Ang’o Momiyo Nyasaye Ok Dwokga Lamo Moko?
Jehova Nyasachwa kendo Wuonwa ma ni e polo oikore winjo lamowa, kendo omor timo kamano. Kata kamano, nitie gik ma nyalo mone dwoko lamowa. Gin gik magego, to ang’o monego watim sama walemo? Ne ane gima Muma wacho.
“Sa ma ulemo, kik unwo anwoya weche.”—Mathayo 6:7.
Jehova ok dwar ni wanwone lamo ma wamako e wiwa kata ma wasomo kowuok e buk moro. Kar mano, odwaro ni wawuo kode kowuok e chunywa. Inyalo winjo nade ka osiepni moro wuoyoga kodi kotiyo gi weche ma chal pile ka pile? Ok dimor, nikech osiepe madier wuoyoga ka gin thuolo kendo giwacho gik ma ni e chunygi. E yo ma kamano, seche ma walemo ka watiyo gi weche mowuok e chunywa, wanyiso Wuonwa ma ni e polo ni wanene kaka osiepwa.
“Sa mukwayo, ok unwang’ nimar ukwayo ka un gi paro maricho.”—Jakobo 4:3.
Ok onego wagen ni Nyasaye didwok lamo magwa ka wakwaye gik ma ok odwar ni watim kata wabedgo. Kuom ranyisi, be Jehova didwok lamo mar ja betting ma kwaye mondo hape olwar oyud pesa mang’eny, to Nyasaye owuon siemo joma igi lach kod joma oyie kuom hawi? (Isaya 65:11; Luka 12:15) Mano lamo ma Jehova ok nyal dwoko! Mondo Nyasaye odwok lamowa, gima wakwaye nyaka winjre gi gik monyisowa e Muma.
“Ng’at ma tamore luwo chik—kata mana lamone jogo chuny.”—Ngeche 28:9.
E higni machon, Nyasaye ne otamore dwoko lamb joma ne ok luw chikene. (Isaya 1:15, 16) Pok olokore. (Malaki 3:6) Ka wadwaro ni Nyasaye odwok lamo magwa, nyaka watim gik monyisowa e Muma. To nade ka po ni chon ne watimo gik maricho, to ne waseweyo? Be mano nyiso ni Jehova ok bi dwoko lamo magwa? Ok en kamano! Nyasaye biro ng’wononwa ka waloko kit ngimawa kendo watemo kar nyalowa mondo wamore.—Tich Joote 3:19.