In Iwuon Inyalo Yiero Ngima ma Diher Dakie Kinde Mabiro

Higni moko 3,500 mokalo, Jehova nonyiso jotichne ni nitie gima nyaka gitim mondo gidag maber e kinde mabiro. Nonyisogi kama: “Aseketo gik moko ariyo e nyimu mondo uyier: Ngima kod tho, gueth kod kuong’. Yieruru ngima mondo udag maber kaachiel gi nyikwau.”​—Rapar mar Chik 30:19.

Mondo ngima jogo obed maber e kinde mabiro, ne nyaka gitim yiero makare. Mano e gima wan bende nyaka watim. Muma leronwa gima dwarore ni watim ka wadwaro bedo gi ngima maber e kinde mabiro. Owacho kama: “Kuom hero Jehova Nyasachu, kuom winjo dwonde.”​—Rapar mar Chik 30:20.

ANG’O MA NYALO KONYI HERO JEHOVA KENDO WINJO DWONDE?

PUONJRI MUMA: Mondo iher Jehova, nyaka ikwong ipuonjri Muma mondo okonyi ng’eye maber. Sama itimo kamano, ibiro fwenyo ni en Nyasaye ma jahera kendo ma dwaroni mana ber lilo. Odwaro ni iwuo kode e lamo ‘nikech odewi.’ (1 Petro 5:7) Muma singo ni kitemo matek mondo isud machiegni gi Jehova, ‘to en be obiro sudo machiegni kodi.’​—Jakobo 4:8.

TI GI GIK MIPUONJORI: Winjo Nyasaye tiende en tiyo gi puonj ma yudore e Muma. Ka itimo kamano, “eka inibed gi rieko, kendo yoreni duto biro dhi maber.”​—Joshua 1:8.