondiko niya: “Mano kaka ber kendo long’o ka owete odak kanyachiel gi kuwe!” (Zab. 133:1) Ka wahero owetewa gi nyiminewa, wanyiso gadier ni wahero Jehova. (1 Joh. 4:20) To mano kaka ber bedo e kind owete gi nyimine ‘ma ng’won kendo ma kechore’!​—Efe. 4:32.

NYIS NI IHERO JEHOVA KUOM LUWO CHIKENE

8. Ka luwore gi 1 Johana 5:3, gima duong’ momiyo wawinjo Jehova kendo luwo chikene en ang’o?

⁸ Jehova dwaro ni nyithindo owinj jonyuolni, kendo odwaro ni wan bende wawinje. (Efe. 6:1) Onego wawinje nikech en e mochueyowa, en e morito ngimawa, kendo en e janyuol mariekie mogik. Kata kamano, gima duong’ momiyo wawinjo Jehova kendo luwo chikene en ni wahere. (Som 1 Johana 5:3.) Kata obedo ni nitie gik mang’eny momiyo onego wawinj Jehova, ok ochunwa mondo watim kamano. Nochueyowa gi nyalo mar timo yiero, omiyo, obedo ma mor ka wayiero winje nikech wahere.

9-10. Ang’o momiyo onego wang’e chike Jehova kendo luwogi?

⁹ Jonyuol ok diher ni gimoro ohiny nyithindgi. Mano e momiyo giketonegiga chike mondo ogeng’negi chandruok. Sama nyithindo luwo chikego, ginyiso ni gigeno jonyuolgi kendo gimiyogi luor. Kare donge onego wang’e chike ma Wuonwa ma ni e polo oketonwa kendo waluwgi! Ka watimo kamano, wanyiso ni wahero Jehova kendo wamiye luor, to mano geng’onwa chandruok. (Isa. 48:17, 18) Joma odagi luwo chike Jehova to yudo mana chandruok lilo.​—Gal. 6:7, 8.

¹⁰ Dak e ngima ma moro Jehova geng’onwa gik ma nyalo hinyo dendwa kod pachwa, kaachiel gi gik ma nyalo ketho kindwa gi Nyasaye. Jehova ong’eyo gima ber kodwa. Nyaminwa Aurora modak Amerka wacho niya: “Ang’eyo ni kinde duto luwo chike Jehova e ma miyo wadak e ngima maber.” Wan bende wayie gi wachno. Donge nitie ber mang’eny miseyudo nikech iluwo kaka Jehova chiki?

11. Lamo konyowa nade?

¹¹ Lamo miyowa mijing’o mar winjo Jehova kata mana sama timo mano ok yot. En adier ni nitie kinde ma wanyalo yudo ka luwo chike Jehova moko tek, kata kamano, nyaka wadhi mana nyime kedo mondo kik wadonj e richo. Jandik-zaburi nosayo Jehova niya: “Konya abed gi chuny moikore luwo chikeni.” (Zab. 51:12) Nyaminwa Denise ma en painia wacho kama: “Sa asaya ma aneno ka ok yotna luwo chik Jehova e wach moro amora, alemoga mondo omiya teko mar timo gima kare.” Wan gadier ni Jehova dwoko lamo ma kamago.​—Luka 11:9-13.

KONY JOMAMOKO MONDO GIHER WUONWA MA NI E POLO

12. Ka luwore gi Jo-Efeso 5:1, ang’o monego watim?

¹² Som Jo-Efeso 5:1. Kaka nyithindo ma Jehova ohero, onego waluw timne. Watimo mano kuom hero jomamoko, bedo mang’won kodgi, kendo weyonegi kethogi. Sama joma ok ong’eyo Jehova oneno timbewa mabeyo, mano nyalo chwalogi mondo gin be gidwar ng’eyo Jehova. (1 Pet. 2:12) Jonyuol ma Jokristo onego oluw ranyisi mar Jehova sama girito nyithindgi. Mano nyalo jiwo nyithindogo mondo gidwar mako osiep gi Jehova Wuonwa ma jahera.

13. Ang’o monego waket e pachwa?

¹³ Nyithindo matindo oheroga wuonegi kendo gihero wuoyo maber kuomgi. Wan be wahero Wuonwa ma ni e polo, kendo wadwaro ni ji ong’eye. Wawinjo e chunywa mana kaka Ruoth Daudi ne winjo ka ne ondiko niya: “Abiro dendo Jehova.” (Zab. 34:2) To nade ka waluor wuoyo gi ji e wi Jehova? Wanyalo yudo chir kanye? En kuom keto pachwa e wi kaka Jehova nyalo bedo ma mor sama wawuoyo kuome, kod ber ma joma winjowa nyalo yudo ka gipuonjore e wi Jehova. Jehova biro miyowa chir ma dwarore. Mana kaka nokonyo Jokristo mokwongo, e kaka wan be obiro konyowa.​—1 The. 2:2.

14. Ang’o momiyo onego waland ne ji wach maber?

¹⁴ Jehova ok buon ng’ato ang’ata, kendo omor sama oneno ka wahero ji te ma ok wang’iyo ni giwuok e oganda mane. (Tich 10:34, 35) Achiel kuom yore ma wanyalo nyisogo ni wahero ji en landonegi wach maber. (Mat. 28:19, 20) Lando ne ji wach maber nyalo konyogi nade? Joma oyie winjowa bedo gi ngima maber sani, kendo gibedo gi geno mar dak nyaka chieng’ e kinde ma biro.​—1 Tim. 4:16.

HER JEHOVA WUONWA MONDO IBED MA MOR

15-16. Gin ang’o momiyo onego wabed ma mor?

¹⁵ Jehova en janyuol ma jahera, kendo odwaro ni joode obed ma mor. (Isa. 65:14) Nitie gik mang’eny momiyo onego wabed ma mor e kindewagi kata obedo ni wakalo e chandruoge mathoth. Kuom ranyisi, wan gadier chuth ni Wuonwa ma ni e polo oherowa ahinya. Bende, wawinjo tiend weche ma ni e Muma e yo maber. (Jer. 15:16) E wi mago, wan joot achiel mohero Jehova, mohero chikene, kendo moherore.​—Zab. 106:4, 5.

¹⁶ Wanyalo siko ka wamor nikech wan gadier ni ngima biro bedo maber moloyo e kinde ma biro. Wang’eyo ni machiegnini, Jehova biro tiyo gi Pinyruodhe e golo joma richo duto kendo loko pinyni obed Paradiso kendo. Bende, wan gi geno ni ibiro chier jomotho mi gidag kodwa kendo. (Joh. 5:28, 29) Mano biro morowa sidang’! To maduong’ie moloyo, wan gadier chuth ni e kinde mokayo machiegni, ji duto e polo gi piny biro miyo Wuonwa ma jahera duong’, pak, kod lamo mowinjore yudo.