Penjo Moa Kuom Josombwa

Ngeche 24:16 wacho ni “ng’at makare nyalo lwar dibiriyo, to obiro chung’ kendo.” Be ndikono wuoyo kuom ng’at ma timo richo nyadinwoya kae to Nyasaye ng’wonone?

Kuom adier, mano ok e tiend ndikono. Kar mano, ndikono wuoyo kuom ng’at ma kalo e chandruoge mang’eny to pod odhi adhiya nyime nano, ma ok oweyo mondo chandruogego onyos chunye chuth.

Ne ane wes mamoko molworo ndikono: “Kik ibut machiegni gi od ng’at makare mondo itimne gima rach; kik iketh kare moyueyoe. Nimar ng’at makare nyalo lwar dibiriyo, to obiro chung’ kendo, kata kamano, masira biro chwanyo jaricho. Ka jasiki opodho, kik imor, ka ochwanyore, kik chunyi bed moil.”​—Nge. 24:15-17.

Jomoko paroga ni wes mar 16 wuoyo kuom ng’at ma timo richo nyadinwoya to iweyone bang’ koseloko chunye, mobed gi winjruok maber gi Nyasaye kendo. Jotend din moko ariyo nowacho ni, “joyalo machon kachiel gi ma sani, osetiyo gi ndikono nyading’eny” e yo ma kamano. Jotend din-go nomedo wacho ni mano nyiso ni “kata ng’at maber nyalo timo . . . richo moro maduong’, to mano ok nyis ni koro ok ohero Nyasaye, pod onyalo chung’ malo kuom weyo richono kendo loko chunye sa asaya motimo richo.” Paro ma kamano nyalo moro ng’at ma ok dwar kedo gi richo. Onyalo paro ni kata kotimo richo nyadinwoya, pod Nyasaye biro weyone aweya.

Kata kamano, mano ok e tiend wes mar 16.

E dho Hibrania weche motigo e wes mar 16 kod 17 ni “lwar” kod “opodho” inyalo tigo e yore mopogore opogore. Inyalo ti gi wechego kiwuoyo kuom lwar kata podho aching’, kuom ranyisi, ruath mopodho e yo, ng’at mopodho koa e wi tado, kata cham molwar piny. (Rap. 22:4, 8; Amos 9:9) Wechego inyalo tigo bende e yor ranyisi. Kuom ranyisi, ndiko moro wacho kama: “Ka Jehova oyie gi ng’ato, obiro taye e yo monego oluw. Kata kochwanyore, ok obi podho piny, nikech Jehova omako lwete.”​—Zab. 37:23, 24; Nge. 11:5; 13:17; 17:20.

Ne ane gima Profesa Edward H. Plumptre nowacho: “E dho Hibrania, pok otiga gi wach mar [“lwar”] kiwuoyo kuom timo richo.” Jasomo moro machielo bende lero wes mar 16 e yo machuok kama: “Sando jotich Nyasaye kayiem ok kel ohala moro amora nikech kinde duto weche biro dhinegi mana maber, to jomaricho weche ok bi dhinegi maber!”

Omiyo, sama Ngeche 24:16 wuoyo kuom lwar, ok owuo kuom ng’at motimo richo, kar mano, owuoyo kuom chandruoge mang’eny ma ng’ato nyalo yudo. E piny marachni, ng’at makare nyalo tuore kata onyalo yudo chandruoge mamoko. Jo sirkal bende nyalo sande malit nikech yie mare. Kata kamano, onyalo bedo gadier ni Nyasaye biro sire, kendo konye nyagore gi chandruogego. Penjri ane kama: ‘Donge aseneno kaka weche dhiga maber ne jotich Nyasaye?’ Ang’o momiyo en-ga kamano? En nikech wan gadier ni “Jehova siro ji duto ma podho, kendo ochungo jo ma chunygi onyosore.”​—Zab. 41:1-3; 145:14-19.

“Ng’at makare” ok bedga mamor sama jomamoko chandore. Kar mano, gima more en ng’eyo ni “weche biro dhi maber ne ng’at moluoro Nyasaye madier, nikech oluoro Nyasaye gadier.”​—Ekl. 8:11-13; Ayub 31:3-6; Zab. 27:5, 6.