“Suduru machiegni gi Nyasaye to en bende nosud iru.”—Jakobo 4:8

Be Nyasaye Winjowaga Sama Walemo?

Be isegapenjori ka be Nyasaye winjiga sama ilemo? Ka en kamano, ng’e ni ok in kendi. Ji mathoth osegalemo ka gikwayo Nyasaye mondo okonygi, to gik ma chandogi pod nitie atieya. Be mano Nyiso ni Nyasaye ok winjga lamo magwa? Ooyo! Muma nigi weche ma miyo wabedo gadier ni Nyasaye winjowaga sama walemo ka walame e yo moyiego. Wane ane gima Muma wacho.

**NYASAYE WINJO LAMOWA.**

“A Nyasaye, ji duto nobi iri nimar in e Jawinj lamo.”—Zaburi 65:2.

Nitie jomoko ma lemoga nikech gineno ni lamo miyo giwinjo maber e chunygi, kata obedo ni ok giyie ni nitie ng’ama winjo lambgi. Kata kamano, lamo ok en mana gima wakueyogo chunywa sama wan gi chandruok. Muma nyisowa ni “Jehovaa chiegni gi ji duto ma luonge, ochiegni gi ji duto ma luonge gadiera. . . . Owinjo ywakgi kendo oresogi.”—Zaburi 145:18, 19.

Omiyo, wanyalo bedo gadiera chuth ni Jehova Nyasaye winjoga lamo mag jotichne. En owuon onyisowa niya: “Unuluonga, unubi ira mondo ulama, kendo anawinju.”—Jeremia 29:12.

**NYASAYE DWARO NI ILAME.**

Wuoro moro obet gi nyare matin sama nyareno tugo gi gige tugo moko.

“Lamuru ma ok uwe.”—Jo-Rumi 12:12.

Muma jiwowa ni ‘walem kinde duto’ kendo ni ‘wadhi nyime lamo.’ Mano nyiso maler ni Jehova Nyasaye dwaro ni mondo wawuo kode e lamo.—Mathayo 26:41; Jo-Efeso 6:18.

Ang’o momiyo Nyasaye dwaro ni walame? Par ane ranyisini: Be nitie janyuol ma ok diher ni nyathine owuo kode ka kwaye mondo okonye? En adier ni janyuol nyalo ng’eyo motelo gima nyathine dwaro; to kowinjo ka nyathineno nyise wechego achiel kachiel, mano miyo ong’eyo ni nyathineno ogene kendo ohere. E yo ma chalo kamano, sama walamo Jehova Nyasaye, wanyise ni wagene, wahere, kendo dwaher sudo machiegni kode.—Ngeche 15:8; Jakobo 4:8.

**NYASAYE DEWI GADIER.**

Dichwo moro ma ja ohala obet e stairs mag ot moro koparore ahinya. En gi katon moro e bathe moting’o gige mag ofis.

“[Keturu] parruoku duto kuome, nikech odewou.”—1 Petro 5:7.

Nyasaye dwaro ni wawuo kode nikech oherowa kendo odewowa. Ong’eyo parruokwa duto, kendo oikore konyowa.

Ruoth Daudi nolamo Jehova Nyasaye e ngimane duto te kokwaye mondo okonye, kendo nonyise gik moko duto ma ne ni e chunye. (Zaburi 23:1-6) Nyasaye ne nigi paro mane kuom Daudi? Nohero Daudi kendo nowinjo lamoge. (Tich Joote 13:22) Wan bende Nyasaye winjo lamo magwa nikech odewowa.

“AHERO JEHOVA NIMAR OWINJO DWONDA”

Jandik-zaburi moro e ma nondiko weche ma ni malogo e Muma. Ne en gadier ni Nyasaye ne winjo lamo mage, kendo ng’eyo mano nokonye ahinya. Nowinjo ka en machiegni gi Nyasaye, to mano nomiye teko mar nyagruok gi apaka mag ngima.—Zaburi 116:1-9.

Ka wan gadier ni Nyasaye winjowaga sama walemo, wabiro dhi nyime wuoyo kode ma ok wawe. Ne ane ranyisi mar Pedro modak e piny Spain. Wuode ma jahigni 19 notho e aksident moro. Nikech kuyo ma Pedro ne nigo, noolo ne Nyasaye weche te ma ne ni e chunye nyadinwoya kokwaye mondo ohoye kendo osire. Weche nobet nade? Pedro wacho kama: “Jehova nodwoko lamona kuom hoya gi jaoda kendo sirowa kotiyo gi Jokristo wetewa.”

Dichwo moro mokuyo ahinya oting’o picha moro e lwete ka osiepene moko hoye. — Nyasaye nyalo dwoko lamowa kuom hoyowa kendo sirowa kotiyo gi osiepewa

Kata obedo ni lamo ne ok omiyo Nyasaye ochiero wuod Pedro, lamogo nokonyo Pedro gi joode e yore mang’eny. María Carmen chiege wacho niya: “Lamo nokonya nyagora gi kuyo ma ne an-go. Ne an gadier ni Jehova Nyasaye ong’eya nikech sa asaya ma nalame, nawinjo ka abedo gi chuny mokue.”

Muma kaachiel gi gik mosetimore e ngima jomoko nyiso maler ni Nyasaye winjo lamowa. Kata kamano, nitie lamo moko ma Nyasaye ok dwoki. Ang’o momiyo Nyasaye dwoko lamo moko, to oweyo moko?

a Jehova e nying Nyasaye.—Zaburi 83:18.